Nagpur, 18 ഒക്റ്റോബര് (H.S.)

നാഗ്പൂർ: രാജ്യത്ത് 'ഭരണമാറ്റം' വേണമെന്ന ശിവസേന (യുബിടി) അധ്യക്ഷൻ ഉദ്ധവ് താക്കറെയുടെ പ്രസ്താവനയ്ക്കെതിരെ രൂക്ഷമായ മറുപടിയുമായി മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് രംഗത്ത്. ഇന്ത്യയിൽ സർക്കാരുകൾ മാറുന്നത് തെരുവിലല്ലെന്നും ജനാധിപത്യപരമായ തിരഞ്ഞെടുപ്പുകളിലൂടെയും ഭരണഘടന അനുശാസിക്കുന്ന രീതിയിലുമാണെന്നും ഫഡ്നാവിസ് ഓർമ്മിപ്പിച്ചു. സ്വന്തം പാർട്ടിയിലെ പിളർപ്പും ഭരണമാറ്റവും തടയാൻ സാധിക്കാത്ത ഉദ്ധവ് താക്കറെയാണ് രാജ്യത്തെ ഭരണമാറ്റത്തെക്കുറിച്ച് സംസാരിക്കുന്നതെന്ന് അദ്ദേഹം പരിഹസിച്ചു.

ബാലാസാഹെബ് താക്കറെയുടെ പ്രത്യയശാസ്ത്രവും ഹിന്ദുത്വ നിലപാടുകളും ഉപേക്ഷിച്ച നിമിഷം തന്നെ ഉദ്ധവ് താക്കറെയുടെ പാർട്ടിയിൽ കടുത്ത ആഭ്യന്തര കലഹം പൊട്ടിപ്പുറപ്പെട്ടിരുന്നു. ബാലാസാഹെബിന്റെ ആദർശങ്ങൾ മുറുകെ പിടിക്കാൻ ആഗ്രഹിച്ചവരാണ് യഥാർത്ഥ ശിവസേന രൂപീകരിച്ചതെന്നും ഫഡ്നാവിസ് പറഞ്ഞു. ഇന്ത്യൻ ഭരണഘടനയ്ക്കെതിരായ പോരാട്ടങ്ങൾ അവസാനിപ്പിക്കണമെന്ന് വ്യക്തമാക്കിയ അദ്ദേഹം, രാജ്യത്തെ സുപ്രധാന തീരുമാനങ്ങൾ തെരുവുകളിലല്ല, മറിച്ച് പാർലമെന്റിലും ഭരണഘടനാ ചട്ടക്കൂടുകൾക്കകത്തുമാണ് രൂപപ്പെടേണ്ടതെന്നും വ്യക്തമാക്കി.

നരേന്ദ്ര മോദിയുടെ നേതൃത്വത്തിലുള്ള കേന്ദ്ര സർക്കാർ ജനപിന്തുണയോടെ ശക്തമായി മുന്നോട്ട് പോവുകയാണെന്നും ഇനിയും ജനവിധി നേടി സർക്കാർ അധികാരത്തിൽ തിരിച്ചെത്തുമെന്നും മുഖ്യമന്ത്രി അവകാശപ്പെട്ടു. ഭരണമാറ്റം ആഗ്രഹിക്കുന്നവർ ഭരണഘടനയെ വെല്ലുവിളിക്കുകയല്ല, മറിച്ച് തെരഞ്ഞെടുപ്പിൽ മത്സരിച്ച് ജനങ്ങളുടെ മനസ്സ് കീഴടക്കി വിജയിക്കുകയാണ് വേണ്ടതെന്ന് അദ്ദേഹം കൂട്ടിച്ചേർത്തു. നേപ്പാൾ, ബംഗ്ലാദേശ്, ശ്രീലങ്ക, പാകിസ്ഥാൻ തുടങ്ങിയ രാജ്യങ്ങളിൽ സംഭവിച്ചതുപോലെ അരാജകത്വത്തിലൂടെയും ഭരണഘടനയെ കാറ്റിൽപ്പറത്തിയും ഇന്ത്യയിൽ ഭരണമാറ്റം കൊണ്ടുവരാൻ ആരെങ്കിലും സ്വപ്നം കാണുന്നുണ്ടെങ്കിൽ അവരുടെ ലക്ഷ്യങ്ങൾ ഒരിക്കലും വിജയിക്കില്ലെന്ന് അദ്ദേഹം മുന്നറിയിപ്പ് നൽകി. ഡോ. ബാബാസാഹെബ് അംബേദ്കറുടെ നേതൃത്വത്തിൽ തയ്യാറാക്കപ്പെട്ട ഇന്ത്യൻ ഭരണഘടന ഇത്തരം നീക്കങ്ങളെ പരാജയപ്പെടുത്താൻ തക്കവിധം അതിശക്തമാണെന്നും ഫഡ്നാവിസ് അടിവരയിട്ടു.

