Newdelhi, 07 സെപ്റ്റംബര് (H.S.)

ന്യൂഡൽഹി: സംസ്ഥാന കോൺഗ്രസ് നേതൃത്വത്തിൽ അനിശ്ചിതത്വങ്ങൾക്ക് വിരാമമിട്ട് എത്രയും വേഗം മുഴുവൻ സമയ കെപിസിസി അധ്യക്ഷനെ നിയമിക്കണമെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധിയോട് ആവശ്യപ്പെട്ട് പ്രതിപക്ഷ നേതാവ് വി.ഡി. സതീശൻ. ഡൽഹിയിൽ രാഹുൽ ഗാന്ധിയുടെ വസതിയിൽ വെച്ച് നടന്ന നിർണായക കൂടിക്കാഴ്ചയിലാണ് സംസ്ഥാനത്തെ രാഷ്ട്രീയ സാഹചര്യങ്ങളും സംഘടനാ തലത്തിലെ അടിയന്തര ആവശ്യങ്ങളും സതീശൻ ഹൈക്കമാൻഡിന് മുന്നിൽ വെച്ചത്. ഏറെ നേരം നീണ്ടുനിന്ന കൂടിക്കാഴ്ചയ്ക്കു ശേഷം വിഷയം ഗൗരവമായി പരിഗണിക്കുമെന്നും തീരുമാനം അധികം വൈകില്ലെന്നും രാഹുൽ ഗാന്ധി ഉറപ്പുനൽകിയതായാണ് വിവരം.

സംസ്ഥാനത്ത് നിയമസഭാ തെരഞ്ഞെടുപ്പും തദ്ദേശ തെരഞ്ഞെടുപ്പുകളും അടക്കമുള്ള സുപ്രധാന രാഷ്ട്രീയ പോരാട്ടങ്ങൾ മുന്നിലെത്തി നിൽക്കെ, പാർട്ടിയെ താഴെത്തട്ടിൽ സജീവമായി നയിക്കാൻ പൂർണസമയവും സംഘടനാ പ്രവർത്തനങ്ങളിൽ മുഴുകുന്ന ഒരു അമരക്കാരൻ അനിവാര്യമാണെന്ന ശക്തമായ നിലപാടാണ് വി.ഡി. സതീശൻ രാഹുൽ ഗാന്ധിയെ അറിയിച്ചത്. പാർട്ടി നേതൃത്വത്തിലുള്ള കാലതാമസം അണികളിൽ ആശയക്കുഴപ്പമുണ്ടാക്കുമെന്നും അതിനാൽ പ്രഖ്യാപനം ഒട്ടും നീട്ടിക്കൊണ്ടുപോകരുതെന്നും കൂടിക്കാഴ്ചയിൽ അദ്ദേഹം ചൂണ്ടിക്കാട്ടി.

സംഘടനാപരമായ ഐക്യത്തിനും സുഗമമായ പ്രവർത്തനത്തിനും നിയമസഭാ കക്ഷിയുമായും പ്രതിപക്ഷ നേതൃത്വവുമായും പൂർണമായി സഹകരിച്ചു മുന്നോട്ടുപോകാൻ കഴിയുന്ന ഒരാൾ തന്നെ കെപിസിസി അധ്യക്ഷ പദവിയിൽ എത്തണമെന്ന വ്യക്തമായ രാഷ്ട്രീയ നിലപാടും സതീശൻ ഹൈക്കമാൻഡിന് മുന്നിൽ വെച്ചിട്ടുണ്ട്. സർക്കാരിന്റെ വീഴ്ചകൾ ജനങ്ങളിലെത്തിക്കുന്നതിലും പ്രതിപക്ഷത്തിന്റെ മുന്നേറ്റങ്ങൾക്ക് ശക്തമായ പിന്തുണ നൽകുന്നതിലും കെപിസിസി നേതൃത്വവും പാർലമെന്ററി പാർട്ടിയും തമ്മിലുള്ള ഒത്തിണക്കം നിർണായകമാണ്. പാർട്ടിയിലും മുന്നണിയിലും ആഭ്യന്തര തർക്കങ്ങൾക്ക് ഇടനൽകാതെ എല്ലാവരെയും ഒരുമിച്ചു കൊണ്ടുപോകാൻ പ്രാപ്തിയുള്ള സമവായ വ്യക്തിത്വമായിരിക്കണം പുതിയ അധ്യക്ഷൻ എന്ന അഭിപ്രായമാണ് അദ്ദേഹം പങ്കുവെച്ചത്.

നിലവിൽ പരിഗണനയിലുള്ള വിവിധ നേതാക്കളുടെ പേരുകളും സംസ്ഥാനത്തെ സാമുദായിക സമവാക്യങ്ങളും കൂടിക്കാഴ്ചയിൽ വിശദമായി ചർച്ചയായതായാണ് സൂചന. പാർട്ടി ഘടനയിൽ പുതിയ ഊർജം നിറയ്ക്കാൻ കഴിയുന്ന നേതൃമാറ്റം വേണമെന്നാണ് എഐസിസിയുടെയും താല്പര്യം. വി.ഡി. സതീശൻ ഉന്നയിച്ച വിഷയങ്ങൾ എഐസിസി അധ്യക്ഷൻ മല്ലികാർജുൻ ഖർഗെയുമായും കേരളത്തിന്റെ ചുമതലയുള്ള എഐസിസി ജനറൽ സെക്രട്ടറിയുമായും ചർച്ച ചെയ്യുമെന്ന് രാഹുൽ ഗാന്ധി അറിയിച്ചിട്ടുണ്ട്.

കൂടിക്കാഴ്ച പൂർത്തിയായതോടെ കേരളത്തിലെ കോൺഗ്രസ് നേതൃമാറ്റവുമായി ബന്ധപ്പെട്ട രാഷ്ട്രീയ ചർച്ചകൾ തലസ്ഥാനത്ത് വീണ്ടും സജീവമായിരിക്കുകയാണ്. ഹൈക്കമാൻഡ് തലത്തിൽ പ്രാഥമിക ധാരണയായ ശേഷം വരും ദിവസങ്ങളിൽ തന്നെ പുതിയ കെപിസിസി അധ്യക്ഷനെ സംബന്ധിച്ച ഔദ്യോഗിക പ്രഖ്യാപനം ഉണ്ടായേക്കുമെന്നാണ് പാർട്ടി വൃത്തങ്ങൾ നൽകുന്ന സൂചന.

---------------

Hindusthan Samachar / Roshith K