newdelhi, 04 സെപ്റ്റംബര് (H.S.)

ന്യൂഡൽഹി: തായ്ലൻഡിലെ ഫുക്കറ്റിൽനിന്ന് ന്യൂഡൽഹിയിലേക്ക് സർവീസ് നടത്തിയ എയർ ഇന്ത്യ വിമാനത്തിലെ പൈലറ്റ് നിരോധിത ലഹരിവസ്തു (സൈക്കോ ആക്ടീവ് സബ്സ്റ്റൻസ്) ഉപയോഗിച്ചതായി എയർക്രാഫ്റ്റ് ആക്സിഡൻ്റ് ഇൻവെസ്റ്റിഗേഷൻ ബ്യൂറോയുടെ (AAIB) പ്രാഥമിക അന്വേഷണ റിപ്പോർട്ട്. വിമാനം ആകാശത്തുവെച്ച് പെട്ടെന്ന് നിയന്ത്രണം വിട്ട് താഴേക്ക് പതിക്കുകയും യാത്രക്കാർക്കും ജീവനക്കാർക്കും പരിക്കേൽക്കുകയും ചെയ്ത ഗുരുതരമായ സംഭവത്തിലാണ് നിർണായകമായ ഈ കണ്ടെത്തൽ പുറത്തുവന്നിരിക്കുന്നത്.

വിമാനത്തിന്റെ പൈലറ്റ്-ഇൻ-കമാൻഡിനെ (ക്യാപ്റ്റൻ) പരിശോധിച്ചപ്പോഴാണ് നിരോധിത സൈക്കോ ആക്ടീവ് പദാർത്ഥത്തിന്റെ സാന്നിധ്യം പ്രാഥമിക പരിശോധനയിൽ (non-negative) കണ്ടെത്തുകയും തുടർന്ന് ലാബ് പരിശോധനയിൽ സ്ഥിരീകരിക്കുകയും ചെയ്തത്. സംഭവം അങ്ങേയറ്റം ഗൗരവമുള്ളതാണെന്നും ലഹരി ഉപയോഗിച്ച പൈലറ്റിനെതിരെ സിവിൽ ഏവിയേഷൻ ഡയറക്ടറേറ്റ് ജനറൽ (ഡിജിസിഎ) മുൻഗണനാടിസ്ഥാനത്തിൽ കർശന നടപടി സ്വീകരിക്കണമെന്നും അന്വേഷണ ഏജൻസി ശുപാർശ ചെയ്തു.

അപകടം ഉണ്ടായത് എങ്ങനെ?

ആഗസ്റ്റ് 4-നായിരുന്നു എയർ ഇന്ത്യയുടെ AI2379 വിമാനം അപകടത്തിൽപ്പെട്ടത്. 145 യാത്രക്കാരും ജീവനക്കാരുമായി എയർബസ് A320neo വിമാനം 36,000 അടി ഉയരത്തിൽ കൊൽക്കത്ത എയർ ട്രാഫിക് പരിധിയിലൂടെ പറക്കുന്നതിനിടയിലാണ് സാങ്കേതിക തകരാർ ഉണ്ടായത്. ഏതാനും നിമിഷങ്ങൾക്കുള്ളിൽ വിമാനത്തിന്റെ ഗ്രീൻ, ബ്ലൂ, യെല്ലോ എന്നീ മൂന്ന് പ്രധാന ഹൈഡ്രോളിക് സംവിധാനങ്ങളിലും തകരാർ സംഭവിക്കുകയും മർദ്ദം നഷ്ടപ്പെടുകയും ചെയ്തു.

