Thiruvananthapuram, 05 സെപ്റ്റംബര് (H.S.)

തിരുവനന്തപുരം: ചിറയിൻകീഴിൽ രമ്യ ഹരിദാസ് എംഎൽഎയും കോൺഗ്രസ് പ്രാദേശിക പ്രവർത്തകരും തമ്മിലുണ്ടായ രൂക്ഷമായ തർക്കത്തിലും കയ്യാങ്കളിയിലും അന്വേഷണത്തിന് ഉത്തരവിട്ട് കെപിസിസി നേതൃത്വം. വിഷയം വഷളായി പോലീസിൽ പരാതി എത്തിയതോടെയാണ് അടിയന്തര ഇടപെടലുമായി പാർട്ടി നേതൃത്വം രംഗത്തെത്തിയത്. സംഭവത്തെക്കുറിച്ച് സമഗ്രമായി അന്വേഷിച്ച് റിപ്പോർട്ട് സമർപ്പിക്കുന്നതിനായി കെപിസിസി ജനറൽ സെക്രട്ടറി രമണി പി നായരെ ചുമതലപ്പെടുത്തി.

തിരഞ്ഞെടുപ്പ് പ്രവർത്തനങ്ങളുടെ ഭാഗമായി നേരത്തെ തന്നെ ചിറയിൻകീഴ് മണ്ഡലത്തിന്റെ ചുമതല വഹിച്ചിരുന്ന നേതാവാണ് രമണി പി നായർ. അതിനാൽ പ്രദേശത്തെ രാഷ്ട്രീയ സാഹചര്യങ്ങളും സംഘടനാ സമവാക്യങ്ങളും സംബന്ധിച്ച് വ്യക്തമായ ധാരണ ഇവർക്കുണ്ടെന്ന വിലയിരുത്തലിലാണ് നേതൃത്വം അന്വേഷണ ചുമതല ഏൽപ്പിച്ചിരിക്കുന്നത്. കാലതാമസം വരുത്താതെ അടിയന്തരമായി വിഷയത്തിൽ ഇടപെടാനാണ് നേതൃത്വത്തിന്റെ കർശന നിർദേശം. ഇതിന്റെ ഭാഗമായി നാളെത്തന്നെ പ്രത്യേക യോഗം ചേരാൻ കെപിസിസി ആവശ്യപ്പെട്ടിട്ടുണ്ട്.

സംഘർഷത്തിന് കാരണക്കാരായ ഇരു വിഭാഗങ്ങളെയും നേരിൽ കണ്ട് കാര്യങ്ങൾ കേൾക്കാനാണ് അന്വേഷണ സമിതിക്ക് നൽകിയിരിക്കുന്ന നിർദേശം. ആരോപണവിധേയയായ എംഎൽഎ രമ്യ ഹരിദാസ്, പരാതിക്കാരനായ കോൺഗ്രസ് നേതാവ് സജാദ്, പ്രാദേശിക നേതാക്കൾ എന്നിവരുമായി വിശദമായി സംസാരിക്കും. പ്രാദേശിക സഹകരണ ബാങ്ക് തിരഞ്ഞെടുപ്പുമായി ബന്ധപ്പെട്ട് ഉയർന്ന തർക്കങ്ങൾ തെരുവിലെ കയ്യാങ്കളിയിലേക്കും പോലീസ് കേസുകളിലേക്കും നീങ്ങിയത് പാർട്ടിക്ക് പൊതുസമൂഹത്തിൽ വലിയ അവമതിപ്പ് ഉണ്ടാക്കിയെന്നാണ് നേതൃത്വത്തിന്റെ വിലയിരുത്തൽ.

കുടുംബാംഗങ്ങൾക്ക് നേരെയുണ്ടായ അതിക്രമവും വീട്ടുപകരണങ്ങൾ നശിപ്പിച്ചതും അടക്കമുള്ള അതീവ ഗുരുതരമായ ആരോപണങ്ങളാണ് പരാതിക്കാരൻ ഉന്നയിച്ചിരിക്കുന്നത്. പാർട്ടിയിലെ മുതിർന്ന നേതാക്കൾ പരസ്യമായി ഏറ്റുമുട്ടുന്ന അവസ്ഥ പാടില്ലെന്നും, സംഘടനാതലത്തിൽ പ്രശ്നപരിഹാരം കാണേണ്ട വിഷയങ്ങൾ പൊതുവിടത്തിൽ അക്രമമായി മാറിയത് ഗുരുതര അച്ചടക്കലംഘനമാണെന്നും കെപിസിസി നേതൃത്വം കരുതുന്നു.

ഇരുവിഭാഗങ്ങളുടെയും വാദങ്ങൾ രേഖപ്പെടുത്തിയ ശേഷം തയ്യാറാക്കുന്ന വിശദമായ റിപ്പോർട്ട് കെപിസിസി പ്രസിഡന്റിന് സമർപ്പിക്കും. റിപ്പോർട്ടിന്റെ അടിസ്ഥാനത്തിൽ ഉത്തരവാദികളായവർക്കെതിരെ കർശന അച്ചടക്ക നടപടിയുണ്ടാകുമെന്നാണ് സൂചന. വരാനിരിക്കുന്ന രാഷ്ട്രീയ നീക്കങ്ങൾക്ക് മുന്നോടിയായി ഗ്രൂപ്പ് തർക്കങ്ങൾ പരിഹരിച്ച് മുന്നോട്ടുപോകാൻ ലക്ഷ്യമിട്ടാണ് കോൺഗ്രസ് നേതൃത്വത്തിന്റെ ഈ നിർണായക നീക്കം.

---------------

Hindusthan Samachar / Roshith K