Tehran, 06 സെപ്റ്റംബര് (H.S.)

ടെഹ്റാന്: പശ്ചിമേഷ്യന് സമുദ്രമേഖലയെ സമ്പൂര്ണ്ണ യുദ്ധത്തിലേക്ക് തള്ളിവിട്ട് അമേരിക്കയും ഇറാനും തമ്മിലുള്ള സൈനിക ഏറ്റുമുട്ടലുകള് അതിരൂക്ഷമാകുന്നു. അമേരിക്കയുടേത് ഉള്പ്പെടെ ആറ് സമുദ്രക്കപ്പലുകള് തങ്ങളുടെ സൈന്യം വിജയകരമായി ആക്രമിച്ചതായി ഇസ്ലാമിക് റെവല്യൂഷണറി ഗാര്ഡ് കോര്പ്സ് (IRGC) അവകാശപ്പെട്ടു. പേര്ഷ്യന് ഗള്ഫിലും ഹോര്മുസ് കടലിടുക്കിലും യുഎസ് സൈനിക സാന്നിധ്യത്തിന് നേരെ ബാലിസ്റ്റിക് മിസൈലുകളും ഡ്രോണുകളും ഉപയോഗിച്ചാണ് പ്രത്യാക്രമണം നടത്തിയതെന്ന് ഇറാന് ഔദ്യോഗിക മാധ്യമങ്ങള് റിപ്പോര്ട്ട് ചെയ്തു.

ഇറാന്റെ ജീവനാഡിയായ പ്രധാന എണ്ണ കയറ്റുമതി കേന്ദ്രമായ ഖാര്ഗ് ദ്വീപിന് സമീപം തങ്ങളുടെ മൂന്ന് എണ്ണ ടാങ്കറുകള് യുഎസ് വ്യോമാക്രമണത്തില് തകര്ത്തതാണ് പുതിയ പ്രകോപനത്തിന് വഴിവെച്ചത്. ഇറാന്റെ സമുദ്ര വ്യാപാരത്തെ തടസ്സപ്പെടുത്തുന്ന യുഎസ് ആക്രമണങ്ങള് വ്യക്തമായ അന്താരാഷ്ട്ര നിയമലംഘനവും കൊടിയ യുദ്ധക്കുറ്റവുമാണെന്ന് ഇറാന്റെ വിദേശകാര്യ മന്ത്രാലയം പ്രസ്താവിച്ചു. രാജ്യത്തിന് മേലുള്ള നാവിക ഉപരോധം അടിയന്തരമായി അവസാനിപ്പിച്ചില്ലെങ്കില് യുഎസ് പടക്കപ്പലുകള്ക്ക് നേരെ ഇനിയുണ്ടാകുന്ന തിരിച്ചടികള് സങ്കല്പ്പിക്കാനാവാത്ത വിധം കഠിനമായിരിക്കുമെന്നും ആക്രമണങ്ങളുടെ വ്യാപ്തി വ്യാപിപ്പിക്കുമെന്നും ഇറാന്റെ സംയുക്ത സൈനിക നേതൃത്വം മുന്നറിയിപ്പ് നല്കി.

ഇറാന്റെ ഭാഗത്തുനിന്നുള്ള ഭീഷണികള്ക്ക് പിന്നാലെ രൂക്ഷമായ ഭാഷയിലാണ് വാഷിംഗ്ടണ് പ്രതികരിച്ചത്. അമേരിക്കന് നാവികസേനയുടെ പടക്കപ്പലുകള്ക്ക് നേരെ വീണ്ടും ആക്രമണമുണ്ടായാല് ഇറാന്റെ മുഴുവന് വാണിജ്യ എണ്ണക്കപ്പലുകളും തകര്ത്തു തരിപ്പണമാക്കുമെന്ന് യുഎസ് പ്രതിരോധ സെക്രട്ടറി പീറ്റ് ഹെഗ് സേത്ത് വ്യക്തമാക്കി. അന്താരാഷ്ട്ര സമുദ്ര അതിര്ത്തിയില് യുഎസ് പടക്കപ്പലുകളെ ലക്ഷ്യമിടുന്നത് അവസാനിപ്പിക്കാന് ഇറാന് തയ്യാറാകണമെന്നും, അല്ലാത്തപക്ഷം അവരുടെ സമ്പദ്വ്യവസ്ഥയെ തന്നെ തകര്ക്കുന്ന രീതിയില് എണ്ണ ടാങ്കര് ശൃംഖലയെ പൂര്ണ്ണമായും കടലില് മുക്കുമെന്നും ഹെഗ് സേത്ത് സാമൂഹിക മാധ്യമങ്ങളിലൂടെ അന്ത്യശാസനം നല്കി. രണ്ടു യുഎസ് കപ്പലുകളെ ആക്രമിച്ചാല് പകരം മൂന്ന് ഇറാനിയന് എണ്ണക്കപ്പലുകള് തകര്ക്കുമെന്ന യുഎസ് സെന്ട്രല് കമാന്ഡിന്റെ (സെന്റ്കോം) നിലപാട് ഹെഗ് സേത്ത് അടിവരയിട്ടു.

ആഗോള എണ്ണ വ്യാപാരത്തിന്റെ അഞ്ചിലൊന്ന് കടന്നുപോകുന്ന ഹോര്മുസ് കടലിടുക്കും പേര്ഷ്യന് ഗള്ഫും കേന്ദ്രീകരിച്ച് സൈനിക നടപടികള് വ്യാപിക്കുന്നത് അന്താരാഷ്ട്ര വിപണിയില് വന് ആശങ്ക പടര്ത്തിയിട്ടുണ്ട്. ഇതോടെ അസംസ്കൃത എണ്ണവില അന്താരാഷ്ട്ര വിപണിയില് കുതിച്ചുയരുകയാണ്. ഖാര്ഗ് ദ്വീപിലെ എണ്ണ സംഭരണ കേന്ദ്രങ്ങള് നേരിട്ട് ആക്രമിക്കപ്പെടുന്ന സാഹചര്യമുണ്ടായാല് സ്ഥിതിഗതികള് കൈവിട്ടുപോകുമെന്നും, ഇത് ആഗോളതലത്തില് വന് സാമ്പത്തിക-ഊര്ജ്ജ പ്രതിസന്ധിക്ക് കാരണമാകുമെന്നും പ്രതിരോധ വിദഗ്ധര് വിലയിരുത്തുന്നു.

---------------

Hindusthan Samachar / Roshith K