Newdelhi , 24 ജനുവരി (H.S.)

ന്യൂഡൽഹി: ഉയർന്ന ലാഭം വാഗ്ദാനം ചെയ്ത് വ്യാജ ഓൺലൈൻ ട്രേഡിംഗ് ആപ്പുകളിലൂടെയും ടെലിഗ്രാം ഗ്രൂപ്പുകളിലൂടെയും കോടിക്കണക്കിന് രൂപ തട്ടിയെടുക്കുന്ന വൻ സംഘത്തെ ഡൽഹി പോലീസ് ക്രൈംബ്രാഞ്ച് പിടികൂടി. ഇന്റർ സ്റ്റേറ്റ് സെൽ (ISC) നടത്തിയ നീക്കത്തിനൊടുവിൽ കൊൽക്കത്തയിൽ നിന്നും ലഖ്‌നൗവിൽ നിന്നുമായി തട്ടിപ്പ് സംഘത്തിലെ പ്രധാനികളായ നാലുപേരെയാണ് അറസ്റ്റ് ചെയ്തത്. രാജ്യത്തുടനീളം 2500-ലധികം പരാതികളിലായി ഏകദേശം 300 കോടി രൂപയുടെ തട്ടിപ്പ് ഇവർ നടത്തിയതായി പോലീസ് വെളിപ്പെടുത്തി.

തട്ടിപ്പിന്റെ രീതി (Modus Operandi)

വാട്‌സ്ആപ്പ്, ഇൻസ്റ്റാഗ്രാം, ഫേസ്ബുക്ക് തുടങ്ങിയ സോഷ്യൽ മീഡിയ പ്ലാറ്റ്‌ഫോമുകളിലൂടെ ആകർഷകമായ പരസ്യങ്ങൾ നൽകിയാണ് ഇവർ ഇരകളെ കണ്ടെത്തുന്നത്. താൽപ്പര്യം പ്രകടിപ്പിക്കുന്നവരെ 'Ventura Securities', 'Go Market Global', 'IPO Stock Trading' എന്നിങ്ങനെ പ്രമുഖ ബ്രോക്കർമാരുടെ പേരിനോട് സാമ്യമുള്ള ടെലിഗ്രാം ഗ്രൂപ്പുകളിൽ ചേർക്കും. തുടർന്ന്, വ്യാജമായി നിർമ്മിച്ച ട്രേഡിംഗ് ആപ്പുകൾ ഡൗൺലോഡ് ചെയ്യാൻ ആവശ്യപ്പെടും. ഈ ആപ്പുകളിൽ കൃത്രിമമായി കാണിക്കുന്ന ഡാഷ്‌ബോർഡുകൾ വഴി നിക്ഷേപകർക്ക് വലിയ ലാഭം ലഭിക്കുന്നതായി തോന്നിപ്പിക്കും.

ആദ്യം ചെറിയ തുക ലാഭമായി നൽകി വിശ്വാസം നേടിയെടുത്ത ശേഷം ഇരകളെക്കൊണ്ട് വലിയ തുകകൾ നിക്ഷേപിപ്പിക്കും. പിന്നീട് നിക്ഷേപം പിൻവലിക്കാൻ ശ്രമിക്കുമ്പോൾ നികുതിയായും ആക്ടിവേഷൻ ചാർജ്ജായും വീണ്ടും പണം ആവശ്യപ്പെടും. ഒടുവിൽ വൻ തുക കൈക്കലാക്കിയ ശേഷം സംഘം മുങ്ങുകയാണ് പതിവ്.

അറസ്റ്റിലായവർ

ബംഗാൾ സ്വദേശിയായ ബിശ്വജിത്ത് മൊണ്ടൽ, ആശിഷ്, രജീബ് ഷാ, തട്ടിപ്പിന്റെ മുഖ്യ സൂത്രധാരന്മാരിൽ ഒരാളായ ശുഭം ശർമ്മ എന്നിവരാണ് പിടിയിലായത്. ഡിസംബർ അവസാനം തുടങ്ങിയ അന്വേഷണം കൊൽക്കത്തയിലെയും ലഖ്‌നൗവിലെയും വിവിധ കേന്ദ്രങ്ങളിലേക്ക് വ്യാപിപ്പിച്ചാണ് പ്രതികളെ കുടുക്കിയത്. ഇവരിൽ നിന്ന് ലാപ്ടോപ്പുകൾ, മൊബൈൽ ഫോണുകൾ, എടിഎം കാർഡുകൾ, സിം കാർഡുകൾ, ചെക്ക് ബുക്കുകൾ എന്നിവ പോലീസ് കണ്ടെടുത്തിട്ടുണ്ട്.

300 കോടിയുടെ വമ്പൻ തട്ടിപ്പ്

പ്രതികളെ ചോദ്യം ചെയ്തതിൽ നിന്നും ഞെട്ടിപ്പിക്കുന്ന വിവരങ്ങളാണ് പുറത്തുവന്നത്. കഴിഞ്ഞ 4-5 വർഷമായി ഇവർ സജീവമാണ്. 105 വ്യാജ കമ്പനികളുടെ പേരിൽ 260-ലധികം ബാങ്ക് അക്കൗണ്ടുകൾ ഇവർ ഉപയോഗിച്ചിരുന്നു. 2567-ലധികം പരാതികൾ ഈ സംഘത്തിനെതിരെ വിവിധ സംസ്ഥാനങ്ങളിൽ നിന്നായി റിപ്പോർട്ട് ചെയ്തിട്ടുണ്ട്. ഈ ശൃംഖല കംബോഡിയ ആസ്ഥാനമായി പ്രവർത്തിക്കുന്ന ഓപ്പറേറ്റർമാരുമായി ബന്ധപ്പെട്ടാണ് ക്രിപ്‌റ്റോ ഇടപാടുകൾ നടത്തിയിരുന്നതെന്ന് രജീബ് ഷാ പോലീസിനോട് വെളിപ്പെടുത്തി.

പോലീസ് മുന്നറിയിപ്പ്

നിയമാനുസൃതമായ ഒരു ബ്രോക്കറും ടെലിഗ്രാം ഗ്രൂപ്പുകൾ വഴിയോ സ്ഥിരീകരിക്കാത്ത ആപ്പുകൾ വഴിയോ മാത്രം ഇടപാടുകൾ നടത്തില്ലെന്ന് ഡൽഹി പോലീസ് ഓർമ്മിപ്പിച്ചു. അപരിചിതമായ ലിങ്കുകളിൽ നിന്നോ സോഷ്യൽ മീഡിയ പരസ്യങ്ങളിൽ നിന്നോ ലഭിക്കുന്ന ട്രേഡിംഗ് വാഗ്ദാനങ്ങളിൽ വീഴരുതെന്നും ജാഗ്രത പാലിക്കണമെന്നും ക്രൈംബ്രാഞ്ച് അറിയിച്ചു. നിലവിൽ അറസ്റ്റിലായവരെ കൂടുതൽ ചോദ്യം ചെയ്യുന്നതിലൂടെ തട്ടിപ്പിലെ കൂടുതൽ കണ്ണിളിലേക്ക് എത്താൻ കഴിയുമെന്നാണ് പോലീസിന്റെ പ്രതീക്ഷ.

---------------

Hindusthan Samachar / Roshith K