ഇതോടെ വിമാനത്തിന്റെ ഓട്ടോപൈലറ്റ് സംവിധാനം തനിയെ നിലയ്ക്കുകയും മുന്നറിയിപ്പ് അലാറങ്ങൾ മുഴങ്ങുകയും ചെയ്തു. നിയന്ത്രണം നഷ്ടമായ വിമാനം നിമിഷങ്ങൾക്കകം 372 അടി ഉയരത്തിലേക്ക് കുതിച്ചുകയറുകയും പിന്നീട് 292 അടി താഴേക്ക് പതിക്കുകയും ചെയ്തു. ഈ സമയം യാത്രക്കാരോട് സീറ്റ് ബെൽറ്റ് ധരിക്കാനുള്ള നിർദേശം നൽകിയിരുന്നില്ല. വിമാനം പെട്ടെന്ന് കുലുങ്ങി താഴേക്ക് പതിച്ചതോടെ യാത്രക്കാരും ജീവനക്കാരും ക്യാബിനുള്ളിൽ തെറിച്ചുവീണു.

പരിക്കുകളും വിമാനത്തിനേറ്റ കേടുപാടുകളും

സംഭവത്തിൽ 20 യാത്രക്കാർക്കും നാല് ക്യാബിൻ ക്രൂ ജീവനക്കാർക്കും പരിക്കേറ്റു. വിമാനം ഡൽഹിയിൽ അടിയന്തരമായി ഇറക്കിയതിന് പിന്നാലെ പരിക്കേറ്റവരെ ആശുപത്രിയിലേക്ക് മാറ്റി. ഇതിൽ നാലുപേരുടെ പരിക്ക് ഗുരുതരമായിരുന്നു.

പെട്ടെന്നുണ്ടായ ശക്തമായ ആഘാതത്തിൽ വിമാനത്തിന്റെ ഉൾഭാഗത്ത് വലിയ തോതിലുള്ള നാശനഷ്ടങ്ങൾ സംഭവിച്ചിട്ടുണ്ട്. സീലിംഗ് പാനലുകൾ തകരുകയും ഓവർഹെഡ് ലഗേജ് ബിന്നുകൾ അടർന്നുമാറുകയും എമർജൻസി എക്സിറ്റ് ഹാൻഡിൽ തകരുകയും ചെയ്തു. വിമാനത്തിലെ ശുചിമുറിയിലെ കൊമോഡ് പോലും ഇളകിമാറിയ നിലയിലായിരുന്നു.

തുടർനടപടികൾ

വിമാനം നിലത്തിറക്കിയ ശേഷം പൈലറ്റുമാരെ ബ്രീത്ത് അനലൈസർ പരിശോധനയ്ക്ക് വിധേയരാക്കിയെങ്കിലും മദ്യത്തിന്റെ സാന്നിധ്യം കണ്ടെത്താനായിരുന്നില്ല. എന്നാൽ, പിന്നീട് നടത്തിയ ഡ്രഗ് പരിശോധനയിലാണ് മുഖ്യ പൈലറ്റ് കഞ്ചാവ് ഉൾപ്പെടെയുള്ള ലഹരിവസ്തുക്കൾ ഉപയോഗിച്ചതായി കണ്ടെത്തിയത്. അതേസമയം, കോ-പൈലറ്റിന്റെ പരിശോധനാ ഫലം നെഗറ്റീവായിരുന്നു.

സംഭവത്തെ തുടർന്ന് എയർ ഇന്ത്യ തങ്ങളുടെ അയ്യായിരത്തോളം വരുന്ന മുഴുവൻ പൈലറ്റുമാരെയും നിർബന്ധിത ഡ്രഗ് പരിശോധനയ്ക്ക് വിധേയമാക്കാൻ തീരുമാനിച്ചിട്ടുണ്ട്. പൈലറ്റുമാരിൽ ലഹരി ഉപയോഗം തടയുന്നതിനായി പരിശോധനകൾ കർശനമാക്കാനും എല്ലാ വർഷവും നിർബന്ധിത പരിശോധന ഏർപ്പെടുത്താനും ഡിജിസിഎയും സിവിൽ ഏവിയേഷൻ മന്ത്രാലയവും ആലോചിക്കുന്നുണ്ട്. വിമാനത്തിന്റെ ഹൈഡ്രോളിക് തകരാറിനെക്കുറിച്ച് അന്താരാഷ്ട്ര ഏജൻസികളുടെ സഹായത്തോടെയുള്ള വിശദമായ അന്തിമ അന്വേഷണം തുടരുകയാണ്.

---------------

Hindusthan Samachar / Roshith K