Newdelhi , 21 ഒക്റ്റോബര് (H.S.)

ന്യൂഡൽഹി: പ്രത്യേക എക്സിക്യൂട്ടീവ് മജിസ്ട്രേറ്റ് (എസ്ഇഎം) ഉത്തരവിട്ട ജുഡീഷ്യൽ കസ്റ്റഡി ചോദ്യം ചെയ്ത് കോക്ക്റോച്ച് ജനതാ പാർട്ടി (സിജെപി) നേതാക്കളായ സൗരവ് ദാസും അശുതോഷ് റങ്കയും സമർപ്പിച്ച ഹർജി ഡൽഹി ഹൈക്കോടതിയിൽ നിന്ന് പിൻവലിച്ചു. ഹർജി പരിഗണിച്ച കോടതിയിൽ നിന്ന് കടുത്ത ചോദ്യങ്ങളും വിമർശനങ്ങളും ഉയർന്ന പശ്ചാത്തലത്തിലാണ് ഇരുവരും ഹർജി പിൻവലിക്കാൻ നിർബന്ധിതരായത്. ഹർജിയുടെ മെറിറ്റിൽ ഇടപെടാതെ തന്നെ ഹർജി പിൻവലിക്കാൻ കോടതി അനുമതി നൽകി.

നേരത്തെ പ്രതിഷേധ വേദിയെന്ന പദവി ഒഴിവാക്കിയ (ഡീ-നോട്ടിഫൈ ചെയ്ത) ജന്തർ മന്ദിറിൽ വെച്ച് ദേശീയ പതാക വീശി പ്രതിഷേധിച്ചതിനെ തുടർന്നാണ് സൗരവ് ദാസിനെയും അശുതോഷ് റങ്കയെയും പോലീസ് കസ്റ്റഡിയിലെടുത്തത്. ഹർജി പരിഗണിച്ച ജസ്റ്റിസ് സുബ്രമോണിയം പ്രസാദ്, ഹർജിക്കാരുടെ പ്രായത്തെയും ഉദ്ദേശ്യങ്ങളെയും കുറിച്ച് ശക്തമായ ചോദ്യങ്ങളാണ് ഉന്നയിച്ചത്. ഇരുവരുടെയും പ്രായം പരിശോധിച്ച കോടതി, ഇവർ 'ജെൻ സി' (Gen Z) വിഭാഗത്തിൽപ്പെടുന്നവരല്ലെന്ന് നിരീക്ഷിച്ചു. സൗരവ് ദാസിന് 27 വയസ്സും അശുതോഷ് റങ്കയ്ക്ക് 31 വയസ്സുമാണെന്ന വിവരമാണ് കോടതിയിൽ എത്തിയത്. 1997-ന് ശേഷം ജനിച്ചവരാണ് ജെൻ സി വിഭാഗത്തിൽ വരുന്നതെന്നും, അതിനാൽ പ്രതിഷേധക്കാരുടെ ഉദ്ദേശ്യശുദ്ധിയും പശ്ചാത്തലവും പരിശോധിക്കേണ്ടത് അത്യന്താപേക്ഷിതമാണെന്നും കോടതി വ്യക്തമാക്കി.

ഒരു ജനാധിപത്യ രാജ്യത്ത് ജനങ്ങൾക്ക് സമാധാനപരമായി പ്രതിഷേധിക്കാനുള്ള അവകാശമുണ്ടെന്ന് വ്യക്തമാക്കിയ ഹൈക്കോടതി, എന്നാൽ ഭരണമാറ്റം വരുത്തേണ്ടത് തെരഞ്ഞെടുപ്പിലൂടെയാണെന്ന് ഓർമ്മിപ്പിച്ചു. കൂടാതെ, അധികൃതർ ഇവരോട് നേരത്തെ വളരെ ഉദാരമായ സമീപനമാണ് സ്വീകരിച്ചിരുന്നതെന്നും കോടതി ചൂണ്ടിക്കാട്ടി. മുൻപ് ഒപ്പിട്ടു നൽകിയ സമാധാന ഉടമ്പടി ഇരുവരും ലംഘിച്ചതായും ജസ്റ്റിസ് സുബ്രമോണിയം പ്രസാദ് ചൂണ്ടിക്കാട്ടി. ഒരു ഉത്തരവിനെതിരെ റിവിഷൻ ഹർജി നൽകാൻ നിയമപരമായ വഴിയുള്ളപ്പോൾ എന്തിനാണ് ഭരണഘടനയുടെ ആർട്ടിക്കിൾ 226 പ്രകാരം നേരിട്ട് ഹൈക്കോടതിയെ സമീപിച്ചതെന്ന് കോടതി ആരാഞ്ഞു. റിവിഷനൽ കോടതിയെയാണ് ആദ്യം സമീപിക്കേണ്ടതെന്നും അവിടെ നിയമപരമായ കാര്യങ്ങൾ പരിശോധിക്കാമെന്നും കോടതി നിർദ്ദേശിച്ചു.

ഒക്ടോബർ 10-ന് മുഖ്യ തിരഞ്ഞെടുപ്പ് കമ്മീഷണർ ജ്ഞാനേഷ് കുമാറിനെതിരെ സിജെപി ആഹ്വാനം ചെയ്ത പ്രതിഷേധത്തിന് മുന്നോടിയായാണ് ഇവരെ ആദ്യം കസ്റ്റഡിയിലെടുത്തത്. തുടർന്ന്, സമാധാനാന്തരീക്ഷം തകർക്കില്ലെന്ന ബോണ്ട് ഒപ്പിട്ടു നൽകിയ ശേഷമാണ് ഇവരെ വിട്ടയച്ചിരുന്നത്. എന്നാൽ ഒക്ടോബർ 13-ന് വിലക്ക് മറികടന്ന് പൂട്ടിയിട്ടിരുന്ന ഗേറ്റ് ചാടിക്കടന്ന് ജന്തർ മന്ദിറിൽ പ്രവേശിക്കാൻ ഇരുവരും ശ്രമിക്കുകയായിരുന്നു. ഇതിനെ തുടർന്ന് വീണ്ടും കസ്റ്റഡിയിലെടുക്കുകയും ജുഡീഷ്യൽ കസ്റ്റഡിയിലേക്ക് അയക്കുകയുമായിരുന്നു. കസ്റ്റഡി കാലാവധി നീട്ടിയതിനെതിരെ അടിയന്തര രാത്രികാല വാദം കേൾക്കൽ ആവശ്യപ്പെട്ടാണ് ഇവർ ഹൈക്കോടതിയെ സമീപിച്ചിരുന്നത്. എന്നാൽ കോടതി നിലപാട് കർശനമായതോടെ ഒടുവിൽ ഹർജി പിൻവലിക്കാൻ ഇവർ തീരുമാനിക്കുകയായിരുന്നു.

---------------

Hindusthan Samachar / Roshith K