Enter your Email Address to subscribe to our newsletters
Mumbai, 28 ജനുവരി (H.S.)
ബാരാമതിയില് മഹാരാഷ്ട്ര ഉപമുഖ്യമന്ത്രി കൊല്ലപ്പെട്ട വിമാനാപകടത്തിന് കാരണം കാഴ്ചപരിധി കുറഞ്ഞതാണെന്ന് ഡയറക്ടര് ജനറല് ഓഫ് സിവില് ഏവിയേഷന്. വിമാനം ലാന്ഡ് ചെയ്യാന് ശ്രമിക്കുമ്പോള് റണ്വേ കൃത്യമായി കാണാതിരുന്നതാണ് അപകടത്തിനിടയാക്കിയതെന്നാണ് ഡി.ജി.സി.എ വ്യക്തമാക്കിയത്. ആദ്യ തവണ ലാന്ഡ് ചെയ്യാന് ശ്രമിച്ചപ്പോഴും റണ്വേ കൃത്യമായി കണ്ടിരുന്നില്ല.
തുടര്ന്ന് വീണ്ടും ലാന്ഡ് ചെയ്യാന് ശ്രമിക്കുന്നതിനിടെ വിമാനത്തിന് തീപിടിക്കുകയായിരുന്നു. വിമാനം അപകടത്തില്പ്പെടുന്നതിന് മുമ്പ് മെയ് ഡേ കോള് വന്നിട്ടില്ലെന്നും ഡി.ജി.സി.എ വ്യക്തമാക്കി. കാഴ്ചപരിധി കുറഞ്ഞതാണ് വിമാനഅപകടത്തിനുള്ള കാരണമെന്ന് മന്ത്രി റാം മോഹന് നായിഡുവും പറഞ്ഞു. രണ്ടാം തവണ ലാന്ഡിങ്ങിന് ശ്രമിക്കുമ്പോള് കാഴ്ചപരിധിയില് പ്രശ്നങ്ങളൊന്നുമില്ലെന്ന് വിമാനത്തിലെ ജീവനക്കാര് അറിയിച്ചിരുന്നു. തുടര്ന്ന് രണ്ടാമതും ലാന്ഡിങ്ങിന് ശ്രമിക്കവെയാണ് അപകടമുണ്ടായതെന്ന് മന്ത്രി പറഞ്ഞു.
ഇന്ന് രാവിലെയാണ് മഹാരാഷ്ട്ര ഉപമുഖ്യമന്ത്രി അജിത് പവാര് സഞ്ചരിച്ചിരുന്ന വിമാനം തകര്ന്നത് അടിയന്തര ലാന്ഡിങ് നടത്തുന്നതിനിടെയാണ്. ബാരാമതിയിലെ വിമാനത്താവളത്തിലായിരുന്നു അപകടമുണ്ടായത്. അജിത് പവാര് സഞ്ചരിച്ചിരുന്ന പ്രൈവറ്റ് ജെറ്റ് വിമാനം നിയന്ത്രണം നഷ്ടപ്പെട്ട് തകര്ന്നുവീഴുകയായിരുന്നു. അപകടത്തിന് പിന്നാലെ വിമാനത്തിന് തീപിടിച്ചു.
വിമാനത്തില് അജിത് പവാറിന് പുറമെ പിഎസ്ഒയും ഒരു അറ്റന്ഡന്റും രണ്ട് ക്രൂ അംഗങ്ങളുമാണ് ഉണ്ടായിരുന്നത്. എല്ലാവരും അപകടസ്ഥലത്ത് വച്ച് തന്നെ മരിച്ചു. അജിത് പവാര് ഉള്പ്പെടെയുള്ളവരെ സമീപത്തെ സര്ക്കാര് ആശുപത്രിയിലേക്ക് എത്തിച്ചെങ്കിലും മരണം സ്ഥിരീകരിക്കുകയായിരുന്നു.
രാവിലെ 8 മണിക്കാണ് അജിത് പവാര് മുംബൈയില് നിന്ന് പുറപ്പെട്ടത്. തുടര്ന്ന് 8.45 നും 9നും ഇടയിലായിരുന്നു അപകടം.അടിയന്തര ലാന്ഡിങിന് ശ്രമിക്കുന്നതിനിടെ വിമാനം തകരുകയും പല കഷ്ണങ്ങളായി പിളരുകയുമായിരുന്നു. പിന്നാലെ തീയിപിടിച്ചു. സംബവ സ്ഥലത്തു നിന്നും പുറത്തു വന്ന ദൃശ്യങ്ങള് അപകടത്തിന്റെ തീവ്രത വ്യക്തമാക്കുന്നതാണ്. എല് & എസ് ഏവിയേഷന്റെ പ്രൈവറ്റ് ബിസിനസ് ക്ലാസ് ജെറ്റ് വിമാനമാണ് അപകടത്തില്പ്പെട്ടത്.
---------------
Hindusthan Samachar / Sreejith S