മുംബൈയിൽ നടന്ന ഒരു അവാർഡ് ദാന ചടങ്ങിൽ സംസാരിക്കവെയാണ് ഉദ്ധവ് താക്കറെ 'ഭരണമാറ്റം' സംബന്ധിച്ച പരാമർശം നടത്തിയത്. തിരഞ്ഞെടുപ്പിലൂടെയും പ്രതിഷേധങ്ങളിലൂടെയും ജനങ്ങളുടെ അഭിപ്രായങ്ങൾ പ്രകടിപ്പിക്കാനുള്ള അവകാശം തടയപ്പെടുകയാണെങ്കിൽ, സർക്കാരിനെ അട്ടിമറിക്കുകയല്ലാതെ ജനങ്ങൾക്ക് മറ്റ് വഴികളുണ്ടാകില്ലെന്നായിരുന്നു താക്കറെയുടെ വാദം.

വോട്ടർപട്ടിക പുതുക്കലിലെ ക്രമക്കേടുകൾ ആരോപിച്ച് മുഖ്യ തെരഞ്ഞെടുപ്പ് കമ്മീഷണർ ജ്ഞാനേഷ് കുമാറിനെതിരെ പ്രതിപക്ഷ പാർട്ടികളും വിദ്യാർത്ഥി സംഘടനകളും ഡൽഹിയിൽ പ്രതിഷേധം കടുപ്പിക്കുന്നതിനിടെയാണ് നേതാക്കളുടെ ഈ പ്രസ്താവനകൾ വലിയ രാഷ്ട്രീയ വിവാദമായി മാറിയിരിക്കുന്നത്. ചില പ്രതിപക്ഷ നേതാക്കളും ആക്ടിവിസ്റ്റുകളും പ്രസംഗങ്ങളിൽ 'ഭരണമാറ്റം' എന്ന പദം ഉപയോഗിച്ചതിനെതിരെ കേന്ദ്ര പ്രതിരോധ മന്ത്രി രാജ്നാഥ് സിംഗ് ഉൾപ്പെടെയുള്ള ബിജെപി നേതാക്കളും രംഗത്തെത്തിയിരുന്നു. അയൽരാജ്യമായ ബംഗ്ലാദേശിലെ സമാനമായ രാഷ്ട്രീയ അട്ടിമറിയും പ്രക്ഷോഭവും ഇന്ത്യയിൽ ആവർത്തിക്കാൻ ശ്രമിക്കുകയാണെന്നായിരുന്നു അദ്ദേഹം ആരോപിച്ചത്. അതിനു പിന്നാലെയാണ് മഹാരാഷ്ട്ര മുഖ്യമന്ത്രിയും ഉദ്ധവ് താക്കറെയുടെ നിലപാടുകൾക്കെതിരെ ആഞ്ഞടിച്ചത്.

---------------

Hindusthan Samachar / Roshith K