Tokyo, 22 ഒക്റ്റോബര് (H.S.)

ഐച്ചി-നഗോയ (ജപ്പാൻ): ഏഷ്യൻ പാരാ ഗെയിംസ് 2026-ൽ ഇന്ത്യക്ക് വീണ്ടും സുവർണ നേട്ടം. വനിതകളുടെ ഡിസ്കസ് ത്രോ F54 വിഭാഗത്തിൽ ഇന്ത്യൻ താരം സുവർണ രാജ് സ്വർണമെഡൽ സ്വന്തമാക്കി. 15.66 മീറ്റർ ദൂരം കണ്ടെത്തിയാണ് സുവർണ പോഡിയത്തിന്റെ ഒന്നാം സ്ഥാനത്തെത്തിയത്. ഈ വിജയത്തോടെ ഗെയിംസിലെ ഇന്ത്യയുടെ ആകെ സ്വർണനേട്ടം പതിനഞ്ചായി ഉയർന്നു.

ആറ് അത്ലറ്റുകൾ മത്സരിച്ച ഫൈനലിൽ തുടക്കം മുതൽ മികച്ച സ്ഥിരത പുലർത്താൻ സുവർണയ്ക്ക് സാധിച്ചു. ആകെ ലഭിച്ച ആറ് അവസരങ്ങളിൽ നാലിലും 15 മീറ്ററിന് മുകളിലേക്ക് ഡിസ്കസ് പായിക്കാൻ താരത്തിനായി. ഇതിൽ അഞ്ചാമത്തെ ശ്രമത്തിലാണ് സ്വർണമുറപ്പിച്ച 15.66 മീറ്റർ ദൂരം അവർ കുറിച്ചത്. മത്സരത്തിൽ ഇറാന്റെ ഷഹ്ല ഹദീദി 15.45 മീറ്റർ എറിഞ്ഞ് വെള്ളി മെഡലും വിയറ്റ്നാമിന്റെ എൻഗുയെൻ തി എൻഗോക് തുയി 14.65 മീറ്ററോടെ വെങ്കല മെഡലും സ്വന്തമാക്കി.

ബാഡ്മിന്റണിൽ മനീഷ–പ്രമോദ് സഖ്യത്തിന് വെങ്കലംപാരാ ബാഡ്മിന്റൺ മിക്സഡ് ഡബിൾസ് SL3-SU5 വിഭാഗത്തിൽ ഇന്ത്യയുടെ പ്രമുഖ താരങ്ങളായ മനീഷ രാമദാസ്–പ്രമോദ് ഭഗത് സഖ്യം വെങ്കല മെഡലിൽ ഒതുങ്ങി. ആവേശകരമായ സെമിഫൈനൽ പോരാട്ടത്തിൽ ഇന്തോനേഷ്യൻ ജോഡിയായ ഒക്ടില ലിയാനി റാട്രി–ഹിക്മത് റംദാനി സഖ്യത്തോടാണ് ഇന്ത്യൻ സഖ്യം പരാജയപ്പെട്ടത്.

ആദ്യ ഗെയിം 21-16 ന് നേടി മനീഷയും പ്രമോദും ശക്തമായ ആധിപത്യം പുലർത്തിയെങ്കിലും, തൊട്ടടുത്ത ഗെയിമുകളിൽ ഇന്തോനേഷ്യൻ താരങ്ങൾ ശക്തമായി തിരിച്ചുവരികയായിരുന്നു. മൂന്ന് ഗെയിമുകൾ നീണ്ട പോരാട്ടത്തിനൊടുവിൽ 21-16, 13-21, 17-21 എന്ന സ്കോറിലാണ് ഇന്ത്യൻ സഖ്യം കീഴടങ്ങിയത്. ഫൈനലിൽ ഇന്തോനേഷ്യൻ താരങ്ങളെ നേരിടുന്നത് മറ്റൊരു ഇന്ത്യൻ സഖ്യമായ തുളസിമതി മുരുഗേശൻ–നിതേഷ് കുമാർ ജോഡിയാണ്.

ആർച്ചറിയിൽ സ്വാതി ചൗധരിക്ക് വെള്ളി; മെഡൽ നേട്ടം 65-ലേക്ക്വനിതകളുടെ W1 വ്യക്തിഗത ആർച്ചറിയിൽ ഇന്ത്യൻ പാരാ ആർച്ചർ സ്വാതി ചൗധരി വെള്ളി മെഡൽ കരസ്ഥമാക്കി. ആവേശകരമായ ഫൈനലിൽ ചൈനയുടെ മെങ്കാൻ സെനിനോട് 4-6 എന്ന സ്കോറിനാണ് സ്വാതി പരാജയം സമ്മതിച്ചത്. ആദ്യ മൂന്ന് സെറ്റുകൾ അവസാനിച്ചപ്പോൾ 4-2 എന്ന നിലയിൽ മുന്നിട്ടുനിന്ന സ്വാതിക്ക് സ്വർണം ഉറപ്പിക്കാനുള്ള അവസരമുണ്ടായിരുന്നെങ്കിലും, ശക്തമായ തിരിച്ചുവരവ് നടത്തിയ ചൈനീസ് താരം മത്സരം പിടിച്ചെടുക്കുകയായിരുന്നു.

പുതിയ മൂന്ന് മെഡലുകൾ കൂടി വന്നതോടെ ഗെയിംസിലെ ഇന്ത്യയുടെ ആകെ മെഡൽ നേട്ടം 65 ആയി ഉയർന്നു. 15 സ്വർണവും 22 വെള്ളിയും 28 വെങ്കല മെഡലുകളുമാണ് ഇതുവരെ ഇന്ത്യൻ താരങ്ങൾ രാജ്യത്തിനായി നേടിയത്. കൂടുതൽ ഇനങ്ങളിൽ ഫൈനൽ മത്സരങ്ങൾ നടക്കാനിരിക്കെ ഇന്ത്യൻ മെഡൽവേട്ട ഇനിയും ഉയരുമെന്ന പ്രതീക്ഷയിലാണ് കായിക പ്രേമികൾ.

---------------

Hindusthan Samachar / Roshith K