lahor, 06 സെപ്റ്റംബര് (H.S.)

ലാഹോർ: അയൽരാജ്യങ്ങളിൽ നിന്നുള്ളതിനേക്കാൾ വലിയ സുരക്ഷാ ഭീഷണിയാണ് പാകിസ്താനിലെ പഞ്ചാബ് പ്രവിശ്യ സ്വന്തം അയൽ പ്രവിശ്യകളിൽ നിന്ന് നേരിടുന്നതെന്ന് പഞ്ചാബ് മുഖ്യമന്ത്രിയും മുൻ പ്രധാനമന്ത്രി നവാസ് ഷെരീഫിന്റെ മകളുമായ മറിയം നവാസ്. ലാഹോറിൽ സംഘടിപ്പിച്ച ഒരു പരിപാടിയിൽ സംസാരിക്കവെയായിരുന്നു അവരുടെ വിവാദ പരാമർശം. ഇന്ത്യയുൾപ്പെടെയുള്ള അയൽരാജ്യങ്ങളുമായി പഞ്ചാബ് അതിർത്തി പങ്കിടുന്നുണ്ടെങ്കിലും, ആഭ്യന്തര പ്രവിശ്യാ അതിർത്തികളിലൂടെയാണ് തീവ്രവാദം പഞ്ചാബിലേക്ക് കടക്കുന്നതെന്നാണ് മറിയം നവാസ് ആരോപിച്ചത്.

'ഭീഷണി പ്രവിശ്യാ അതിർത്തികളിൽ നിന്ന്'

സംസ്ഥാനത്തിന്റെ അതിർത്തികൾ വഴിയാണ് ഭീകരവാദം പഞ്ചാബിലേക്ക് കടന്നുകയറുന്നത്. 13 കോടി ജനസംഖ്യയുള്ള പഞ്ചാബ് നേരിടുന്ന ഏറ്റവും നിർഭാഗ്യകരമായ കാര്യം, അയൽരാജ്യങ്ങളിൽ നിന്നുള്ളതിനേക്കാൾ വലിയ ഭീഷണിയാണ് തൊട്ടടുത്തുള്ള സ്വന്തം പ്രവിശ്യകളിൽ നിന്ന് ഞങ്ങൾ നേരിടുന്നത് എന്നതാണ്, മറിയം നവാസ് പറഞ്ഞു. ഖൈബർ പഖ്തൂൺഖ്വ പ്രവിശ്യയെ പ്രധാനമായും ലക്ഷ്യമിട്ടായിരുന്നു അവരുടെ പരാമർശങ്ങൾ. എല്ലാവരുടെയും ശ്രദ്ധ പഞ്ചാബിലാണെന്നും എന്നാൽ ദൈവാധീനത്താൽ പഞ്ചാബ് സുരക്ഷിതമായി തുടരുന്നുവെന്നും അവർ കൂട്ടിച്ചേർത്തു.

അതിരൂക്ഷമായ രാഷ്ട്രീയ പ്രതിഷേധം

മറിയം നവാസിന്റെ പ്രസ്താവനയ്ക്കെതിരെ പാകിസ്താൻ തെഹ്രീകെ ഇൻസാഫ് (പി.ടി.ഐ) പാർട്ടി ശക്തമായി രംഗത്തെത്തി. ഖൈബർ പഖ്തൂൺഖ്വയിലെ ജനങ്ങളെയും രക്തസാക്ഷികളെയും അപമാനിക്കുന്നതാണ് മുഖ്യമന്ത്രിയുടെ വാക്കുകളെന്ന് മുൻ ദേശീയ അസംബ്ലി സ്പീക്കറും മുതിർന്ന പി.ടി.ഐ നേതാവുമായ അസദ് ഖൈസർ തുറന്നടിച്ചു. ഫെഡറൽ സർക്കാരുകളുടെ പരാജയപ്പെട്ട നയങ്ങളുടെ തിക്തഫലമാണ് ഖൈബർ പഖ്തൂൺഖ്വയിലെ ജനങ്ങൾ അനുഭവിക്കുന്നതെന്നും, ഭീകരവാദത്തിനെതിരായ പോരാട്ടത്തിൽ അവിടത്തെ പോലീസും ജനങ്ങളും സമാനതകളില്ലാത്ത ത്യാഗങ്ങളാണ് ചെയ്തിട്ടുള്ളതെന്നും അദ്ദേഹം ഓർമ്മിപ്പിച്ചു. അവരുടെ ത്യാഗങ്ങളെ മാനിക്കുന്നതിന് പകരം പരിഹസിക്കുന്നത് ലജ്ജാകരമാണെന്നും അദ്ദേഹം വ്യക്തമാക്കി.

'തീവ്രവാദം ഉണ്ടാക്കിയത് പഞ്ചാബി വരേണ്യവർഗം'

നാഷണൽ ഡെമോക്രാറ്റിക് മൂവ്മെന്റ് (എൻ.ഡി.എം) പ്രസിഡന്റും മുൻ പാർലമെന്റേറിയനുമായ മൊഹ്സിൻ ദാവറും മറിയം നവാസിനെതിരെ കടുത്ത വിമർശനമുന്നയിച്ചു. പഞ്ചാബ് ഇന്ന് ഭീഷണിയായി കാണുന്ന ഭീകരവാദം യഥാർത്ഥത്തിൽ പഞ്ചാബി വരേണ്യവർഗം തന്നെ സൃഷ്ടിച്ചതാണെന്ന് അദ്ദേഹം ആരോപിച്ചു. ഇപ്പോൾ മാത്രമാണ് നിങ്ങൾക്ക് അതിന്റെ ചൂട് അനുഭവപ്പെടുന്നത്, എന്നാൽ പതിറ്റാണ്ടുകളായി ഞങ്ങൾ ഇതിൽ വെന്തുരുകുകയാണ്, എന്ന് ദാവർ തുറന്നടിച്ചു.

ബലൂചിസ്ഥാനിലും ഖൈബർ പഖ്തൂൺഖ്വയിലും ഭീകരാക്രമണങ്ങൾ വർധിച്ചുവരുന്ന പശ്ചാത്തലത്തിൽ, പ്രവിശ്യകൾ തമ്മിലുള്ള വിവേചനവും അസ്വാരസ്യങ്ങളും ആളിക്കത്തിക്കാൻ മറിയം നവാസിന്റെ പ്രസ്താവന വഴിവെക്കുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.

---------------

Hindusthan Samachar / Roshith K