Tel avev , 23 ഒക്റ്റോബര് (H.S.)

ടെൽ അവീവ് / ന്യൂഡൽഹി: ഇസ്രായേലിന്റെ സ്വാതന്ത്ര്യദിനാഘോഷ ചടങ്ങിൽ പങ്കെടുക്കാൻ പ്രധാനമന്ത്രി നരേന്ദ്ര മോദിയെ ക്ഷണിച്ച് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു. വ്യാഴാഴ്ച പ്രധാനമന്ത്രി മോദിയുമായി നടത്തിയ ടെലിഫോൺ സംഭാഷണത്തിലാണ് നെതന്യാഹു ഈ ക്ഷണം മുന്നോട്ടുവെച്ചത്. ആഘോഷങ്ങളുടെ ഭാഗമായി നടക്കുന്ന പരമ്പരാഗത ദീപശിഖ തെളിയിക്കൽ ചടങ്ങിൽ, വിമാനം തകർക്കാനുള്ള അട്ടിമറി ശ്രമം പരാജയപ്പെടുത്തിയ ധീരനായ ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിനൊപ്പം പങ്കെടുക്കാനാണ് പ്രധാനമന്ത്രിയെ ഇസ്രായേൽ പ്രധാനമന്ത്രി ഔദ്യോഗികമായി ക്ഷണിച്ചത്.

തന്റെ സുഹൃത്തായ പ്രധാനമന്ത്രി നരേന്ദ്ര മോദിയുമായി സംസാരിച്ചതായും ഇസ്രായേൽ സ്വാതന്ത്ര്യദിനത്തിൽ ധീരനായ ഇന്ത്യൻ പൈലറ്റിനൊപ്പം ദീപം തെളിയിക്കാൻ അദ്ദേഹത്തെ ക്ഷണിച്ചതായും നെതന്യാഹു സമൂഹമാധ്യമമായ 'എക്സി'ലൂടെ വ്യക്തമാക്കി. ക്ഷണത്തിന് നന്ദി അറിയിച്ച പ്രധാനമന്ത്രി മോദി, ഭീകരവാദത്തിനെതിരായ പോരാട്ടത്തിൽ കരയിലും ആകാശത്തും ഇന്ത്യയും ഇസ്രായേലും ഒറ്റക്കെട്ടായി നിലകൊള്ളുകയാണെന്ന് വ്യക്തമാക്കിയതായും നെതന്യാഹു കൂട്ടിച്ചേർത്തു. ഇരുരാജ്യങ്ങളും തമ്മിലുള്ള പതിറ്റാണ്ടുകൾ നീണ്ട ശക്തവും ധീരവുമായ സൗഹൃദത്തെയും തന്ത്രപ്രധാനമായ സഹകരണത്തെയും പ്രധാനമന്ത്രി അഭിനന്ദിച്ചു.

ഇരുനേതാക്കളും തമ്മിൽ നടന്ന ചർച്ചയിൽ പശ്ചിമേഷ്യയിലെ നിലവിലെ സാഹചര്യങ്ങളും ഉഭയകക്ഷി ബന്ധങ്ങളും സമഗ്രമായി വിലയിരുത്തി. മേഖലയിൽ സമാധാനവും സ്ഥിരതയും പുനഃസ്ഥാപിക്കേണ്ടതിന്റെ അടിയന്തര ആവശ്യകതയെക്കുറിച്ച് ചർച്ച ചെയ്തതായി പ്രധാനമന്ത്രി നരേന്ദ്ര മോദിയും അറിയിച്ചു. പ്രശ്നങ്ങൾക്ക് പരിഹാരം കാണുന്നതിന് നയതന്ത്ര ചർച്ചകളാണ് ഏക പോംവഴിയെന്ന ഇന്ത്യയുടെ നിലപാട് അദ്ദേഹം ഒരിക്കൽക്കൂടി വ്യക്തമാക്കി. ഇരുരാജ്യങ്ങളും തമ്മിലുള്ള 'പ്രത്യേക തന്ത്രപ്രധാന പങ്കാളിത്തം' കൂടുതൽ ശക്തിപ്പെടുത്താനുള്ള പ്രതിബദ്ധതയും നേതാക്കൾ പുതുക്കി.

ക്യാപ്റ്റൻ സ്മിത് മച്ചാറിന്റെ ധീരത

ദുബായിൽ നിന്ന് ടെൽ അവീവിലേക്ക് പറന്ന ഫ്ളൈദുബായ് വിമാനം (FZ1073) തകർക്കാൻ സഹ പൈലറ്റ് നടത്തിയ അപകടകരമായ ശ്രമത്തെ മനസ്സാന്നിധ്യത്തോടെയും ധീരതയോടെയും നേരിട്ട് പരാജയപ്പെടുത്തിയത് ക്യാപ്റ്റൻ സ്മിത് മച്ചാറായിരുന്നു. കോക്ക്പിറ്റിൽ വെച്ച് സഹ പൈലറ്റിന്റെ ക്രൂരമായ ആക്രമണത്തിൽ ഗുരുതരമായി പരിക്കേറ്റിട്ടും, യാത്രക്കാരുടെയും വിമാനത്തിന്റെയും സുരക്ഷ ഉറപ്പാക്കി അദ്ദേഹം വിമാനം സുരക്ഷിതമായി നിലത്തിറക്കി. സ്മിത് മച്ചാറിന്റെ അസാധാരണ ധീരതയെ നേരത്തെ തന്നെ ലോകത്തിന്റെയാകെ ഹീറോ എന്ന് വിശേഷിപ്പിച്ച് നെതന്യാഹു ഫോണിലൂടെ പ്രശംസിച്ചിരുന്നു.

ഇന്ത്യയും ഇസ്രായേലും തമ്മിലുള്ള സുരക്ഷാ, പ്രതിരോധ, ഭീകരവിരുദ്ധ സഹകരണം കൂടുതൽ ദൃഢമാകുന്നതിന്റെ തെളിവാണ് ഈ കൂടിക്കാഴ്ചയും ക്ഷണവും. പശ്ചിമേഷ്യൻ സമാധാന പ്രക്രിയയിൽ ഇന്ത്യയുടെ പങ്കാളിത്തവും പ്രാധാന്യവും വ്യക്തമാക്കുന്നതാണ് ഇരുനേതാക്കളുടെയും നിരന്തരമായ നയതന്ത്ര ഇടപെടലുകൾ.

---------------

Hindusthan Samachar / Roshith K