Bengaluru , 09 സെപ്റ്റംബര് (H.S.)

ബെംഗളൂരു: ഏറെ കോളിളക്കം സൃഷ്ടിച്ച ശബരിമല സ്വർണക്കൊള്ള കേസിലെ ഒന്നാം പ്രതി ഉണ്ണികൃഷ്ണൻ പോറ്റിക്ക് ബെംഗളൂരുവിലെ അയ്യപ്പക്ഷേത്രത്തിൽ സ്വീകരണം നൽകിയത് വിവാദമാകുന്നു. ബെംഗളൂരു ശ്രീരാമപുര അയ്യപ്പക്ഷേത്രത്തിലാണ് പ്രതിക്ക് സ്വീകരണമൊരുക്കിയത്. അതീവ ഗൗരവമുള്ള സാമ്പത്തിക തട്ടിപ്പ് കേസിലെ മുഖ്യപ്രതിക്ക് ഒരു ആരാധനാലയത്തിൽ വെച്ചുതന്നെ പരസ്യമായി ആദരവ് നൽകിയത് വിശ്വാസികൾക്കിടയിലും നിയമവൃത്തങ്ങളിലും കടുത്ത അമർഷത്തിന് കാരണമായിട്ടുണ്ട്.

കർശന ജാമ്യ വ്യവസ്ഥകളിൽ കോടതി അനുവദിച്ച താൽക്കാലിക ഇളവിനെ തുടർന്നാണ് ഉണ്ണികൃഷ്ണൻ പോറ്റി ബെംഗളൂരുവിൽ എത്തിയത്. കുടുംബപരമായ പൂജാകർമ്മങ്ങളിലും പ്രാർത്ഥനകളിലും പങ്കെടുക്കുന്നതിനായി ഇരുപത് ദിവസത്തെ ഇളവാണ് കോടതി ഇയാൾക്ക് അനുവദിച്ചത്. ഈ ദിവസങ്ങളിൽ കർശന നിരീക്ഷണങ്ങളോടെ പ്രാർത്ഥനകളിൽ മാത്രം ശ്രദ്ധ കേന്ദ്രീകരിക്കേണ്ട പ്രതി, പരസ്യമായി സ്വീകരണം ഏറ്റുവാങ്ങിയതാണ് ഇപ്പോൾ വലിയ ചർച്ചയായി മാറിയിരിക്കുന്നത്.

കഴിഞ്ഞ 13 വർഷമായി ഉണ്ണികൃഷ്ണൻ പോറ്റി ബെംഗളൂരു ശ്രീരാമപുരത്തെ ഫ്ലാറ്റിലാണ് താമസിച്ച് വരുന്നത്. ഇയാൾ താമസിക്കുന്ന ഫ്ലാറ്റിന് തൊട്ടടുത്താണ് സ്വീകരണം നടന്ന ശ്രീരാമപുര അയ്യപ്പക്ഷേത്രം സ്ഥിതി ചെയ്യുന്നത്. വർഷങ്ങളായി പ്രദേശത്തെ ക്ഷേത്രവുമായി അടുത്ത ബന്ധം പുലർത്തിയിരുന്ന പോറ്റി, രാവിലെ ക്ഷേത്രത്തിലെത്തിയപ്പോഴാണ് ഒപ്പമുണ്ടായിരുന്നവരും ക്ഷേത്രവുമായി ബന്ധപ്പെട്ട ചില വ്യക്തികളും ചേർന്ന് മാലയിട്ടും പൊന്നാടയണിയിച്ചും സ്വീകരിച്ചത്. തുടർന്ന് ഇയാൾ ക്ഷേത്രത്തിൽ പ്രത്യേക പ്രാർത്ഥനകളും വഴിപാടുകളും നടത്തി മടങ്ങി.

തീർത്ഥാടകരുടെ പവിത്രതയെയും ഭക്തിയെയും ചൂഷണം ചെയ്ത് ക്ഷേത്രസ്വത്ത് അപഹരിച്ച കേസിലെ ഒന്നാം പ്രതിക്കാണ് ഇത്തരത്തിൽ ഭക്തിസാന്ദ്രമായ അന്തരീക്ഷത്തിൽ സ്വീകരണം നൽകിയിരിക്കുന്നത്. വിചാരണാ നടപടികൾ സുപ്രധാന ഘട്ടത്തിലേക്ക് കടക്കാനിരിക്കെ പ്രതി ഇത്തരത്തിൽ പൊതുശ്രദ്ധ നേടുന്നത് നിയമവ്യവസ്ഥയോടുള്ള വെല്ലുവിളിയാണെന്ന ആക്ഷേപം ശക്തമാണ്. ജാമ്യത്തിൽ പുറത്തിറങ്ങിയ പ്രതി നടത്തുന്ന ഇത്തരം പരസ്യ നീക്കങ്ങൾ സാക്ഷികളെ സ്വാധീനിക്കാനോ അന്വേഷണ പുരോഗതിയെ ബാധിക്കാനോ ഇടയാക്കുമെന്ന ആശങ്കയും ഉയരുന്നുണ്ട്. വരും ദിവസങ്ങളിൽ ഈ വിഷയം കോടതിയുടെ ശ്രദ്ധയിൽപ്പെടുത്താനാണ് നിയമവിദഗ്ദ്ധരുടെ ആലോചന.

---------------

Hindusthan Samachar / Roshith K