Newdelhi , 27 ജനുവരി (H.S.)

ന്യൂഡൽഹി: ഉന്നത വിദ്യാഭ്യാസ മേഖലയിലെ സമത്വവും നീതിയും ഉറപ്പാക്കുന്നതിനായി യുജിസി (University Grants Commission) കൊണ്ടുവന്ന പുതിയ ചട്ടങ്ങൾക്കെതിരെ പ്രതിഷേധം ശക്തമാകുന്നതിനിടെ വിശദീകരണവുമായി കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ രംഗത്തെത്തി. പുതിയ ചട്ടങ്ങൾ വഴി ആർക്കും ഒരുതരത്തിലുള്ള വിവേചനവും നേരിടേണ്ടി വരില്ലെന്നും നിയമം ദുരുപയോഗം ചെയ്യാൻ ആരെയും അനുവദിക്കില്ലെന്നും അദ്ദേഹം വ്യക്തമാക്കി. 'ഉന്നത വിദ്യാഭ്യാസ സ്ഥാപനങ്ങളിലെ സമത്വ പ്രോത്സാഹന ചട്ടങ്ങൾ-2026' (Promotion of Equity in Higher Education Institutions Regulations, 2026) എന്ന പേരിലാണ് പുതിയ ഭേദഗതികൾ പുറത്തിറക്കിയിരിക്കുന്നത്.

പ്രതിഷേധത്തിന് കാരണമെന്ത്?

സർവ്വകലാശാലകളിലും കോളേജുകളിലും പിന്നാക്ക വിഭാഗങ്ങൾ നേരിടുന്ന വിവേചനങ്ങൾ തടയുന്നതിനും പരാതികൾ പരിഹരിക്കുന്നതിനും ഒരു ഘടനാപരമായ സംവിധാനം ഒരുക്കുകയാണ് പുതിയ ചട്ടങ്ങളുടെ ലക്ഷ്യം. എന്നാൽ, ഇതിൽ ജാതി അടിസ്ഥാനത്തിലുള്ള വിവേചനം (Caste-based discrimination) എന്നതിനെ നിർവ്വചിച്ചിരിക്കുന്ന രീതിക്കെതിരെ വിദ്യാർത്ഥികൾക്കും അധ്യാപകർക്കുമിടയിൽ വലിയ പ്രതിഷേധം ഉയർന്നിട്ടുണ്ട്. ജനറൽ കാറ്റഗറിയിലുള്ള വിദ്യാർത്ഥികൾക്ക് എതിരെ പുതിയ ചട്ടങ്ങൾ ദുരുപയോഗം ചെയ്യപ്പെടാൻ സാധ്യതയുണ്ടെന്നാണ് പ്രധാന ആരോപണം.

പ്രധാന നിർദ്ദേശങ്ങൾ

യുജിസിയുടെ പുതിയ നിയമപ്രകാരം ഓരോ ഉന്നത വിദ്യാഭ്യാസ സ്ഥാപനത്തിലും ഒരു 'തുല്യ അവസര കേന്ദ്രം' (Equal Opportunity Centre) സ്ഥാപിക്കണം. ഈ കേന്ദ്രം സിവിൽ സൊസൈറ്റി ഗ്രൂപ്പുകൾ, പോലീസ്, ജില്ലാ ഭരണകൂടം, പ്രാദേശിക മാധ്യമങ്ങൾ എന്നിവയുമായി ചേർന്ന് പ്രവർത്തിക്കും. പിന്നാക്ക വിഭാഗങ്ങളായ ഒബിസി, എസ്‌സി, എസ്‌ടി, ഭിന്നശേഷിക്കാർ, സ്ത്രീകൾ എന്നിവരുടെ പ്രതിനിധികൾ ഉൾപ്പെടുന്ന സമിതിയായിരിക്കും ഇത് നിയന്ത്രിക്കുക. പിന്നാക്ക വിഭാഗങ്ങളിൽപ്പെട്ട കുട്ടികൾക്ക് സാമ്പത്തികവും അക്കാദമികവുമായ സഹായം നൽകുന്നതിനൊപ്പം നിയമസഹായം ഉറപ്പാക്കാനും ഈ കേന്ദ്രം പ്രവർത്തിക്കും.

സാമൂഹ്യ മാധ്യമങ്ങളിലെ പ്രതിഷേധം

പുതിയ ചട്ടങ്ങൾക്കെതിരെ സോഷ്യൽ മീഡിയ പ്ലാറ്റ്‌ഫോമായ എക്സിൽ (X) #ShameonUGC എന്ന ഹാഷ്‌ടാഗ് ട്രെൻഡിംഗാണ്. ജനറൽ കാറ്റഗറിയിലുള്ള വിദ്യാർത്ഥികളെ പ്രതിക്കൂട്ടിലാക്കുന്ന രീതിയിലാണ് ചട്ടങ്ങൾ വിഭാവനം ചെയ്തിരിക്കുന്നതെന്ന് പലരും ആരോപിക്കുന്നു. മെറിറ്റ് അവഗണിക്കപ്പെടുമെന്നും ക്യാമ്പസുകൾ ജാതി പോരാട്ടങ്ങളുടെ വേദിയായി മാറുമെന്നും പ്രതിഷേധക്കാർ ആശങ്കപ്പെടുന്നു. പ്രതിഷേധത്തിന്റെ ഭാഗമായി ഡൽഹിയിലെ യുജിസി ആസ്ഥാനത്തിന് മുന്നിൽ വിദ്യാർത്ഥികൾ പ്രക്ഷോഭം പ്രഖ്യാപിച്ചിട്ടുണ്ട്.

രാജി വെച്ച് ഉദ്യോഗസ്ഥർ

പുതിയ പോളിസിയോട് വിയോജിപ്പ് പ്രകടിപ്പിച്ച് ഒരു മുതിർന്ന ബ്യൂറോക്രാറ്റും ബിജെപിയുടെ യുവജന വിഭാഗം നേതാവും ഇതിനകം രാജിവെച്ചിട്ടുണ്ട്. വിഷയം രാഷ്ട്രീയമായും വലിയ ചർച്ചകൾക്ക് വഴിവെച്ചിരിക്കുകയാണ്. എന്നാൽ, പരാതി പരിഹാരത്തിന് സുതാര്യമായ സംവിധാനം ഒരുക്കുക മാത്രമാണ് ലക്ഷ്യമെന്നും ആരെയും അന്യായമായി ക്രൂശിക്കില്ലെന്നുമാണ് കേന്ദ്ര സർക്കാർ നൽകുന്ന ഉറപ്പ്. വരും ദിവസങ്ങളിൽ വിദ്യാർത്ഥി സംഘടനകളുമായി സർക്കാർ ചർച്ച നടത്തുമോ എന്നത് നിർണ്ണായകമാണ്.

---------------

Hindusthan Samachar / Roshith K