Thiruvananthapuram , 24 സെപ്റ്റംബര് (H.S.)

തിരുവനന്തപുരം: സംസ്ഥാന സർക്കാരിന്റെ വാടക ഹെലികോപ്റ്റർ കരാറുമായി ബന്ധപ്പെട്ട് പുതിയ വിവാദങ്ങൾ പുകയുന്നു. സർക്കാരിന്റെ ഹെലികോപ്റ്റർ കരാർ സ്വന്തമാക്കാൻ ചരടുവലി നടത്തുന്ന സ്വകാര്യ ഏവിയേഷൻ കമ്പനിയായ 'ചിപ്സൻ ഏവിയേഷൻ' മുഖ്യമന്ത്രിയുടെ യാത്രാ സ്പോൺസറായി രംഗത്തെത്തിയതിലാണ് കടുത്ത ദുരൂഹത ഉയരുന്നത്. കോടികളുടെ കരാർ ലക്ഷ്യമിട്ട് സർക്കാരിനെ സമീപിച്ചിരിക്കുന്ന ഒരു സ്വകാര്യ കമ്പനി, ഭരണത്തലവന്റെ ഔദ്യോഗിക-വ്യക്തിഗത യാത്രകൾ സ്പോൺസർ ചെയ്യുന്നത് ഗുരുതരമായ വഴിവിട്ട ഇടപാടുകളിലേക്കാണ് വിരൽ ചൂണ്ടുന്നതെന്ന വിമർശനം ഇതിനകം ശക്തമായിക്കഴിഞ്ഞു.

ഇതിനിടെ, വിവാദ കമ്പനിയായ ചിപ്സൻ ഏവിയേഷന് കർണാടകയിലെ പ്രമുഖ കോൺഗ്രസ് നേതാവും മുൻ മന്ത്രിയുമായ കെ.ജെ. ജോർജിന്റെ കുടുംബവുമായി അടുത്ത ബന്ധമുണ്ടെന്ന വിവരങ്ങളും പുറത്തുവരുന്നുണ്ട്. കെ.ജെ. ജോർജിന്റെ കുടുംബ ഉടമസ്ഥതയിലുള്ള 'കേളചന്ദ്ര ലോജിസ്റ്റിക്സ് പ്രൈവറ്റ് ലിമിറ്റഡ്' എന്ന സ്ഥാപനത്തിന്റെ യാത്രാ ആവശ്യങ്ങൾ ഏകോപിപ്പിക്കുന്നതിനുള്ള സുപ്രധാന കരാർ കൈകാര്യം ചെയ്യുന്നത് ചിപ്സൻ ഏവിയേഷനാണ്. ഉന്നത രാഷ്ട്രീയ നേതൃത്വങ്ങളുമായി അടുത്ത ബിസിനസ് ബന്ധങ്ങൾ പുലർത്തുന്ന ഇത്തരം കമ്പനികൾക്ക് സംസ്ഥാന സർക്കാരിന്റെ തന്ത്രപ്രധാന കരാറുകളിൽ മുൻഗണന ലഭിക്കുന്നുണ്ടോ എന്ന ചോദ്യമാണ് ഉയരുന്നത്.

സംസ്ഥാനത്ത് അടിയന്തര സാഹചര്യങ്ങൾക്കും ദുരന്ത നിവാരണത്തിനും വിഐപി സുരക്ഷയ്ക്കുമായി കോടികൾ ചെലവിട്ടാണ് സർക്കാർ ഹെലികോപ്റ്റർ വാടകയ്ക്കെടുക്കുന്നത്. ഈ ടെൻഡർ നടപടികളിൽ ഉൾപ്പെടെ ചിപ്സൻ ഏവിയേഷൻ മുൻനിരയിലുണ്ട്. എന്നാൽ, ടെൻഡർ നടപടികൾ അന്തിമഘട്ടത്തിൽ നിൽക്കെ, മുഖ്യമന്ത്രിയുടെ വിദേശ-സ്വകാര്യ യാത്രകൾ സ്പോൺസർ ചെയ്യാൻ കമ്പനി മുന്നോട്ടുവന്നത് കൃത്യമായ പരസ്പര സഹായത്തിന്റെ (Quid pro quo) ഭാഗമാണെന്ന് പ്രതിപക്ഷം ആരോപിക്കുന്നു. ഭരണത്തലവന് ആനുകൂല്യങ്ങൾ നൽകി കോടികളുടെ ഔദ്യോഗിക കരാർ നേടിയെടുക്കാനുള്ള നീക്കമാണ് അണിയറയിൽ നടക്കുന്നതെന്നും ആക്ഷേപമുണ്ട്.

വിഷയത്തിൽ സമഗ്രമായ അന്വേഷണം വേണമെന്ന ആവശ്യവുമായി വിവിധ കോണുകൾ രംഗത്തെത്തിയിട്ടുണ്ട്. കമ്പനിയുമായി സർക്കാരിലെ ഉന്നതർക്ക് എന്തെങ്കിലും തരത്തിലുള്ള അവിഹിത സാമ്പത്തിക ഇടപാടുകളുണ്ടോ, ഔദ്യോഗിക മാനദണ്ഡങ്ങൾ ലംഘിച്ചാണോ സ്പോൺസർഷിപ്പുകൾ സ്വീകരിച്ചത് എന്നിവയെല്ലാം വ്യക്തമാക്കേണ്ടതുണ്ട്. സ്വകാര്യ കമ്പനികളുടെ രാഷ്ട്രീയ-വ്യവസായ ബന്ധങ്ങൾ തുറന്നുകാട്ടപ്പെടുന്നതോടെ, വരുംദിവസങ്ങളിൽ ഹെലികോപ്റ്റർ ഇടപാട് സംബന്ധിച്ച് പ്രതിപക്ഷ പാർട്ടികൾ സർക്കാരിനെതിരെ ശക്തമായ പ്രക്ഷോഭത്തിലേക്ക് കടക്കുമെന്നാണ് രാഷ്ട്രീയ കേന്ദ്രങ്ങൾ നൽകുന്ന സൂചന. ഭരണതലത്തിലെ സുതാര്യത ചോദ്യം ചെയ്യപ്പെടുന്ന തരത്തിലേക്ക് സംഭവം മാറിയതോടെ വിശദീകരണവുമായി രംഗത്തെത്തേണ്ട സമ്മർദ്ദത്തിലാണ് സർക്കാർ.

---------------

Hindusthan Samachar / Roshith K