Abudabi , 01 ഒക്റ്റോബര് (H.S.)

അബുദാബി: ദുബായിൽ നിന്ന് ഇസ്രായേലിലെ തെൽ അവീവിലേക്ക് പറന്ന ഫ്ളൈ ദുബായ് (Flydubai - FZ1073) വിമാനത്തിൽ കോക്പിറ്റിനുള്ളിൽ അരങ്ങേറിയ ഞെട്ടിപ്പിക്കുന്ന അക്രമ സംഭവത്തിൽ സാധ്യമായ ഭീകരബന്ധം ഉൾപ്പെടെ പരിശോധിച്ച് സമഗ്രാന്വേഷണം നടത്താൻ യുഎഇ പബ്ലിക് പ്രോസിക്യൂഷൻ ഉത്തരവിട്ടു. സംഭവം അതീവ ഗൗരവത്തോടെയാണ് കാണുന്നതെന്നും മുൻകൂട്ടി ആസൂത്രണം ചെയ്ത ഭീകരപ്രവർത്തനമാണോ അതോ മറ്റ് അട്ടിമറി നീക്കങ്ങളാണോ ഇതിന് പിന്നിലെന്ന് കണ്ടെത്താൻ പ്രത്യേക പ്രോസിക്യൂട്ടർമാരുടെ സംഘത്തെ നിയോഗിച്ചതായും യുഎഇ അറ്റോർണി ജനറൽ ഹമദ് സെയ്ഫ് അൽ ഷംസി വ്യക്തമാക്കി.

വിമാനം യുഎഇയിൽ രജിസ്റ്റർ ചെയ്തതായതിനാലും യുഎഇ പതാകയ്ക്ക് കീഴിൽ പറക്കുന്നതായതിനാലും രാജ്യത്തിന്റെ പ്രദേശത്തിന് പുറത്തുവെച്ച് നടക്കുന്ന ഇത്തരം കുറ്റകൃത്യങ്ങളിൽ അന്വേഷണം നടത്താനും വിചാരണ ചെയ്യാനും യുഎഇ നിയമവ്യവസ്ഥയ്ക്ക് പൂർണ്ണ അധികാരമുണ്ടെന്ന് അറ്റോർണി ജനറലിന്റെ ഓഫീസ് വാർത്താക്കുറിപ്പിൽ അറിയിച്ചു. സംഭവത്തിൽ പ്രതിയായ ഒമാൻ സ്വദേശിയായ കോ-പൈലറ്റിന്റെ ലക്ഷ്യവും മാനസിക നിലയും ഉൾപ്പെടെയുള്ള എല്ലാ വശങ്ങളും സംഘം പരിശോധിക്കും.

വിമാനം പറന്നുയർന്ന് ആകാശമധ്യത്തിൽ എത്തിയപ്പോഴാണ് നാടകീയ സംഭവങ്ങൾ അരങ്ങേറിയത്. ഒമാൻ പൗരനായ കോ-പൈലറ്റ് വിമാനത്തിന്റെ ക്യാപ്റ്റനായ ഇന്ത്യൻ സ്വദേശി സ്മിത് മച്ചാറിനെ (Smit Machchhar) മൂർച്ചയേറിയ ആയുധം കൊണ്ട് കുത്തിപ്പരിക്കേൽപ്പിക്കുകയും വിമാനം താഴേക്ക് വീഴ്ത്തി തകർക്കാൻ ശ്രമിക്കുകയുമായിരുന്നു. നിമിഷങ്ങൾക്കുള്ളിൽ വിമാനം ആയിരക്കണക്കിന് അടി താഴേക്ക് പതിച്ചതോടെ കടുത്ത പരിഭ്രാന്തി പടർന്നു. എന്നാൽ ഗുരുതരമായി പരിക്കേറ്റിട്ടും മനോധൈര്യം കൈവിടാതെ ക്യാപ്റ്റൻ സ്മിത് മച്ചാർ കോക്പിറ്റിന്റെ വാതിൽ തുറക്കുകയും, തുടർന്ന് യാത്രക്കാരും ക്യാബിൻ ക്രൂവും അതിസാഹസികമായി കോക്പിറ്റിനുള്ളിലേക്ക് ഇരച്ചുകയറി അക്രമിയായ കോ-പൈലറ്റിനെ ബലപ്രയോഗത്തിലൂടെ കീഴ്പ്പെടുത്തുകയുമായിരുന്നു.

174 യാത്രക്കാരുമായി പറന്ന വിമാനം അടിയന്തരമായി സൗദി അറേബ്യയിലെ തബൂക്ക് വിമാനത്താവളത്തിൽ സുരക്ഷിതമായി ഇറക്കിയതിനാലാണ് വൻ ദുരന്തം ഒഴിവായത്. പരിക്കേറ്റ ക്യാപ്റ്റൻ സ്മിത് മച്ചാറിനെയും കോ-പൈലറ്റിനെയും ഉടൻ തന്നെ സൗദിയിലെ ആശുപത്രിയിൽ പ്രവേശിപ്പിച്ചു. ഇന്ത്യൻ പൈലറ്റിന്റെയും യാത്രക്കാരുടെയും അസാമാന്യ ധീരതയെ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവും ഇന്ത്യൻ പ്രധാനമന്ത്രി നരേന്ദ്ര മോദിയും അന്താരാഷ്ട്ര സമൂഹവും പ്രശംസിച്ചു. നിലവിൽ സൗദി അറേബ്യയുടെ കസ്റ്റഡിയിലുള്ള പ്രതിയെ പ്രാഥമിക ചോദ്യം ചെയ്യലിന് ശേഷം യുഎഇക്ക് കൈമാറുമെന്നാണ് സൂചന. വ്യോമയാന സുരക്ഷാ മാനദണ്ഡങ്ങൾ കർശനമാക്കാനും സർവീസുകളുടെ സുരക്ഷ വിലയിരുത്താനും ഏവിയേഷൻ അധികൃതർ ഇതിനകം നടപടികൾ തുടങ്ങിയിട്ടുണ്ട്.

---------------

Hindusthan Samachar / Roshith K