Enter your Email Address to subscribe to our newsletters
New delhi, 24 ഒക്റ്റോബര്‍ (H.S.)
ഇന്ത്യ-ചൈന അതിര്ത്തിയില് സൈനിക ഏറ്റുമുട്ടല്. അരുണാചല്‍ പ്രദേശിലെ അതിര്‍ത്തിയിലാണ് ഇരുരാജ്യങ്ങളുടെയും സൈനികര്‍ തമ്മില്‍ ഏറ്റുമുട്ടുന്നത്. പ്രശ്നങ്ങള്‍ പരിഹരിക്കുന്നതിനും അതിര്ത്തിയില് തെറ്റിദ്ധാരണകളും സംഘര്‍ഷസാധ്യതകളും ഒഴിവാക്കുന്നതിനും നിലവിലുള്ള നയതന്ത്ര സൈനിക സംവിധാനങ്ങള്‍ ഉപയോഗിച്ചുവരുന്നതായി വിദേശകാര്യ മന്ത്രാലയം വ്യക്തമാക്കി. യഥാര്‍ഥ നിയന്ത്രണരേഖയില്‍ സമാധാനവും സ്ഥിരതയും ഉറപ്പാക്കുന്നതിന് ഇരുരാജ്യങ്ങളും ചര്‍ച്ചകള്‍ തുടരുകയാണെന്ന് മന്ത്രാലയ വക്താവ് രണ്‍ധീര്‍ ജയ്സ്വാള്‍ ന്യൂഡല്‍ഹിയില്‍ മാധ്യമങ്ങളോട് പറഞ്ഞു.
അരുണാചല്‍ പ്രദേശിലെ വിവിധ മേഖലകളില്‍ ഇന്ത്യന്‍-ചൈനീസ് സൈനികര്‍ തമ്മില്‍ ഏറ്റുമുട്ടുന്നുവെന്ന ഇന്തോ-ടിബറ്റന്‍ ബോര്‍ഡര്‍ പൊലീസിന്റെ ഡയറക്ടര്‍ ജനറല്‍ ശത്രുജീത് സിങ് കപൂറിന്റെ പ്രസ്താവനയ്ക്ക് പിന്നാലെയാണ് വിദേശകാര്യ മന്ത്രാലയത്തിന്റെ പ്രതികരണം. അതിര്‍ത്തിയിലെ സാഹചര്യം ഇടയ്ക്കിടെ വഷളാകുന്നുണ്ടെന്നും ചൈനീസ് സൈന്യം പതിവായി പിന്തുടരുന്ന പട്രോളിങ് രീതികളില്‍നിന്ന് വ്യതിചലിക്കുമ്പോള്‍ ഇത്തരം പ്രശ്നങ്ങള്‍ ഉണ്ടാകാറുണ്ടെന്നും ജയ്സ്വാള്‍ പറഞ്ഞു.
അതിര്‍ത്തി മേഖലകളിലെ സമാധാനവും ശാന്തതയും ഇന്ത്യ ചൈന ഉഭയകക്ഷി ബന്ധങ്ങളുടെ സമഗ്രമായ പുരോഗതിക്ക് അനിവാര്യമാണെന്നും അദ്ദേഹം കൂട്ടിച്ചേര്‍ത്തു. അതേസമയം, അതിര്‍ത്തിയിലെ സൈനിക സംവിധാനങ്ങളുമായി ബന്ധപ്പെട്ട കൂടുതല്‍ വിശദാംശങ്ങള്‍ പ്രതിരോധ മന്ത്രാലയത്തില്‍നിന്ന് ലഭ്യമാക്കാമെന്നും വിദേശകാര്യ മന്ത്രാലയം വ്യക്തമാക്കി.
