Newdelhi , 03 സെപ്റ്റംബര് (H.S.)

ന്യൂഡൽഹി: രാജ്യത്തിന്റെ ഏറ്റവും പുതിയ ജിഡിപി വളർച്ചാ നിരക്കിന്റെ വിശ്വാസ്യതയെ ചോദ്യം ചെയ്ത വിമർശകർക്ക് ശക്തമായ മറുപടിയുമായി കേന്ദ്ര വാണിജ്യ-വ്യവസായ മന്ത്രി പീയുഷ് ഗോയൽ. പുറത്തുവന്ന ജിഡിപി കണക്കുകൾ പൂർണ്ണമായും രാഷ്ട്രീയ ഇടപെടലുകൾ ഇല്ലാതെ, നിഷ്പക്ഷവും ശാസ്ത്രീയവുമായ സ്ഥിതിവിവരക്കണക്ക് പ്രക്രിയയിലൂടെ തയ്യാറാക്കിയതാണെന്നും സർക്കാർ കൃത്രിമമായി നിർമ്മിച്ചതല്ലെന്നും അദ്ദേഹം വ്യക്തമാക്കി. സ്വതന്ത്ര വ്യാപാര കരാറുകൾ പ്രയോജനപ്പെടുത്തുന്നത് സംബന്ധിച്ച ദേശീയ ശിൽപ്പശാലയിൽ സംസാരിക്കവെയാണ് മന്ത്രി ഇക്കാര്യം അടിവരയിട്ട് പറഞ്ഞത്.

നടപ്പ് സാമ്പത്തിക വർഷത്തിന്റെ ഒന്നാം പാദത്തിൽ (ഏപ്രിൽ-ജൂൺ) രാജ്യം കൈവരിച്ച 7.8 ശതമാനം സാമ്പത്തിക വളർച്ച ചരിത്രപരമായ നേട്ടമാണെന്ന് പീയുഷ് ഗോയൽ ചൂണ്ടിക്കാട്ടി. മുൻ വർഷത്തെ ഇതേ പാദത്തിലെ 6.9 ശതമാനത്തേക്കാൾ ഉയർന്ന നിരക്കാണിത്. റിസർവ് ബാങ്ക് പ്രവചിച്ച ഏഴ് ശതമാനത്തിനും മുകളിലാണ് ഈ നേട്ടം. സാമ്പത്തിക മേഖലയിലെ കണക്കുകൾ നന്നായി മനസ്സിലാക്കാൻ കഴിയുന്ന വ്യക്തി എന്ന നിലയിൽ തനിക്ക് ഇക്കാര്യം പൂർണ്ണ അധികാരത്തോടെയും ഉത്തരവാദിത്തത്തോടെയും ഉറപ്പിച്ചു പറയാൻ കഴിയുമെന്നും, സർക്കാരോ മന്ത്രിമാരോ ഉദ്യോഗസ്ഥരോ നിർമ്മിച്ചതല്ല ഈ കണക്കുകളെന്നും അദ്ദേഹം വ്യക്തമാക്കി. അധികാരത്തിൽ ഏത് രാഷ്ട്രീയ പാർട്ടി വന്നാലും സ്റ്റാറ്റിസ്റ്റിക്സ് മന്ത്രാലയത്തിന്റെ കീഴിലുള്ള സ്വതന്ത്ര സംവിധാനത്തിലൂടെയാണ് ഇത്തരം ഡാറ്റകൾ പുറത്തുവരുന്നത്.

രാജ്യത്തിന്റെ സാമ്പത്തിക വളർച്ചയെ ഇകഴ്ത്തിക്കാട്ടാൻ ശ്രമിക്കുന്ന മുൻ ധനകാര്യ സെക്രട്ടറി, മുൻ റിസർവ് ബാങ്ക് ഗവർണർ തുടങ്ങിയ വിമർശകർക്കെതിരെയും മന്ത്രി ആഞ്ഞടിച്ചു. കുറുക്കന് മുന്തിരി കിട്ടാത്തപ്പോൾ പുളിക്കും എന്ന പഴഞ്ചൊല്ല് ഓർമ്മിപ്പിച്ചാണ് അദ്ദേഹം പ്രതികരിച്ചത്. മുൻപത്തെ അടിസ്ഥാന വർഷത്തിലെ പഴയ സീരീസിലെ കണക്കുകളെ പുതിയ സീരീസിലെ കണക്കുകളുമായി താരതമ്യം ചെയ്ത് ജനങ്ങളെ തെറ്റിദ്ധരിപ്പിക്കാനാണ് ചിലർ ശ്രമിക്കുന്നത്. ആപ്പിളിനെ ആപ്പിളുമായി തന്നെ താരതമ്യം ചെയ്യാൻ പഠിക്കണമെന്നും വ്യത്യസ്ത ഡാറ്റാ മാനദണ്ഡങ്ങൾ കൂട്ടിക്കുഴച്ച് കൃത്രിമം ആരോപിച്ച് ജനങ്ങളിൽ ആശയക്കുഴപ്പം ഉണ്ടാക്കാൻ ശ്രമിക്കുന്നത് സ്വയം ചെറുതാകലിന് തുല്യമാണെന്നും അദ്ദേഹം പരിഹസിച്ചു.

രാജ്യത്തിന്റെ സമ്പദ്വ്യവസ്ഥ തകർച്ചയുടെ വക്കിലാണെന്നും ഇതൊരു നിർജ്ജീവ സമ്പദ്വ്യവസ്ഥയാണെന്നും വരുത്തിതീർക്കാൻ പ്രതിപക്ഷം നിരന്തരം ശ്രമിക്കുകയാണ്. എന്നാൽ 140 കോടി ജനങ്ങളുടെ കഠിനാധ്വാനവും കൃത്യമായ ലക്ഷ്യബോധത്തോടെയുള്ള ഭരണനേതൃത്വവുമാണ് ഈ ശക്തമായ സാമ്പത്തിക വളർച്ചയ്ക്ക് പിന്നിൽ. ആഗോളതലത്തിൽ സാമ്പത്തിക അനിശ്ചിതത്വങ്ങൾ നിലനിൽക്കുമ്പോഴും ലോകത്തിലെ ഏറ്റവും വേഗത്തിൽ വളരുന്ന പ്രധാന സമ്പദ്വ്യവസ്ഥയായി ഇന്ത്യ തുടരുകയാണ്. ഇത്തരം നിഷേധാത്മക പ്രചാരണങ്ങൾ വികസന മുന്നേറ്റങ്ങളെ ബാധിക്കില്ലെന്നും സംരംഭകർ ആത്മവിശ്വാസത്തോടെ ആഗോള വിപണികളിലേക്ക് കടന്നുവരണമെന്നും പീയുഷ് ഗോയൽ വ്യക്തമാക്കി.

---------------

Hindusthan Samachar / Roshith K