Thiruvananthapuram , 01 ഒക്റ്റോബര് (H.S.)

തിരുവനന്തപുരം: മന്ത്രിസഭാ പദവി ഉൾപ്പെടെയുള്ള സുപ്രധാന തീരുമാനങ്ങൾ യുഡിഎഫിൽ കൂടിയാലോചിക്കാതെയാണ് നടപ്പാക്കുന്നതെന്നും ഇത്തരം കാര്യങ്ങൾ താൻ മാധ്യമങ്ങളിലൂടെയാണ് അറിയുന്നതെന്നും വ്യക്തമാക്കി യുഡിഎഫ് കൺവീനർ. മുന്നണിയിലെ പ്രധാനപ്പെട്ട രാഷ്ട്രീയ തിരുമാനങ്ങൾ എടുക്കുമ്പോൾ യുഡിഎഫ് കൺവീനർ എന്ന നിലയിൽ തന്നെ അറിയിക്കുകയോ മുന്നണി തലത്തിൽ ആവശ്യമായ ചർച്ചകൾ നടത്തുകയോ ചെയ്യാത്തതിൽ കടുത്ത അതൃപ്തിയും അദ്ദേഹം പരസ്യമായി പ്രകടിപ്പിച്ചു. മാധ്യമങ്ങളോട് സംസാരിക്കവെയാണ് മുന്നണിയിലെ ഏകോപനമില്ലായ്മയെക്കുറിച്ചും ആശയവിനിമയത്തിലെ പോരായ്മകളെക്കുറിച്ചും അദ്ദേഹം തുറന്നുപറഞ്ഞത്.

പുതിയ പദവികളിലേക്ക് തിരഞ്ഞെടുക്കപ്പെട്ട നേതാക്കൾ അതിന് അർഹതയുള്ളവരാണ് എന്ന കാര്യത്തിൽ തർക്കമില്ലെന്ന് വ്യക്തമാക്കിയ അദ്ദേഹം, ആരെയും വ്യക്തിപരമായി തള്ളിപ്പറയാൻ ഉദ്ദേശിക്കുന്നില്ലെന്നും കൂട്ടിച്ചേർത്തു. അർഹതയുടെ അടിസ്ഥാനത്തിൽ തന്നെയാണ് തീരുമാനങ്ങളെങ്കിൽ പോലും ഒരു മുന്നണി എന്ന നിലയിൽ അത്തരം സുപ്രധാന കാര്യങ്ങൾ മുന്നണി വേദിയിൽ ചർച്ച ചെയ്യേണ്ടതായിരുന്നു. ഈ സ്ഥാനങ്ങളിലേക്ക് ആരെ പരിഗണിക്കണം, എപ്പോൾ പ്രഖ്യാപനം ഉണ്ടാകും തുടങ്ങിയ കാര്യങ്ങൾ അന്വേഷിച്ച് പല നേതാക്കളും തന്നെ വിളിച്ചിരുന്നു. എന്നാൽ അപ്പോഴൊന്നും മറുപടി നൽകാൻ തനിക്ക് സാധിച്ചില്ലെന്നും, ഒടുവിൽ കാര്യങ്ങൾ മാധ്യമങ്ങളിലൂടെ വായിച്ചറിയേണ്ടി വന്നത് നിർഭാഗ്യകരവും ദുഃഖകരവുമാണെന്നും അദ്ദേഹം ചൂണ്ടിക്കാട്ടി.

തന്നെ യുഡിഎഫ് കൺവീനർ സ്ഥാനത്തേക്ക് നിയോഗിച്ചത് ഓൾ ഇന്ത്യ കോൺഗ്രസ് കമ്മിറ്റിയാണ് (എഐസിസി). അതിനാൽ തന്നെ മുന്നണിയിലെ ഈ ഏകോപനമില്ലായ്മയെക്കുറിച്ചും കൂടിയാലോചനകൾ നടക്കാത്തതിലുള്ള കടുത്ത അതൃപ്തിയെക്കുറിച്ചും നേരിട്ട് ഹൈക്കമാൻഡിനെ അറിയിക്കുമെന്നും അതിനുള്ള വഴികൾ തേടുമെന്നും അദ്ദേഹം വ്യക്തമാക്കി. അതേസമയം, മുഖ്യമന്ത്രിക്ക് വലിയ തോതിലുള്ള ഔദ്യോഗിക ജോലിത്തിരക്കുകൾ ഉള്ളതിനാൽ അദ്ദേഹത്തെ പൂർണ്ണമായി കുറ്റപ്പെടുത്താൻ ഉദ്ദേശിക്കുന്നില്ലെന്നും എന്നാൽ മുന്നണി സംവിധാനത്തിൽ പാലിക്കേണ്ട സാമാന്യ മര്യാദകൾ ലംഘിക്കപ്പെടുന്നുണ്ടെന്നും അദ്ദേഹം ഓർമ്മിപ്പിച്ചു.

കഴിഞ്ഞ ഉപതിരഞ്ഞെടുപ്പുകളിലും മുന്നണി സംവിധാനത്തിൽ വേണ്ടത്ര ഏകോപനം ഉണ്ടായിരുന്നില്ലെന്ന് അദ്ദേഹം ആരോപിച്ചു. ഒരു തരത്തിലുള്ള കൂട്ടായ ആലോചനകളോ നിർദ്ദേശങ്ങളോ ഉണ്ടാകാതിരുന്നിട്ടും യുഡിഎഫ് കൺവീനർ എന്ന ഉത്തരവാദിത്തം സ്വയം ഏറ്റെടുത്തുകൊണ്ട് തിരുവനന്തപുരം, പത്തനംതിട്ട, കോട്ടയം, പാലക്കാട് തുടങ്ങിയ ജില്ലകളിൽ നേരിട്ടെത്തി പ്രവർത്തനങ്ങൾക്ക് നേതൃത്വം നൽകുകയായിരുന്നു. ആരുടെയും പ്രത്യേക നിർദ്ദേശമില്ലാതെയാണ് പലയിടത്തും ഓടിയെത്തിയത്. മുന്നണി ഘടകകക്ഷികളുമായും നേതാക്കളുമായും മികച്ച രീതിയിലുള്ള കൂടിയാലോചനകൾ അനിവാര്യമാണെന്നിരിക്കെ, നിലവിലെ പോക്ക് പുനഃപരിശോധിക്കേണ്ടതുണ്ടെന്ന മുന്നറിയിപ്പാണ് കൺവീനറുടെ പ്രതികരണത്തിലൂടെ വ്യക്തമാകുന്നത്.

---------------

Hindusthan Samachar / Roshith K