Thiruvananthapuram, 05 സെപ്റ്റംബര് (H.S.)

തിരുവനന്തപുരം: സംസ്ഥാനത്ത് നിർമ്മാണത്തിലിരിക്കുന്ന ദേശീയപാതകളിൽ ആവർത്തിച്ചുണ്ടാകുന്ന വാഹനാപകടങ്ങളിലും വർധിച്ചുവരുന്ന സുരക്ഷാ വീഴ്ചകളിലും അടിയന്തര ആശങ്ക പ്രകടിപ്പിച്ച് മുഖ്യമന്ത്രി വി.ഡി. സതീശൻ. തൃശൂർ കയ്പമംഗലത്ത് എട്ട് എൻജിനീയറിങ് വിദ്യാർത്ഥികളുടെ മരണത്തിനിടയാക്കിയ ദാരുണമായ വാഹനാപകടത്തിന്റെ പശ്ചാത്തലത്തിലാണ് റോഡ് സുരക്ഷ സംബന്ധിച്ച് സംസ്ഥാന സർക്കാർ അടിയന്തര നടപടികളിലേക്ക് നീങ്ങുന്നത്. നിർമ്മാണ മേഖലകളിൽ ജനങ്ങളുടെ ജീവൻ സംരക്ഷിക്കാൻ ആവശ്യമായ മുൻകരുതലുകൾ ഉണ്ടാകുന്നില്ലെന്ന ആരോപണം ശക്തമാകുന്നതിനിടെയാണ് മുഖ്യമന്ത്രി വിഷയത്തിൽ നേരിട്ട് ഇടപെട്ടിരിക്കുന്നത്.

കേരളത്തിലെ ദേശീയപാത വികസന പദ്ധതികളിൽ സമഗ്രവും ശാസ്ത്രീയവുമായ സുരക്ഷാ അവലോകനം അടിയന്തരമായി നടത്തണമെന്ന് കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്കരിയോട് ആവശ്യപ്പെടുമെന്ന് മുഖ്യമന്ത്രി അറിയിച്ചു. നിർമ്മാണ പ്രവൃത്തികൾ നടക്കുന്ന ഇടങ്ങളിൽ ജനങ്ങളുടെ സുരക്ഷ മുൻനിർത്തിയുള്ള തിരുത്തൽ നടപടികൾക്ക് ഏറ്റവും ഉയർന്ന മുൻഗണന നൽകണമെന്ന നിലപാടാണ് സംസ്ഥാനത്തിനുള്ളത്. നാഷണൽ ഹൈവേ അതോറിറ്റി ഓഫ് ഇന്ത്യയുടെ (NHAI) ഭാഗത്തുനിന്നുണ്ടാകുന്ന ഗുരുതരമായ ഏകോപനമില്ലായ്മയും സുരക്ഷാ മാനദണ്ഡങ്ങളിലെ വീഴ്ചകളും ഔദ്യോഗികമായി തന്നെ അതോറിറ്റിയെയും കേന്ദ്ര സർക്കാരിനെയും ധരിപ്പിക്കുമെന്നും അദ്ദേഹം വ്യക്തമാക്കി.

ദേശീയപാത 66-ന്റെ വികസന പ്രവർത്തനങ്ങൾ പുരോഗമിക്കുന്ന പലയിടങ്ങളിലും അശാസ്ത്രീയമായ വഴിതിരിച്ചുവിടലുകളും മതിയായ വെളിച്ചക്കുറവും വാഹനയാത്രക്കാർക്ക് നിരന്തര ഭീഷണിയാകുന്നുണ്ട്. ഡൈവേർഷനുകൾ തുടങ്ങുന്ന ഭാഗങ്ങളിൽ ദൂരെ നിന്നുതന്നെ തിരിച്ചറിയാൻ സാധിക്കുന്ന വ്യക്തമായ മുന്നറിയിപ്പ് ബോർഡുകളോ വേഗ നിയന്ത്രണ സംവിധാനങ്ങളോ സജ്ജീകരിക്കാൻ നിർമ്മാണ കമ്പനികൾ പലപ്പോഴും തയ്യാറാകുന്നില്ലെന്ന പരാതി ശക്തമാണ്. രാത്രികാലങ്ങളിൽ മതിയായ വെളിച്ചമില്ലാത്തതും റോഡരികിലെ അലക്ഷ്യമായ പാർക്കിങ്ങും അപകടങ്ങളുടെ തീവ്രത ഇരട്ടിയാക്കുന്നു. കയ്പമംഗലത്തുണ്ടായ അപകടത്തിലും ഇത്തരം വീഴ്ചകൾക്ക് വലിയ പങ്കുണ്ടെന്നാണ് പ്രാഥമിക വിലയിരുത്തൽ.

പ്രാദേശിക ഭരണകൂടങ്ങളെയും ജനപ്രതിനിധികളെയും വിശ്വാസത്തിലെടുക്കാതെയും അവരുടെ ആശങ്കകൾ കേൾക്കാതെയുമാണ് പലപ്പോഴും ദേശീയപാത അതോറിറ്റിയുടെ ഉദ്യോഗസ്ഥർ പ്രവർത്തിക്കുന്നതെന്ന ആക്ഷേപവും ശക്തമാണ്. നിരന്തരമുണ്ടാകുന്ന അപകടങ്ങൾ പൊതുജനങ്ങളുടെ സുരക്ഷിതത്വത്തെ വലിയ തോതിൽ ബാധിക്കുന്ന ഘട്ടത്തിൽ മേൽനോട്ട ചുമതലയുള്ള അധികാരികൾ ഉത്തരവാദിത്തത്തിൽ നിന്ന് ഒളിച്ചോടുന്നത് അനുവദിക്കാനാകില്ല. ഈ സാഹചര്യത്തിലാണ് കേന്ദ്ര ഉപരിതല ഗതാഗത മന്ത്രാലയം നേരിട്ട് ഇടപെട്ട് സുരക്ഷാ ഓഡിറ്റിങ് നടത്തണമെന്നും, നിലവിലെ നിർമ്മാണ പ്രവർത്തനങ്ങളിൽ പഴുതടച്ച സുരക്ഷാ ക്രമീകരണങ്ങൾ നടപ്പിലാക്കണമെന്നും സംസ്ഥാനം ഔദ്യോഗികമായി ആവശ്യപ്പെടുന്നത്. നിർമ്മാണ മേഖലകളിൽ തുടർച്ചയായ പരിശോധനകൾ ഉറപ്പാക്കണമെന്നും മുഖ്യമന്ത്രി നിർദേശിച്ചു

---------------

Hindusthan Samachar / Roshith K