Kannur, 05 സെപ്റ്റംബര് (H.S.)

കണ്ണൂർ: കെഎസ്ആർടിസിയുടെ കാര്യക്ഷമതയില്ലായ്മയും ആസൂത്രണപ്പിഴവും തുറന്നുകാട്ടി കണ്ണൂർ-മൂന്നാർ റൂട്ടിൽ അസാധാരണ സർവീസ്. കണ്ണൂരിൽനിന്ന് മൂന്നാർ വരെ 379 കിലോമീറ്റർ ദൂരം സർവീസ് നടത്തിയ സൂപ്പർഫാസ്റ്റ് ബസിന് ആകെ ലഭിച്ചത് വെറും 355 രൂപ മാത്രം വരുമാനം. ദീർഘദൂര യാത്രയ്ക്കിടെ ബസിൽ ടിക്കറ്റെടുത്തത് വെറും മൂന്ന് യാത്രക്കാർ മാത്രമാണ്. ഇന്ധനച്ചെലവ് പോലും ലഭിക്കാതെ വലിയ സാമ്പത്തിക നഷ്ടമുണ്ടാക്കിയ സംഭവത്തിൽ കെഎസ്ആർടിസി ഉന്നതതല അന്വേഷണമാരംഭിച്ചു.

ഓണക്കാലത്തെ തിരക്ക് നിയന്ത്രിക്കുന്നതിനായി കണ്ണൂർ ജില്ലയിലെ സർവീസുകൾക്കായി മൂന്നാർ ഡിപ്പോയിൽനിന്ന് അധികൃതരുടെ നിർദേശപ്രകാരം ഒരു ബസ് വിട്ടുനൽകിയിരുന്നു. ഉത്സവ സീസൺ കഴിഞ്ഞതോടെ ഈ ബസ് മൂന്നാറിലേക്ക് തിരികെ എത്തിക്കേണ്ട ചുമതലയായി. എന്നാൽ, ബസ് വെറുതെ കൊണ്ടുപോകുന്നതിന് പകരം സൂപ്പർഫാസ്റ്റ് സർവീസായി ഓടിച്ച് കളക്ഷൻ നേടാൻ അധികൃതർ തീരുമാനിക്കുകയായിരുന്നു.

ഇതിനായി മൂന്നാർ ഡിപ്പോയിൽനിന്ന് കണ്ടക്ടറെയും ഡ്രൈവറെയും ടിക്കറ്റ് ഇഷ്യൂവിംഗ് മെഷീൻ ഉൾപ്പെടെയുള്ള ക്രമീകരണങ്ങളുമായി കണ്ണൂരിലേക്ക് പറഞ്ഞയച്ചു. തുടർന്ന് കൃത്യമായ മുന്നൊരുക്കങ്ങളോ സമയക്രമീകരണങ്ങളോ ഇല്ലാതെ ബസ് കണ്ണൂരിൽനിന്ന് മൂന്നാറിലേക്ക് പുറപ്പെടുകയും ചെയ്തു.

യാത്രക്കാർ അറിയാതെ പോയ ദീർഘദൂര സർവീസ്

കണ്ണൂർ മുതൽ കോഴിക്കോട്, തൃശൂർ, പെരുമ്പാവൂർ, കോതമംഗലം വഴി മൂന്നാറിലേക്ക് സാധാരണ നിലയിൽ വലിയ യാത്രക്കാരുണ്ടാകേണ്ട പ്രധാന റൂട്ടാണിത്. എന്നാൽ, ഇത്തരമൊരു സൂപ്പർഫാസ്റ്റ് സർവീസ് കണ്ണൂരിൽനിന്ന് ആരംഭിക്കുന്ന വിവരം സ്റ്റാൻഡിലോ ഓൺലൈൻ പോർട്ടലുകളിലോ കൃത്യമായി അനൗൺസ് ചെയ്യുകയോ പ്രചരിപ്പിക്കുകയോ ചെയ്തിരുന്നില്ല. മാത്രമല്ല, പ്രധാന സ്റ്റാൻഡുകളിലേക്ക് യാത്രക്കാരെ ആകർഷിക്കുന്ന രീതിയിലുള്ള സമയക്രമീകരണവും ഏർപ്പെടുത്തിയിരുന്നില്ല.

ഇതിന്റെ ഫലമായി 379 കിലോമീറ്റർ ദൂരം താണ്ടി ബസ് മൂന്നാറിലെത്തിയപ്പോൾ ആകെ കയറിയത് മൂന്നേ മൂന്ന് യാത്രക്കാർ മാത്രമായി ചുരുങ്ങി. ടിക്കറ്റ് വരുമാനമായി ലഭിച്ചത് 355 രൂപയും. ആയിരക്കണക്കിന് രൂപയുടെ ഡീസലടിച്ചാണ് ബസ് യാത്ര പൂർത്തിയാക്കിയത്.

കോർപ്പറേഷന്റെ കടുത്ത സാമ്പത്തിക പ്രതിസന്ധികൾക്കിടയിലും ഉദ്യോഗസ്ഥരുടെ ഭാഗത്തുനിന്നുണ്ടായ ഗുരുതരമായ ഇത്തരം അനാസ്ഥകൾക്കെതിരെ ജീവനക്കാർക്കിടയിലും പൊതുജനങ്ങൾക്കിടയിലും വലിയ വിമർശനമുയർന്നിട്ടുണ്ട്. സർവീസ് ക്രമീകരിച്ചതിലും റൂട്ട് ഏകോപനത്തിലും ഉണ്ടായ വീഴ്ചകളെക്കുറിച്ച് വിശദമായ റിപ്പോർട്ട് സമർപ്പിക്കാൻ ബന്ധപ്പെട്ട വിജിലൻസ് വിഭാഗത്തിന് അധികൃതർ നിർദേശം നൽകി.

---------------

Hindusthan Samachar / Roshith K