Mumbai , 22 സെപ്റ്റംബര് (H.S.)

മുംബൈ: രണ്ടാം വർഷ ബി.ടെക് വിദ്യാർത്ഥി സാഹിൽ വകോഡെ ജീവനൊടുക്കിയ സംഭവത്തെത്തുടർന്ന് ഐഐടി ബോംബെയിൽ സമഗ്രമായ സ്ഥാപന-സംവിധാന പരിഷ്കാരങ്ങൾ ആവശ്യപ്പെട്ട് വിദ്യാർത്ഥി പ്രതിനിധികൾ രംഗത്തെത്തി. തങ്ങൾ നടത്തിയ പ്രതിഷേധം ഏതെങ്കിലും തരത്തിലുള്ള അക്കാദമിക് തിരിമറികളെ ന്യായീകരിക്കാനല്ലെന്നും, ക്യാമ്പസിൽ ദീർഘകാലമായി നിലനിൽക്കുന്ന വ്യവസ്ഥാപിത പ്രശ്നങ്ങൾ പരിഹരിക്കാനും ശക്തമായ പരിഷ്കാരങ്ങൾ കൊണ്ടുവരാനുമാണെന്ന് വിദ്യാർത്ഥി പ്രതിനിധികൾ ഔദ്യോഗിക പ്രസ്താവനയിലൂടെ വ്യക്തമാക്കി. വിദ്യാർത്ഥികൾ ഉന്നയിച്ച ആവശ്യങ്ങൾ ഐഐടി ഡയറക്ടർ അംഗീകരിക്കുകയും നിശ്ചിത സമയപരിധിക്കുള്ളിൽ നടപ്പിലാക്കാമെന്ന് ഒപ്പിട്ടു നൽകുകയും ചെയ്തിട്ടുണ്ട്.

'അക്കാദമിക് ക്രമക്കേടുകളെ ന്യായീകരിക്കാനല്ല സമരം'

തങ്ങൾ പരീക്ഷകളിലെ കോപ്പിയടിയെയോ മറ്റ് അക്കാദമിക് ക്രമക്കേടുകളെയോ ഒരു തരത്തിലും അനുകൂലിക്കുകയോ ന്യായീകരിക്കുകയോ ചെയ്യുന്നില്ലെന്ന് വിദ്യാർത്ഥി യൂണിയൻ പ്രതിനിധികൾ വ്യക്തമാക്കി. സഹപാഠിയായ സാഹിലിന്റെ വിയോഗം ക്യാമ്പസിലെ സംവിധാനങ്ങളെയും പ്രക്രിയകളെയും പുനർവിചിന്തനം ചെയ്യാൻ നിർബന്ധിതരാക്കിയിരിക്കുകയാണ്. വരുംകാലങ്ങളിൽ മറ്റൊരു വിദ്യാർത്ഥിക്കും ഇത്തരം സാഹചര്യങ്ങൾ നേരിടേണ്ടി വരരുത് എന്ന ഉദ്ദേശത്തോടെയാണ് ക്യാമ്പസിൽ കൂട്ടായ ശബ്ദം ഉയർന്നതെന്നും അവർ കൂട്ടിച്ചേർത്തു.

ഡീനിനെ മാറ്റിയത് സ്വാഭാവിക നടപടി മാത്രം; നീതിയുക്തമായ അന്വേഷണം വേണം

വിദ്യാർത്ഥിയുടെ മരണവുമായി ബന്ധപ്പെട്ട് പരാതി ഉയർന്ന പ്രൊഫസർ സൂര്യനാരായണ ഡൂല്ലയുടെ കാര്യത്തിൽ നിഷ്പക്ഷമായ അന്വേഷണം നടക്കണമെന്നാണ് തങ്ങളുടെ ആവശ്യമെന്ന് വിദ്യാർത്ഥികൾ വ്യക്തമാക്കി. അന്വേഷണം പൂർത്തിയാകുന്നതുവരെ അദ്ദേഹത്തെ അഡ്മിനിസ്ട്രേറ്റീവ് അഫയേഴ്സ് ഡീൻ പദവിയിൽനിന്ന് മാറ്റിയത് മുൻകരുതൽ നടപടി മാത്രമാണ്. അദ്ദേഹത്തെ മുൻകൂട്ടി കുറ്റക്കാരനായി ചിത്രീകരിക്കാനോ അന്വേഷണത്തെ സ്വാധീനിക്കാനോ തങ്ങൾ ശ്രമിക്കുന്നില്ലെന്നും, അന്വേഷണ റിപ്പോർട്ടിന്റെ അടിസ്ഥാനത്തിൽ ഉചിതമായ തുടർനടപടികൾ സ്വീകരിക്കണമെന്നും വിദ്യാർത്ഥികൾ ചൂണ്ടിക്കാട്ടി.

'ബാഹ്യ രാഷ്ട്രീയ ഇടപെടലുകൾ വേണ്ട'

സാഹിലിന്റെ വേർപാടും അതിനെത്തുടർന്നുണ്ടായ പ്രശ്നങ്ങളും ഐഐടി സമൂഹത്തിനുള്ളിൽ തന്നെ പരിഹരിക്കപ്പെടേണ്ട ഒന്നാണെന്നും ബാഹ്യ സംഘടനകളുടെയോ രാഷ്ട്രീയ പാർട്ടികളുടെയോ അനാവശ്യ ഇടപെടലുകൾ ആവശ്യമില്ലെന്നും പ്രസ്താവനയിൽ വ്യക്തമാക്കുന്നു. രാഷ്ട്രീയ നേട്ടങ്ങൾക്കോ താല്പര്യങ്ങൾക്കോ വേണ്ടി ഈ ദാരുണ സംഭവത്തെ ഉപയോഗിക്കാൻ അനുവദിക്കില്ലെന്നും, പരിഷ്കരണ പ്രക്രിയ വിദ്യാർത്ഥികൾക്കും ക്യാമ്പസിനും കേന്ദ്രീകരിച്ച് തന്നെ മുന്നോട്ടുപോകണമെന്നും അവർ ആവശ്യപ്പെട്ടു.

ഹോസ്റ്റലുകളിൽ സീലിംഗ് ഫാനുകൾ നീക്കം ചെയ്യുന്നു

ഹോസ്റ്റൽ മുറിയിൽ തൂങ്ങിമരിച്ച നിലയിലാണ് സാഹിലിന്റെ മൃതദേഹം കണ്ടെത്തിയത്. ഈ സംഭവത്തിന് പിന്നാലെ ഹോസ്റ്റലുകളിൽ കൂടുതൽ സുരക്ഷാ മുൻകരുതലുകൾ ഏർപ്പെടുത്താൻ ഐഐടി ബോംബെ അധികൃതർ തീരുമാനിച്ചു. ഇതിന്റെ ഭാഗമായി എല്ലാ ഹോസ്റ്റൽ മുറികളിലെയും സീലിംഗ് ഫാനുകൾ മാറ്റി പകരം വാൾ മൗണ്ടഡ് (ഭിത്തിയിൽ ഘടിപ്പിക്കുന്ന) ഫാനുകൾ സ്ഥാപിക്കുന്ന നടപടികൾ ആരംഭിച്ചിട്ടുണ്ട്. പ്രശ്നങ്ങൾ നേരിട്ട് ഉന്നയിക്കാൻ വിദ്യാർത്ഥികൾക്കായി ഡയറക്ടറുടെ നേതൃത്വത്തിൽ 'ഓപ്പൺ ഹൗസ്' സംഘടിപ്പിച്ചതായും അധികൃതർ അറിയിച്ചു.

---------------

Hindusthan Samachar / Roshith K