Thiruvananthapuram, 22 സെപ്റ്റംബര് (H.S.)

തിരുവനന്തപുരം: ഫുട്ബോൾ ഇതിഹാസം ലയണൽ മെസിയെയും അർജന്റീന ദേശീയ ടീമിനെയും കേരളത്തിൽ എത്തിക്കുമെന്ന് വാഗ്ദാനം നൽകി കോടികളുടെ സാമ്പത്തിക തട്ടിപ്പ് നടത്തിയെന്ന കേസിൽ മുൻ കായിക മന്ത്രി വി. അബ്ദുറഹ്മാന് കൂടുതൽ കുരുക്ക്. കേസ് അന്വേഷിക്കുന്ന പ്രത്യേക അന്വേഷണ സംഘത്തിന് (എസ്ഐടി) മുന്നിൽ മുൻ മന്ത്രിയെ പൂർണ്ണമായും തള്ളിപ്പറഞ്ഞ് കൂടുതൽ പേഴ്സണൽ സ്റ്റാഫ് അംഗങ്ങൾ രംഗത്തെത്തി. ചട്ടലംഘനങ്ങൾ പലതവണ ചൂണ്ടിക്കാട്ടിയിട്ടും മന്ത്രി അവഗണിക്കുകയായിരുന്നുവെന്ന് അദ്ദേഹത്തിന്റെ പ്രൈവറ്റ് സെക്രട്ടറിയായിരുന്ന ജി. ആർ. രമേശ് മൊഴി നൽകി.

വകുപ്പിലെ ഫയൽ നീക്കങ്ങളിലും സാമ്പത്തിക ഇടപാടുകളുമായി ബന്ധപ്പെട്ട തീരുമാനങ്ങളിലും ഉദ്യോഗസ്ഥരുടെയോ പേഴ്സണൽ സ്റ്റാഫിന്റെയോ മുന്നറിയിപ്പുകൾ വകവെക്കാതെ സ്വന്തം ഇഷ്ടപ്രകാരമാണ് മന്ത്രി നീങ്ങിയതെന്നാണ് ചോദ്യം ചെയ്യലിൽ രമേശ് വെളിപ്പെടുത്തിയത്. അന്താരാഷ്ട്ര തലത്തിലുള്ള പ്രമുഖ കായിക താരങ്ങളെയും ടീമുകളെയും കൊണ്ടുവരുന്നതുമായി ബന്ധപ്പെട്ട് നിലനിൽക്കുന്ന ഔദ്യോഗിക നടപടിക്രമങ്ങളും സാമ്പത്തിക സുതാര്യതാ മാനദണ്ഡങ്ങളും പാലിക്കണമെന്ന് ഫയലുകളിൽ കുറിച്ചിരുന്നു. എന്നാൽ ഇതെല്ലാം തള്ളിക്കളഞ്ഞാണ് ബാഹ്യ ഇടപെടലുകളോടെ കരാറുകളിലേക്കും പണമിടപാടുകളിലേക്കും മന്ത്രി നേരിട്ട് കടന്നതെന്നും മൊഴിയിലുണ്ട്.

ചട്ടങ്ങൾ അട്ടിമറിച്ചെന്ന് ആക്ഷേപം

സ്പോൺസർഷിപ്പ്, ഏജൻസി കരാറുകൾ, ഫണ്ട് സ്വരൂപണം എന്നിവയിൽ കായിക വകുപ്പിലെ ഉദ്യോഗസ്ഥരെ നോക്കുകുത്തിയാക്കി ചില പ്രത്യേക വ്യക്തികൾ വഴിയാണ് നീക്കങ്ങൾ നടത്തിയത്. ഉയർന്ന ഉദ്യോഗസ്ഥർ ഉന്നയിച്ച എതിർപ്പുകൾ മന്ത്രി നേരിട്ട് ഇടപെട്ട് മരവിപ്പിക്കുകയായിരുന്നുവെന്നും സ്റ്റാഫ് അംഗങ്ങൾ അന്വേഷണ സംഘത്തോട് വ്യക്തമാക്കിയിട്ടുണ്ട്.

കേസിൽ സാമ്പത്തിക ക്രമക്കേടുകളുടെ വ്യാപ്തി വലുതായതിനാൽ, വകുപ്പ് തലത്തിൽ നിന്ന് ഫയലുകൾ കൈകാര്യം ചെയ്ത മുഴുവൻ ജീവനക്കാരെയും ചോദ്യം ചെയ്യാനാണ് പ്രത്യേക അന്വേഷണ സംഘത്തിന്റെ തീരുമാനം. സർക്കാരിന്റെയോ കായിക വകുപ്പിന്റെയോ അംഗീകാരമില്ലാതെ സ്വകാര്യ വ്യക്തികളുമായും ഏജൻസികളുമായും ധാരണയുണ്ടാക്കിയത് ആരുടെ നിർദ്ദേശപ്രകാരമാണെന്നതിൽ കൃത്യമായ തെളിവുകൾ ശേഖരിക്കുകയാണ് അന്വേഷണ സംഘം.

മുൻ പ്രൈവറ്റ് സെക്രട്ടറിയുടെ മൊഴി രേഖപ്പെടുത്തിയ സാഹചര്യത്തിൽ, മുൻ മന്ത്രി വി. അബ്ദുറഹ്മാനെ നേരിട്ട് ചോദ്യം ചെയ്യാൻ അന്വേഷണ സംഘം നോട്ടീസ് അയച്ചേക്കും. വരും ദിവസങ്ങളിൽ കൂടുതൽ പേഴ്സണൽ സ്റ്റാഫ് അംഗങ്ങളെയും സ്പോർട്സ് കൗൺസിൽ പ്രതിനിധികളെയും കേസിൽ വിശദമായി ചോദ്യം ചെയ്യും.

---------------

Hindusthan Samachar / Roshith K