Mumbai , 30 ജനുവരി (H.S.)

മുംബൈ: മഹാരാഷ്ട്ര ഉപമുഖ്യമന്ത്രിയായിരുന്ന അജിത് പവാറിന്റെ അപ്രതീക്ഷിത വിയോഗത്തിന് പിന്നാലെ നിർണ്ണായക വെളിപ്പെടുത്തലുമായി അദ്ദേഹത്തിന്റെ അടുത്ത അനുയായി കിരൺ ഗുജാർ രംഗത്ത്. ബുധനാഴ്ചയുണ്ടായ ദാരുണമായ വിമാനാപകടത്തിന് ദിവസങ്ങൾക്ക് മുൻപ് തന്നെ നാഷണലിസ്റ്റ് കോൺഗ്രസ് പാർട്ടിയിലെ (എൻസിപി) രണ്ട് വിഭാഗങ്ങളെയും യോജിപ്പിക്കാൻ അജിത് പവാർ പൂർണ്ണമായും സജ്ജനായിരുന്നെന്നാണ് വെളിപ്പെടുത്തൽ. ലയനത്തിനുള്ള നടപടിക്രമങ്ങളെല്ലാം പൂർത്തിയായിരുന്നുവെന്നും ഏതാനും ദിവസങ്ങൾക്കുള്ളിൽ തന്നെ ഔദ്യോഗിക പ്രഖ്യാപനം ഉണ്ടാകുമായിരുന്നുവെന്നും കിരൺ ഗുജാർ പറഞ്ഞു.

1980-കളുടെ പകുതി മുതൽ അജിത് പവാറിനൊപ്പമുള്ള കിരൺ ഗുജാർ, അപകടത്തിന് അഞ്ച് ദിവസം മുമ്പ് അജിത് പവാർ തന്നോട് ഇക്കാര്യം സംസാരിച്ചിരുന്നതായി പി.ടി.ഐയോട് വെളിപ്പെടുത്തി. രണ്ട് വിഭാഗങ്ങളെയും ലയിപ്പിക്കാൻ അദ്ദേഹം നൂറ് ശതമാനം താൽപ്പര്യപ്പെട്ടിരുന്നു. എല്ലാ നടപടികളും പൂർത്തിയായെന്നും വരും ദിവസങ്ങളിൽ ലയനം നടക്കുമെന്നും അദ്ദേഹം എന്നോട് പറഞ്ഞു, ഗുജാർ വ്യക്തമാക്കി.

ശരദ് പവാറുമായി പോസിറ്റീവ് ചർച്ചകൾ

ലയന കാര്യത്തിൽ ശരദ് പവാർ, സുപ്രിയ സുലെ എന്നിവരുൾപ്പെടെയുള്ള മുതിർന്ന നേതാക്കളുമായി അജിത് പവാർ ചർച്ചകൾ നടത്തിവരികയായിരുന്നു. ഈ ചർച്ചകൾ വളരെ അനുകൂലമായ ദിശയിലായിരുന്നു മുന്നോട്ടുപോയിരുന്നത്. ശരദ് പവാറിന്റെ ആരോഗ്യസ്ഥിതി മോശമാകുന്നതിന് മുൻപ് തന്നെ ലയനം പൂർത്തിയാക്കണമെന്ന് അജിത് പവാർ ആഗ്രഹിച്ചിരുന്നു. അടുത്തിടെ നടന്ന നഗരസഭാ തിരഞ്ഞെടുപ്പുകളിൽ ഇരു വിഭാഗങ്ങളും സഖ്യമായാണ് മത്സരിച്ചത്. ഇതിനുശേഷം വരാനിരിക്കുന്ന ജില്ലാ പരിഷത്ത് തിരഞ്ഞെടുപ്പുകളിലും ഈ ഐക്യം തുടരാൻ തീരുമാനിച്ചിരുന്നു. ഏകീകൃത പാർട്ടിയുടെ ഭാവി പ്രവർത്തനങ്ങൾക്കായി അജിത് പവാർ കൃത്യമായ ഒരു മാർഗരേഖ തന്നെ തയ്യാറാക്കിയിരുന്നുവെന്നും റിപ്പോർട്ടുകൾ സൂചിപ്പിക്കുന്നു.

അപ്രതീക്ഷിത ദുരന്തം

എല്ലാം ശുഭകരമായി നടക്കാനിരിക്കെയാണ് ഈ വലിയ ദുരന്തം അജിത് ദാദയെ നമ്മിൽ നിന്ന് തട്ടിയെടുത്തത്. ഇപ്പോൾ അദ്ദേഹത്തിന്റെ വിയോഗത്തിന് ശേഷം ബാരാമതിയുടെയും മഹാരാഷ്ട്രയുടെയും വികസനത്തിനായി ഇരു വിഭാഗങ്ങളും ഒന്നിക്കേണ്ടത് കൂടുതൽ അനിവാര്യമായി മാറിയിരിക്കുന്നു, കിരൺ ഗുജാർ കൂട്ടിച്ചേർത്തു.

അജിത് പവാറിന്റെ രാഷ്ട്രീയ യാത്രയെക്കുറിച്ചും ഗുജാർ ഓർമ്മിച്ചു. 1981-ൽ ഛത്രപതി സഹകരണ പഞ്ചസാര മിൽ തിരഞ്ഞെടുപ്പിൽ വിജയിച്ച ശേഷമാണ് അദ്ദേഹം രാഷ്ട്രീയത്തിലേക്ക് ശ്രദ്ധ കേന്ദ്രീകരിച്ചത്. തുടക്കത്തിൽ കൃഷിയിലും കുടുംബത്തിലും ശ്രദ്ധ കേന്ദ്രീകരിക്കാനാണ് അദ്ദേഹം ആഗ്രഹിച്ചതെങ്കിലും, എൺപതുകളുടെ അവസാനം ശരദ് പവാർ മുഖ്യമന്ത്രിയായതോടെ ബാരാമതിയിൽ യുവനേതൃത്വത്തിന്റെ ആവശ്യകത വരികയും അജിത് പവാർ ആ ഉത്തരവാദിത്തം ഏറ്റെടുക്കുകയുമായിരുന്നു. അജിത് പവാറിനെപ്പോലൊരു നേതാവ് ഇനി ഉണ്ടാകില്ലെന്നും വികസന പ്രവർത്തനങ്ങൾ തുടരുമെങ്കിലും അദ്ദേഹത്തിന്റെ വിടവ് നികത്താനാകാത്തതാണെന്നും അനുയായികൾ പറയുന്നു.

അജിത് പവാറിന്റെ മരണശേഷം പാർട്ടിയിൽ ഉണ്ടായേക്കാവുന്ന മാറ്റങ്ങളെക്കുറിച്ചും ലയന സാധ്യതകളെക്കുറിച്ചും ദേശീയ രാഷ്ട്രീയത്തിൽ ഇപ്പോൾ സജീവമായ ചർച്ചകൾ നടക്കുകയാണ്. അദ്ദേഹത്തിന്റെ ഭാര്യ സുനേത്ര പവാറിനെ മന്ത്രിസഭയിൽ ഉൾപ്പെടുത്തണമെന്ന ആവശ്യവും പാർട്ടി പ്രവർത്തകർക്കിടയിൽ ഉയരുന്നുണ്ട്.

---------------

Hindusthan Samachar / Roshith K