newdelhi, 06 സെപ്റ്റംബര് (H.S.)

ന്യൂഡൽഹി: ഉത്തരേന്ത്യൻ സംസ്ഥാനങ്ങളിൽ വരും മണിക്കൂറുകളിൽ ശക്തമായ ഇടിമിന്നലോടുകൂടിയ കനത്ത മഴയ്ക്കും അതിശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ (ഐഎംഡി) മുന്നറിയിപ്പ്. ദേശീയ തലസ്ഥാനമായ ഡൽഹിക്ക് പുറമെ ഉത്തർപ്രദേശ്, ബിഹാർ, രാജസ്ഥാൻ, ഹരിയാന, ഉത്തരാഖണ്ഡ്, പഞ്ചാബ്, ഹിമാചൽ പ്രദേശ്, ജമ്മു കശ്മീർ, പശ്ചിമ ബംഗാൾ, ഒഡീഷ, ഝാർഖണ്ഡ്, മധ്യപ്രദേശ്, ഛത്തീസ്ഗഢ് എന്നീ സംസ്ഥാനങ്ങളിലാണ് കാലാവസ്ഥാ വകുപ്പ് പ്രതികൂല കാലാവസ്ഥാ മുന്നറിയിപ്പ് നൽകിയിരിക്കുന്നത്. മണിക്കൂറിൽ 60 മുതൽ 65 കിലോമീറ്റർ വരെ വേഗതയിൽ ശക്തമായ കാറ്റ് വീശാൻ സാധ്യതയുള്ളതിനാൽ ജനങ്ങൾ അതീവ ജാഗ്രത പാലിക്കണമെന്ന് നിർദേശമുണ്ട്.

വടക്കുപടിഞ്ഞാറൻ മധ്യപ്രദേശിനും തെക്കുപടിഞ്ഞാറൻ ഉത്തർപ്രദേശിനും മുകളിലായി രൂപംകൊണ്ട ന്യൂനമർദ്ദമാണ് ഇപ്പോഴത്തെ ശക്തമായ കാലാവസ്ഥാ വ്യതിയാനത്തിന് കാരണം. ഇതിന്റെ സ്വാധീനഫലമായി കിഴക്കൻ രാജസ്ഥാനിലും പടിഞ്ഞാറൻ മധ്യപ്രദേശിലും പടിഞ്ഞാറൻ ഹിമാലയൻ മേഖലകളിലും അതിശക്തമായ മഴ ലഭിക്കുമെന്നാണ് വിലയിരുത്തൽ. തുടർച്ചയായ കനത്ത മഴയും ആലിപ്പഴ വീഴ്ചയും കാറ്റും വിളവെടുപ്പിന് പാകമായ കാർഷിക വിളകൾക്ക് വലിയ നാശനഷ്ടം വരുത്തിവെക്കുമെന്ന ആശങ്ക ശക്തമാണ്. താഴ്ന്ന പ്രദേശങ്ങളിലും അപകടസാധ്യതയുള്ള മേഖലകളിലും താമസിക്കുന്നവരോട് സുരക്ഷിത സ്ഥാനങ്ങളിലേക്ക് മാറാനും നിർദേശമുണ്ട്.

ഡൽഹിയിൽ വൈകുന്നേരത്തോടെ ഇടിമിന്നലോടും മണിക്കൂറിൽ 30 മുതൽ 40 കിലോമീറ്റർ വരെ വേഗതയുള്ള കാറ്റോടും കൂടിയ കനത്ത മഴയ്ക്ക് സാധ്യതയുണ്ട്. ഉത്തർപ്രദേശിലെ ഗാസിയാബാദ്, മീററ്റ്, ഗൗതം ബുദ്ധ നഗർ, ലഖ്നൗ, പ്രയാഗ്രാജ് തുടങ്ങിയ നഗരങ്ങളിലും കനത്ത മഴ ലഭിക്കും. ബിഹാറിലെ പട്ന, ഗയ, പൂർണിയ തുടങ്ങിയ ജില്ലകളിൽ മണിക്കൂറിൽ 70 കിലോമീറ്റർ വരെ വേഗതയിൽ വീശിയടിക്കുന്ന ചുഴലിക്കാറ്റിനും അതിതീവ്ര മഴയ്ക്കും സാധ്യതയുണ്ടെന്നാണ് മുന്നറിയിപ്പ്. ഇത് മരങ്ങൾ കടപുഴകി വീഴുന്നതിനും താൽക്കാലിക നിർമിതികൾ തകരുന്നതിനും കാരണമായേക്കാം.

മലയോര മേഖലകളായ ഉത്തരാഖണ്ഡ്, ഹിമാചൽ പ്രദേശ്, ജമ്മു കശ്മീർ എന്നിവിടങ്ങളിൽ കനത്ത മഴയെത്തുടർന്ന് മണ്ണിടിച്ചിലിനും മലവെള്ളപ്പാച്ചിലിനും സാധ്യതയുള്ളതിനാൽ റോഡ് ഗതാഗതം തടസ്സപ്പെടാൻ സാധ്യതയുണ്ട്. വടക്കൻ, കിഴക്കൻ ഇന്ത്യൻ നദികളിലെ ജലനിരപ്പ് അപകടകരമായ രീതിയിൽ ഉയരുന്നതും അധികൃതർ നിരീക്ഷിച്ചുവരികയാണ്. മോശം കാലാവസ്ഥയുള്ള സമയങ്ങളിൽ തുറസ്സായ സ്ഥലങ്ങളിൽ നിൽക്കുന്നതും മരങ്ങളുടെ ചുവട്ടിൽ അഭയം തേടുന്നതും പൂർണമായും ഒഴിവാക്കണമെന്നും, പ്രാദേശിക ദുരന്തനിവാരണ അതോറിറ്റിയുടെ നിർദേശങ്ങൾ കർശനമായി പാലിക്കണമെന്നും കാലാവസ്ഥാ വകുപ്പ് മുന്നറിയിപ്പ് നൽകി.

---------------

Hindusthan Samachar / Roshith K