Thiruvananthapuram, 03 സെപ്റ്റംബര് (H.S.)

തിരുവനന്തപുരം: സംസ്ഥാനത്ത് വൈദ്യുതി പ്രതിസന്ധി തുടരുന്ന പശ്ചാത്തലത്തിൽ ഇന്നും വൈദ്യുതി വിതരണത്തിൽ നിയന്ത്രണം ഏർപ്പെടുത്താൻ സാധ്യതയുണ്ടെന്ന് കെഎസ്ഇബി അറിയിച്ചു. രാത്രിയിലെ ഏറ്റവും ഉയർന്ന ഉപയോഗ സമയമായ (പീക്ക് അവർ) ഏഴു മണി മുതൽ അർദ്ധരാത്രി 12 മണി വരെയുള്ള സമയത്താണ് വൈദ്യുതി തടസ്സപ്പെടാൻ കൂടുതൽ സാധ്യതയുള്ളത്. ഓരോ പ്രദേശത്തും 15 മിനിറ്റ് മുതൽ അരമണിക്കൂർ വരെ നീളുന്ന റൊട്ടേഷൻ അടിസ്ഥാനത്തിലുള്ള ലോഡ് ഷെഡ്ഡിംഗിനാണ് ബോർഡ് തയ്യാറെടുക്കുന്നത്.

കഴിഞ്ഞ ദിവസവും സംസ്ഥാനത്തിന്റെ വിവിധ ഭാഗങ്ങളിൽ സമാനമായ രീതിയിൽ ഭാഗികമായി വൈദ്യുതി നിയന്ത്രണം ഏർപ്പെടുത്തിയിരുന്നു. കേന്ദ്ര വിഹിതത്തിലുണ്ടായ കുറവും പുറത്തുനിന്നുള്ള വൈദ്യുതി ലഭ്യതയിൽ നേരിട്ട സാങ്കേതിക തടസ്സങ്ങളുമാണ് നിലവിലെ പ്രതിസന്ധിക്ക് പ്രധാന കാരണം. സംസ്ഥാനത്ത് വൈദ്യുതി ഉപയോഗം സർവകാല റെക്കോർഡിലേക്ക് ഉയർന്നതും പ്രശ്നത്തിന്റെ ആക്കം കൂട്ടുന്നു. ആവശ്യത്തിനനുസരിച്ച് പവർ എക്സ്ചേഞ്ചുകളിൽ നിന്ന് അധിക വൈദ്യുതി ഉയർന്ന വില നൽകി വാങ്ങാൻ ശ്രമിക്കുന്നുണ്ടെങ്കിലും ദേശീയ ഗ്രിഡിലെ തിരക്കും ലഭ്യതക്കുറവും തിരിച്ചടിയാവുകയാണ്.

ആശുപത്രികൾ, കുടിവെള്ള വിതരണ പമ്പുകൾ തുടങ്ങിയ അവശ്യ സർവീസുകളെ വൈദ്യുതി നിയന്ത്രണത്തിൽ നിന്ന് പൂർണ്ണമായും ഒഴിവാക്കാനാണ് തീരുമാനം. ഗ്രാമീണ-നഗര വ്യത്യാസമില്ലാതെ വിവിധ ഫീഡറുകൾ മാറിമാറി ഓഫാക്കിക്കൊണ്ടുള്ള നിയന്ത്രണ സംവിധാനമാണ് കെഎസ്ഇബി ആലോചിക്കുന്നത്. ഒരു പ്രദേശത്തും തുടർച്ചയായ വൈദ്യുതി മുടക്കം ഉണ്ടാകാതിരിക്കാൻ ആവശ്യമായ മുൻകരുതലുകൾ സ്വീകരിച്ചിട്ടുണ്ടെന്ന് അധികൃതർ വ്യക്തമാക്കിയിട്ടുണ്ട്.

നിലവിലെ സാങ്കേതിക പ്രശ്നങ്ങളും ലഭ്യതക്കുറവും എത്രയും വേഗം പരിഹരിക്കാൻ ഊർജ്ജിത ശ്രമങ്ങൾ നടക്കുന്നുണ്ട്. അതേസമയം, പീക്ക് സമയത്തെ ഉപയോഗം പരമാവധി കുറയ്ക്കാൻ ഉപഭോക്താക്കൾ സഹകരിക്കണമെന്ന് കെഎസ്ഇബി അഭ്യർത്ഥിച്ചു. വൈകുന്നേരം 7 മുതൽ രാത്രി 12 വരെയുള്ള സമയങ്ങളിൽ എയർ കണ്ടീഷണറുകൾ, വാഷിംഗ് മെഷീനുകൾ, വാട്ടർ ഹീറ്ററുകൾ, ഇൻഡക്ഷൻ കുക്കറുകൾ തുടങ്ങിയ ഉയർന്ന വൈദ്യുതി ഉപയോഗിക്കുന്ന ഉപകരണങ്ങൾ പ്രവർത്തിപ്പിക്കുന്നത് പരമാവധി ഒഴിവാക്കണമെന്നാണ് നിർദ്ദേശം.

വരുംദിവസങ്ങളിലും കാലാവസ്ഥാ വ്യതിയാനവും കേന്ദ്ര ഗ്രിഡിൽ നിന്നുള്ള വൈദ്യുതി ലഭ്യതയും അനുസരിച്ചാകും തുടർനടപടികൾ തീരുമാനിക്കുക. വൈദ്യുതി ലഭ്യത സാധാരണ നിലയിലാകുന്നതുവരെ ഉപഭോക്താക്കൾ ജാഗ്രത പുലർത്തണമെന്നും നിയന്ത്രണത്തോട് സഹകരിക്കണമെന്നും അധികൃതർ അറിയിച്ചു.

---------------

Hindusthan Samachar / Roshith K