Enter your Email Address to subscribe to our newsletters
vatican, 25 ഡിസംബര് (H.S.)
തിരുപിറവിയുടെ ഓര്മയില് ലോകം ഇന്ന് ക്രിസ്മസ് ആഘോഷിക്കുന്നു. ദരിദ്രരെയും അപരിചിതരെയും സഹായിക്കണമെന്നും അവരെ തള്ളിക്കളയുന്നത് ദൈവത്തെ തള്ളിക്കളയുന്നതിന് തുല്യമാണെന്നും ഓര്മിപ്പിച്ച് ലിയോ പതിനാലാമന് മാര്പാപ്പ. സെന്റ് പീറ്റേഴ്സ് ബസിലിക്കയില് ക്രിസ്മസ് ദിവ്യബലി അര്പ്പിച്ചുകൊണ്ട് വിശ്വാസികള്ക്ക് സന്ദേശം നല്കുകയായിരുന്നു അദ്ദേഹം. സഹായം ആവശ്യമുള്ളവരെ സഹായിക്കാത്തത് ദൈവത്തെ നിരസിക്കുന്നതിനു തുല്യമാണെന്ന് മാര്പാപ്പ പറഞ്ഞു. യേശുവിന്റെ ജനനത്തിലൂടെ ഓരോ വ്യക്തിയിലുമുള്ള ദൈവസാന്നിധ്യം തെളിയിക്കപ്പെടുന്നുവെന്നും അദ്ദേഹം കൂട്ടിച്ചേര്ത്തു.
സംസ്ഥാനത്തും വിപുലമായ ആഘോഷമാണ് നടക്കുന്നത്. വിവിധ ക്രൈസ്തവ ദേവാലയങ്ങളില് പ്രത്യേക തിരുപ്പിറവി ശുശ്രൂഷകള് നടന്നു. തിരുവനന്തപുരം പട്ടം സെന്റ് മേരീസ് കത്തീഡ്രലില് ക്രിസ്മസ് തിരുക്കര്മങ്ങള്ക്ക് മലങ്കര കത്തോലിക്കാ സഭ മേജര് ആര്ച്ച് ബിഷപ് കര്ദിനാള് മാര് ബസേലിയോസ് ക്ലീമിസ് കാതോലിക്കാ ബാവാ മുഖ്യകാര്മികനായി. പാളയം സെന്റ് ജോസഫ് കത്തീഡ്രലില് നടന്ന തിരുപ്പിറവി ചടങ്ങുകള്ക്ക് തിരുവനന്തപുരം ലത്തീന് അതിരൂപത ആര്ച്ച് ബിഷപ്പ് ഡോ. തോമസ് ജെ. നെറ്റോ നേതൃത്വം നല്കി.
ക്രൈസ്തവ വിശ്വാസികള്ക്ക് എതിരായ ആക്രമണം കൂടിവരികയാണെന്ന് ആര്ച്ച് ബിഷപ്പ് ഡോ. തോമസ് ജെ.നെറ്റോ പറഞ്ഞു. സമാധാനം ആഗ്രഹിക്കുന്നവരാണ് എല്ലാവരും. ക്രിസ്തു ഹൃദയങ്ങളിലാണ് പിറക്കുന്നതെന്നും അദ്ദേഹം പറഞ്ഞു. കൊല്ലം പുനലൂര് ഇടമണ് സെന്റ്മേരീസ് ഓര്ത്തഡോക്സ് ദേവാലയത്തില് നടന്ന ശുശ്രൂഷകള്ക്ക് മലങ്കര മെത്രാപ്പോലീത്ത ബസേലിയോസ് മാര്ത്തോമ മാത്യൂസ് തൃതീയന് കാതോലിക്കാ ബാവ കാര്മികത്വം വഹിച്ചു.
---------------
Hindusthan Samachar / Sreejith S
