Bengaluru , 30 ജനുവരി (H.S.)

ബെംഗളൂരു: പ്രമുഖ ബിൽഡറും കോൺഫിഡന്റ് ഗ്രൂപ്പ് സ്ഥാപകനുമായ സി ജെ റോയ് (57) അന്തരിച്ചു. എൻഫോഴ്‌സ്‌മെന്റ് ഡയറക്ടറേറ്റ് (ഇഡി) ഉദ്യോഗസ്ഥർ അദ്ദേഹത്തിന്റെ ഓഫീസിൽ റെയ്ഡ് നടത്തുന്നതിനിടെ സ്വയം വെടിയുതിർത്താണ് അദ്ദേഹം ജീവനൊടുക്കിയത്. ബെംഗളൂരുവിലെ റിച്ചിമണ്ട് സർക്കിളിന് സമീപമുള്ള കോൺഫിഡന്റ് ഗ്രൂപ്പിന്റെ ഹെഡ് ഓഫീസിൽ വെള്ളിയാഴ്ച രാവിലെയായിരുന്നു നാടകീയമായ സംഭവങ്ങൾ അരങ്ങേറിയത്.

സംഭവം ഇങ്ങനെ:

വെള്ളിയാഴ്ച രാവിലെ മുതൽ സി ജെ റോയിയുടെ ഓഫീസിലും ബെംഗളൂരുവിലെ വസതിയിലും എൻഫോഴ്‌സ്‌മെന്റ് ഡയറക്ടറേറ്റ് ഒരേസമയം പരിശോധന നടത്തിവരികയായിരുന്നു. സാമ്പത്തിക ഇടപാടുകളുമായി ബന്ധപ്പെട്ട വിവരങ്ങൾ ശേഖരിക്കുന്നതിനിടെയാണ് ഓഫീസിനുള്ളിൽ വെച്ച് സി ജെ റോയ് തന്റെ കൈവശമുണ്ടായിരുന്ന തോക്കുപയോഗിച്ച് സ്വയം വെടിയുതിർത്തത്. വെടിയൊച്ച കേട്ട് ഉദ്യോഗസ്ഥരും ജീവനക്കാരും ഓടിയെത്തിയപ്പോൾ അദ്ദേഹം രക്തത്തിൽ കുളിച്ചു കിടക്കുകയായിരുന്നു. ഉടൻ തന്നെ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

അന്വേഷണം തുടരുന്നു:

സംഭവസ്ഥലത്ത് ബെംഗളൂരു പോലീസ് എത്തി ഇൻക്വസ്റ്റ് നടപടികൾ ആരംഭിച്ചു. ഇഡി റെയ്ഡ് നടക്കുന്ന സമയത്ത് ഇത്തരമൊരു കടുത്ത തീരുമാനത്തിലേക്ക് അദ്ദേഹത്തെ നയിച്ച കാരണങ്ങളെക്കുറിച്ച് പോലീസ് അന്വേഷിക്കുന്നുണ്ട്. പരിശോധനയുമായി ബന്ധപ്പെട്ട രേഖകളും വിവരങ്ങളും പോലീസ് ശേഖരിച്ചു വരികയാണ്. കഴിഞ്ഞ കുറച്ചു കാലമായി സി ജെ റോയ് ചില സാമ്പത്തിക കേസുകളുമായി ബന്ധപ്പെട്ട് നിരീക്ഷണത്തിലായിരുന്നു എന്നാണ് റിപ്പോർട്ടുകൾ സൂചിപ്പിക്കുന്നത്.

സി ജെ റോയ് എന്ന വ്യവസായി:

കേരളത്തിലും കർണാടകയിലുമായി പടർന്നു കിടക്കുന്ന കോൺഫിഡന്റ് ഗ്രൂപ്പിന്റെ വളർച്ചയിൽ നിർണ്ണായക പങ്കുവഹിച്ച വ്യക്തിയാണ് സി ജെ റോയ്. റിയൽ എസ്റ്റേറ്റ് മേഖലയ്ക്ക് പുറമെ വിനോദസഞ്ചാരം, ആരോഗ്യം, സിനിമ തുടങ്ങിയ മേഖലകളിലും അദ്ദേഹത്തിന് നിക്ഷേപങ്ങളുണ്ടായിരുന്നു. സിനിമ നിർമ്മാണ രംഗത്തും അദ്ദേഹം സജീവമായിരുന്നു. മലയാളം സിനിമകളുടെ നിർമ്മാണത്തിലും വിതരണത്തിലും കോൺഫിഡന്റ് ഗ്രൂപ്പ് ശ്രദ്ധേയമായ സാന്നിധ്യമായിരുന്നു. കോൺഫിഡന്റ് ഗ്രൂപ്പിന്റെ ഫ്ലാറ്റുകളും വില്ലാ പ്രൊജക്റ്റുകളും കേരളത്തിലെ വിവിധ നഗരങ്ങളിൽ പ്രവർത്തിച്ചുവരുന്നു.

അപ്രതീക്ഷിതമായ ഈ വിയോഗം റിയൽ എസ്റ്റേറ്റ് മേഖലയെയും ബിസിനസ് ലോകത്തെയും ഞെട്ടിച്ചിരിക്കുകയാണ്. അദ്ദേഹത്തിന്റെ കുടുംബാംഗങ്ങളും അടുത്ത സുഹൃത്തുക്കളും ബെംഗളൂരുവിലെത്തിയിട്ടുണ്ട്. മൃതദേഹം പോസ്റ്റ്‌മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുനൽകും.

(ആത്മഹത്യ ഒന്നിനും പരിഹാരമല്ല. അതിജീവിക്കാൻ ശ്രമിക്കുക. ഇത്തരം ചിന്തകളുള്ളപ്പോൾ മാനസികാരോഗ്യ വിദഗ്ധരുടെ സഹായം തേടുക. സംസ്ഥാന സർക്കാരിന്റെ ദിശ ഹെൽപ്പ് ലൈനിൽ വിളിക്കാം: 1056, 0471-2552056)

---------------

Hindusthan Samachar / Roshith K