Mumbai , 01 ഒക്റ്റോബര് (H.S.)

മുംബൈ: കേന്ദ്ര മുഖ്യ തിരഞ്ഞെടുപ്പ് കമ്മീഷണർ ജ്ഞാനേഷ് കുമാറിനും ഇലക്ഷൻ കമ്മീഷനുമെതിരെ പ്രതിഷേധം ശക്തമാക്കാൻ ഒരുങ്ങി സിറ്റിസൺസ് ഫോർ ജസ്റ്റിസ് ആൻഡ് പീസ് (സിജെപി). തിരഞ്ഞെടുപ്പ് കമ്മീഷന്റെ പക്ഷപാതപരമായ നിലപാടുകൾക്കും ജനാധിപത്യ വിരുദ്ധ നടപടികൾക്കുമെതിരെ വിവിധ പൗരാവകാശ കൂട്ടായ്മകളുടെയും രാഷ്ട്രീയ പ്രസ്ഥാനങ്ങളുടെയും പിന്തുണയോടെ നാളെ മുംബൈയിൽ വൻ പ്രതിഷേധ മാർച്ച് സംഘടിപ്പിക്കും. സാമൂഹിക-മാധ്യമ പ്രവർത്തകരായ അഭിജീത് ദിപ്കെ, സൗരവ് ദാസ് എന്നിവരുൾപ്പെടെയുള്ള പ്രമുഖരും ശിവസേന (യുബിടി) അടക്കമുള്ള പ്രതിപക്ഷ രാഷ്ട്രീയ പാർട്ടികളും സമരത്തിൽ അണിനിരക്കും.

തിരഞ്ഞെടുപ്പ് കമ്മീഷന്റെ സ്വതന്ത്രവും നീതിയുക്തവുമായ പ്രവർത്തനങ്ങളിൽ വിട്ടുവീഴ്ച ചെയ്യപ്പെടുന്നുവെന്നും കേന്ദ്ര സർക്കാരിന്റെ താല്പര്യങ്ങൾക്ക് അനുസൃതമായാണ് കമ്മീഷൻ പ്രവർത്തിക്കുന്നതെന്നുമാണ് സമരക്കാരുടെ പ്രധാന ആരോപണം. ഭരണഘടനാപരമായ സ്വയംഭരണ സ്ഥാപനമെന്ന പദവി നഷ്ടപ്പെടുത്തി ഇലക്ഷൻ കമ്മീഷൻ കേന്ദ്രത്തിന്റെ രാഷ്ട്രീയ ആയുധമായി മാറുന്നുവെന്ന് ചൂണ്ടിക്കാട്ടിയാണ് പ്രതിഷേധക്കാർ തെരുവിലിറങ്ങുന്നത്. വോട്ടർ പട്ടികയിലെ ക്രമക്കേടുകൾ, വോട്ടിങ് ശതമാനവുമായി ബന്ധപ്പെട്ട സുതാര്യതയില്ലായ്മ, പ്രതിപക്ഷ പാർട്ടികൾക്കെതിരെയുള്ള പക്ഷപാതപരമായ പെരുമാറ്റച്ചട്ട നടപടികൾ തുടങ്ങിയ വിഷയങ്ങൾ സമരത്തിൽ പ്രധാനമായി ഉന്നയിക്കപ്പെടുന്നുണ്ട്.

മുഖ്യ തിരഞ്ഞെടുപ്പ് കമ്മീഷണർ ജ്ഞാനേഷ് കുമാറിന്റെ നേതൃത്വത്തിലുള്ള തിരഞ്ഞെടുപ്പ് കമ്മീഷന്റെ നിഷ്പക്ഷത പൂർണ്ണമായും ചോദ്യം ചെയ്യപ്പെടുന്ന സാഹചര്യമാണുള്ളതെന്ന് പൗരാവകാശ പ്രവർത്തകരും സംഘാടകരും വ്യക്തമാക്കുന്നു. ഭരണഘടന ഉറപ്പുനൽകുന്ന സ്വതന്ത്ര തിരഞ്ഞെടുപ്പ് പ്രക്രിയയെ അട്ടിമറിക്കാനുള്ള ശ്രമങ്ങൾക്കെതിരെ ജനാധിപത്യ വിശ്വാസികൾ ഒന്നിച്ചു നിൽക്കേണ്ട സമയമാണിതെന്ന് അഭിജീത് ദിപ്കെയും സൗരവ് ദാസും ആഹ്വാനം ചെയ്തു. ഇലക്ഷൻ കമ്മീഷന്റെ നടപടികളിൽ സമഗ്രവും സുതാര്യവുമായ മാറ്റം വരുത്തണമെന്നും, പൗരന്മാരുടെ ചോദ്യങ്ങൾക്ക് തിരഞ്ഞെടുപ്പ് കമ്മീഷൻ മറുപടി നൽകാൻ ബാധ്യസ്ഥരാണെന്നും അവർ ആവശ്യപ്പെടുന്നു.

ശിവസേന (ഉദ്ധവ് ബാലാസാഹേബ് താക്കറെ) വിഭാഗം സമരത്തിന് പൂർണ്ണ പിന്തുണ പ്രഖ്യാപിച്ചതോടെ പ്രതിഷേധം വലിയൊരു രാഷ്ട്രീയ പ്രക്ഷോഭമായി മാറുമെന്നാണ് കണക്കുകൂട്ടൽ. പ്രതിപക്ഷ സഖ്യത്തിലെ മറ്റ് പ്രമുഖ കക്ഷികളും പൗരാവകാശ സംഘടനകളും യുവജന പ്രസ്ഥാനങ്ങളും റാലിയിൽ പങ്കാളികളാകും. വരാനിരിക്കുന്ന തിരഞ്ഞെടുപ്പുകളുടെ പശ്ചാത്തലത്തിൽ, തിരഞ്ഞെടുപ്പ് കമ്മീഷനെതിരെയുള്ള ഈ ബഹുജന പ്രതിഷേധം കേന്ദ്ര സർക്കാരിനും വലിയ തലവേദനയായി മാറും. മാർച്ച് നടക്കുന്ന പശ്ചാത്തലത്തിൽ മുംബൈ നഗരത്തിൽ പോലീസും കനത്ത സുരക്ഷാ ക്രമീകരണങ്ങളാണ് ഒരുക്കിയിരിക്കുന്നത്.

---------------

Hindusthan Samachar / Roshith K