അരുണാചല്‍ പ്രദേശിലെ വിവിധ സ്ഥലങ്ങളില്‍ ഇന്ത്യന്‍ സൈനികരും ചൈനീസ് പീപ്പിള്‍സ് ലിബറേഷന്‍ ആര്‍മി സൈനികരും തമ്മില്‍ ഏറ്റുമുട്ടല് ഉണ്ടായതായും ചില മേഖലകളില്‍ സാഹചര്യം തുടരുകയാണെന്നും ഐടിബിപി ഡയറക്ടര്‍ ജനറല്‍ ശത്രുജീത് സിങ് കപൂര്‍ വ്യാഴാഴ്ച വെളിപ്പെടുത്തിയിരുന്നു. ഐടിബിപി ഉദ്യോഗസ്ഥരെ ആദരിക്കുന്ന വാര്‍ഷിക ചടങ്ങില്‍ സംസാരിക്കവെയാണ് അദ്ദേഹം ഇക്കാര്യം അറിയിച്ചത്.
ജൂലൈ മുതല്‍ അതിര്ത്തിയില് സംഘര്‍ഷസാധ്യതയുള്ള സംഭവങ്ങള്‍ റിപ്പോര്‍ട്ട് ചെയ്യപ്പെടുന്നുണ്ടെന്നും തക്സിങ് മേഖലയിലെ പ്രധാന പട്രോളിങ് പോയിന്റുകളിലേക്ക് ഇന്ത്യന്‍ സൈനികര്‍ക്ക് പ്രവേശനം നിഷേധിക്കുന്നതായി റിപ്പോര്‍ട്ടുകള്‍ ഉയര്‍ന്നിരുന്നുവെന്നും വാര്‍ത്തകളില്‍ പറയുന്നു. ഇതിന് പിന്നാലെയാണ് അരുണാചല്‍ പ്രദേശിലെ ഒന്നിലധികം സ്ഥലങ്ങളില്‍ സൈനികര്‍ തമ്മില്‍ സംഘര്‍ഷം ഉണ്ടായതെന്നും അത് തുടരുന്നതായും കപൂര്‍ വ്യക്തമാക്കിയത്.
അതിര്‍ത്തിയിലെ പട്രോളിങ് അവകാശങ്ങളും സൈനികരുടെ നീക്കങ്ങളും ഇന്ത്യ ചൈന ബന്ധത്തില്‍ ഏറെക്കാലമായി നിര്‍ണായക വിഷയങ്ങളാണ്. യഥാര്‍ഥ നിയന്ത്രണരേഖയുടെ കൃത്യമായ ധാരണയുമായി ബന്ധപ്പെട്ട അഭിപ്രായവ്യത്യാസങ്ങള്‍ ഇരുവിഭാഗങ്ങള്‍ക്കുമിടയില്‍ സംഘര്‍ഷസാധ്യത സൃഷ്ടിക്കാറുണ്ട്. ഇത്തരം സാഹചര്യങ്ങളില്‍ പ്രാദേശിക സൈനിക കമാന്‍ഡര്‍മാര്‍ തമ്മിലുള്ള ആശയവിനിമയവും ഉന്നതതല നയതന്ത്ര ചര്‍ച്ചകളും നിര്‍ണായകമാണ്.
ഇന്ത്യയും ചൈനയും അതിര്‍ത്തിയിലെ പ്രശ്നങ്ങള്‍ കൈകാര്യം ചെയ്യാന്‍ നിലവിലുള്ള സൈനിക നയതന്ത്ര സംവിധാനങ്ങള്‍ ഉപയോഗിക്കുന്നുണ്ടെന്ന് വിദേശകാര്യ മന്ത്രാലയം ആവര്‍ത്തിച്ചു. എല്‍എസിയുടെ ചില മേഖലകളെക്കുറിച്ചുള്ള ധാരണ മെച്ചപ്പെടുത്തുന്നതിനുള്ള ചര്‍ച്ചകള്‍ക്കും ഇരുരാജ്യങ്ങളും സമ്മതിച്ചിട്ടുണ്ടെന്ന് ജയ്സ്വാള്‍ പറഞ്ഞു.
---------------
Hindusthan Samachar / Sreejith S
