Newdelhi , 21 സെപ്റ്റംബര് (H.S.)

ഐച്ചി (ജപ്പാൻ): ഏഷ്യൻ ഗെയിംസ് 2026-ലെ ഷൂട്ടിങ് റേഞ്ചിൽ ഇന്ത്യക്ക് വീണ്ടും മെഡൽ നേട്ടം. പുരുഷന്മാരുടെ 10 മീറ്റർ എയർ റൈഫിൾ ടീം ഇനത്തിൽ ഇന്ത്യൻ സംഘം വെള്ളി മെഡൽ സ്വന്തമാക്കി. രുദ്രാങ്ക്ഷ് പാട്ടീൽ, ഹിമാൻഷു ധില്ലൻ, പാർഥ് മാനെ എന്നിവരടങ്ങിയ ത്രിമൂർത്തികളാണ് ഇന്ത്യക്കായി പോഡിയത്തിൽ ഇടം നേടിയത്. ഐച്ചി പ്രിഫെക്ചറൽ ജനറൽ ഷൂട്ടിങ് ഗാലറിയിൽ നടന്ന വാശിയേറിയ മത്സരത്തിൽ മൂവരും ചേർന്ന് 1890.1 പോയിന്റുകൾ നേടിയാണ് രണ്ടാമതെത്തിയത്.

ലോക റെക്കോർഡ് പ്രകടനത്തോടെ സ്വർണം സ്വന്തമാക്കിയ ചൈനയ്ക്ക് പിന്നിലാണ് ഇന്ത്യ വെള്ളി മെഡൽ ഉറപ്പിച്ചത്. ചൈനീസ് താരങ്ങളായ ഷെങ് ലിഹാവോ, മാ സിഹാൻ, ഷാങ് ചാങ്ഹോങ് എന്നിവരടങ്ങിയ സംഘം 1899.0 പോയിന്റുകൾ നേടി ക്വാളിഫിക്കേഷൻ ലോക റെക്കോർഡോടെയാണ് സ്വർണ്ണത്തിലേക്ക് വെടിയുതിർത്തത്. തുടക്കം മുതൽ തന്നെ ആധിപത്യം പുലർത്തിയ ചൈനീസ് താരങ്ങൾ ചരിത്ര നേട്ടത്തോടെ ഒന്നാം സ്ഥാനം സ്വന്തമാക്കുകയായിരുന്നു.

വ്യക്തിഗത ഫൈനലിലേക്ക് മുന്നേറി രുദ്രാങ്ക്ഷും ഹിമാൻഷുവും

ടീം ഇനത്തിൽ വെള്ളി മെഡൽ നേടിയതിന് പുറമെ, വ്യക്തിഗത വിഭാഗത്തിലും ഇന്ത്യക്ക് മെഡൽ പ്രതീക്ഷകൾ സജീവമായി. യോഗ്യതാ റൗണ്ടിൽ മികച്ച പ്രകടനം പുറത്തെടുത്ത രുദ്രാങ്ക്ഷ് പാട്ടീലും ഹിമാൻഷു ധില്ലനും വ്യക്തിഗത ഫൈനലിലേക്ക് യോഗ്യത നേടി. ഇന്ത്യൻ നിരയിൽ ഏറ്റവും മികച്ച പ്രകടനം കാഴ്ചവെച്ച രുദ്രാങ്ക്ഷ് 631.8 പോയിന്റോടെ മൂന്നാം സ്ഥാനക്കാരനായാണ് ഫൈനൽ ബെർത്ത് ഉറപ്പിച്ചത്. 630.0 പോയിന്റ് നേടിയ ഹിമാൻഷു ധില്ലൻ ഏഴാം സ്ഥാനത്തെത്തിയാണ് ഫൈനലിലേക്ക് മുന്നേറിയത്. അതേസമയം, 628.3 പോയിന്റ് നേടിയ പാർഥ് മാനെ പത്താം സ്ഥാനത്താണ് യോഗ്യതാ റൗണ്ട് പൂർത്തിയാക്കിയത്.

യോഗ്യതാ റൗണ്ടിൽ ആദ്യ എട്ട് സ്ഥാനങ്ങളിൽ ചൈനയുടെ മൂന്ന് താരങ്ങൾ ഇടം നേടിയിരുന്നുവെങ്കിലും, ഒരു രാജ്യത്തുനിന്ന് രണ്ട് പേർക്ക് മാത്രമേ വ്യക്തിഗത ഫൈനലിൽ മത്സരിക്കാൻ സാധിക്കൂ എന്ന നിയമം നിലനിൽക്കുന്നതിനാൽ അഞ്ചാം സ്ഥാനത്തെത്തിയ ചൈനയുടെ ഷാങ് ചാങ്ഹോങ്ങിന് ഫൈനൽ അവസരം നഷ്ടമായി. ചൈനയുടെ ഷെങ് ലിഹാവോ 635.4 പോയിന്റോടെ ഏഷ്യൻ ഗെയിംസ് ക്വാളിഫിക്കേഷൻ റെക്കോർഡോടെ ഒന്നാമതും മാ സിഹാൻ (633.0) രണ്ടാമതുമെത്തിയാണ് ഫൈനലിൽ പ്രവേശിച്ചത്.

ഷൂട്ടിങ് വിഭാഗത്തിൽ മികച്ച തുടക്കം ലഭിച്ചതോടെ വരും ഇനങ്ങളിലും രാജ്യം വലിയ മെഡൽ പ്രതീക്ഷയിലാണ്. മികച്ച ഫോമിലുള്ള രുദ്രാങ്ക്ഷും ഹിമാൻഷുവും വ്യക്തിഗത ഇനത്തിലും പോഡിയത്തിൽ ഫിനിഷ് ചെയ്യുമെന്ന ആത്മവിശ്വാസത്തിലാണ് ഇന്ത്യൻ ക്യാമ്പ്.

---------------

Hindusthan Samachar / Roshith K