Chennai, 02 ഒക്റ്റോബര് (H.S.)

ചെന്നൈ: ഗാന്ധി ജയന്തി ദിനത്തിൽ തമിഴ്നാട്ടിലെ സ്ത്രീകൾക്കായി വൻ പ്രഖ്യാപനവുമായി മുഖ്യമന്ത്രി സി. ജോസഫ് വിജയ്. സർക്കാർ ബസുകളിൽ സ്ത്രീകൾക്ക് സൗജന്യ യാത്ര അനുവദിക്കുന്ന 'വെട്രി പയണം' പദ്ധതിയുടെ വിപുലീകരിച്ച ഘട്ടം അദ്ദേഹം ചെന്നൈയിൽ ഔദ്യോഗികമായി ഉദ്ഘാടനം ചെയ്തു. പദ്ധതി വിപുലീകരിച്ചതോടെ സംസ്ഥാനത്തുടനീളം പ്രതിദിനം 84.32 ലക്ഷത്തോളം സ്ത്രീകൾക്കും ട്രാൻസ്ജെൻഡർ വിഭാഗക്കാർക്കും സൗജന്യ ബസ് യാത്രയുടെ ആനുകൂല്യം ലഭിക്കുമെന്ന് സർക്കാർ വ്യക്തമാക്കി.

ചെന്നൈ കോയമ്പേട്, അമ്പത്തൂർ ബസ് ടെർമിനലുകളിൽ വെച്ചു നടന്ന ചടങ്ങിൽ മുഖ്യമന്ത്രി നേരിട്ടെത്തി യാത്രക്കാരായ വനിതകളോട് സംസാരിക്കുകയും സൗജന്യ യാത്രാ ടിക്കറ്റുകൾ വിതരണം ചെയ്യുകയും ചെയ്തു. സാധാരണ സിറ്റി ബസുകളിൽ മാത്രം ഒതുങ്ങിനിന്നിരുന്ന മുൻപത്തെ സൗജന്യ യാത്രാ സൗകര്യമാണ് ഇപ്പോൾ എക്സ്പ്രസ്, ലിമിറ്റഡ് സ്റ്റോപ്പ് (LSS), ഡീലക്സ്, മോഫ്യൂസിൽ ഓർഡിനറി, 40 കിലോമീറ്ററിന് മുകളിലുള്ള മലയോര സർവീസുകൾ (Ghat ordinary) എന്നിവയിലേക്കുകൂടി ദീർഘിപ്പിച്ചിരിക്കുന്നത്. ഇതോടെ 12,692-ലധികം സർക്കാർ ബസുകൾ ഈ പദ്ധതിക്ക് കീഴിൽ നിരത്തിലിറങ്ങും. എന്നാൽ ദീർഘദൂര എസ്.ഇ.ടി.സി (SETC) ബസുകളെ ഈ പദ്ധതിയിൽ നിന്ന് ഒഴിവാക്കിയിട്ടുണ്ട്.

സാമൂഹിക നീതിയും സ്ത്രീ ശാക്തീകരണവും മുൻനിർത്തിയാണ് സർക്കാർ ഈ ചരിത്രപരമായ ചുവടുവെപ്പ് നടത്തിയിരിക്കുന്നതെന്ന് മുഖ്യമന്ത്രി വ്യക്തമാക്കി. യാത്രച്ചെലവുകൾ കാരണം തമിഴ്നാട്ടിലെ ഒരു പെൺകുട്ടിയുടെയും പഠനമോ ജോലിയോ മുടങ്ങാൻ പാടില്ലെന്ന ലക്ഷ്യത്തോടെയാണ് നിയമസഭയിലെ ചട്ടം 110 പ്രകാരം ഈ വിപുലീകരണം പ്രഖ്യാപിച്ചത്. ഗുണഭോക്താക്കൾക്ക് യാതൊരുവിധ വരുമാന പരിധിയും നിശ്ചയിച്ചിട്ടില്ലെന്നും ഒരു ദിവസം നടത്താവുന്ന യാത്രകളുടെ എണ്ണത്തിൽ യാതൊരു നിയന്ത്രണവും ഉണ്ടാകില്ലെന്നും സർക്കാർ അറിയിച്ചു. പ്രതിവർഷം ഏകദേശം 6,000 കോടി രൂപയോളം ചെലവ് വരുന്നതാണ് ഈ സമഗ്ര പദ്ധതി.

സ്ത്രീകളുടെ സാമ്പത്തിക സ്വാശ്രയത്വത്തിന് വലിയ കരുത്തുപകരുന്ന ഒരു സാമൂഹിക വിപ്ലവമാണ് 'വെട്രി പയണം' പദ്ധതിയിലൂടെ യാഥാർത്ഥ്യമാകുന്നതെന്ന് ഗതാഗത മന്ത്രി എ. വിജയ് തമിഴൻ പാർത്ഥിപൻ പറഞ്ഞു. വിദൂര കോളേജുകളിലേക്ക് പഠിക്കാൻ പോകുന്ന പെൺകുട്ടികൾക്കും ആശുപത്രികൾ, ജോലിസ്ഥലങ്ങൾ, വ്യാപാര കേന്ദ്രങ്ങൾ എന്നിവിടങ്ങളിലേക്ക് സഞ്ചരിക്കുന്ന വനിതകൾക്കും പുതിയ പ്രഖ്യാപനം വലിയ ആശ്വാസമാകും. തമിഴക വെട്രി കഴകം (ടിവികെ) സർക്കാരിന്റെ ജനക്ഷേമ അജണ്ടയിലെ പ്രധാന നാഴികക്കല്ലായാണ് രാഷ്ട്രീയ നിരീക്ഷകർ ഈ തീരുമാനത്തെ കാണുന്നത്. ബസുകളിലെ ഇലക്ട്രോണിക് ടിക്കറ്റിംഗ് മെഷീനുകൾ (ETM) വഴി സൗജന്യ യാത്രകൾ കൃത്യമായി രേഖപ്പെടുത്താനുള്ള സജ്ജീകരണങ്ങളും പൂർത്തിയായിട്ടുണ്ട്. പുതിയ പദ്ധതി നിലവിൽ വന്നതോടെ തമിഴ്നാട്ടിലെ പൊതുഗതാഗത സംവിധാനത്തിൽ സ്ത്രീകളുടെ പങ്കാളിത്തം ഇനിയും കുതിച്ചുയരുമെന്നാണ് വിലയിരുത്തപ്പെടുന്നത്.

---------------

Hindusthan Samachar / Roshith K