Bengaluru, 28 ഒക്റ്റോബര് (H.S.)

ബെംഗളൂരു: കർണാടക ലെജിസ്ലേറ്റീവ് കൗൺസിലിലേക്ക് (എംഎൽസി) നടന്ന തെരഞ്ഞെടുപ്പിൽ ഭരണകക്ഷിയായ കോൺഗ്രസിനെ നിലംപരിശാക്കി ബിജെപി–ജെഡിഎസ് സഖ്യം. മത്സരം നടന്ന നാല് സീറ്റുകളിലും എൻഡിഎ സഖ്യം മിന്നുന്ന വിജയം സ്വന്തമാക്കി. ബിജെപി മൂന്ന് സീറ്റുകൾ നേടിയപ്പോൾ ഒരു സീറ്റ് സഖ്യകക്ഷിയായ ജനതാദൾ (എസ്) സ്വന്തമാക്കി. സിറ്റിങ് സീറ്റിലടക്കം കോൺഗ്രസിന് ഒരിടത്തും അക്കൗണ്ട് തുറക്കാനായില്ല.

ഒക്ടോബർ 23-ന് വോട്ടെടുപ്പ് നടന്ന ബിരുദധാരികളുടെയും അധ്യാപകരുടെയും മണ്ഡലങ്ങളിലാണ് എൻഡിഎ സമ്പൂർണ്ണ ആധിപത്യം സ്ഥാപിച്ചത്.

വിജയിച്ച മണ്ഡലങ്ങളും സ്ഥാനാർത്ഥികളും:

- നോർത്ത്-ഈസ്റ്റ് അധ്യാപക മണ്ഡലം: ബിജെപിയുടെ സിറ്റിങ് എംഎൽസി ശശിൽ ജി. നമോഷി കോൺഗ്രസിന്റെ ശരണപ്പ മട്ടൂരിനെ പരാജയപ്പെടുത്തി. കോൺഗ്രസ് ദേശീയ അധ്യക്ഷൻ മല്ലികാർജുൻ ഖാർഗെയുടെ തട്ടകമായ കലബുറഗി ഉൾപ്പെടുന്ന മണ്ഡലത്തിൽ നമോഷിയുടെ അഞ്ചാമത്തെ വിജയമാണിത്.

- സൗത്ത്-ഈസ്റ്റ് ബിരുദധാരി മണ്ഡലം: കോൺഗ്രസ് സ്ഥാനാർത്ഥി ശശി ഹുലികുന്തെ മുട്ടിനെ പരാജയപ്പെടുത്തി ബിജെപിയുടെ കെ.എം. സുരേഷ് വിജയിച്ചു.

- വെസ്റ്റ് ബിരുദധാരി മണ്ഡലം: കോൺഗ്രസിന്റെ മോഹൻ ലിംബികായിയെ ബിജെപി സ്ഥാനാർത്ഥി എസ്.വി. സങ്കനൂർ പരാജയപ്പെടുത്തി.

- ബെംഗളൂരു അധ്യാപക മണ്ഡലം: സിറ്റിങ് കോൺഗ്രസ് എംഎൽസി പുട്ടണ്ണയെ തോൽപ്പിച്ച് ജെഡി(എസ്) സ്ഥാനാർത്ഥി എ.പി. രംഗനാഥ് വിജയം ഉറപ്പിച്ചു.

പ്രതികരണങ്ങളും രാഷ്ട്രീയ പ്രാധാന്യവും:നാല് സീറ്റുകളിലെയും തകർപ്പൻ വിജയത്തിന് പിന്നാലെ പ്രധാനമന്ത്രി നരേന്ദ്ര മോദിയെ കേന്ദ്രമന്ത്രിയും ജെഡിഎസ് നേതാവുമായ എച്ച്.ഡി. കുമാരസ്വാമി അഭിനന്ദിച്ചു. രാജ്യത്തിന്റെ വികസനത്തിനായി പ്രധാനമന്ത്രി നടത്തുന്ന പ്രവർത്തനങ്ങൾക്കുള്ള അംഗീകാരമാണിതെന്നും കർണാടകയിലെ പ്രബുദ്ധരായ അധ്യാപകരും ബിരുദധാരികളും എൻഡിഎയെ നെഞ്ചിലേറ്റിയെന്നും അദ്ദേഹം വ്യക്തമാക്കി. സിദ്ധരാമയ്യ സർക്കാരിന്റെ ജനവിരുദ്ധ നയങ്ങൾക്കും വാഗ്ദാന ലംഘനങ്ങൾക്കുമെതിരെയുള്ള ജനങ്ങളുടെ പ്രതിഷേധമാണ് ഫലത്തിൽ പ്രതിഫലിച്ചതെന്നും 2028-ലെ നിയമസഭാ തെരഞ്ഞെടുപ്പിലെ എൻഡിഎ മുന്നേറ്റത്തിന്റെ സൂചനയാണിതെന്നും കുമാരസ്വാമി കൂട്ടിച്ചേർത്തു.

ഉപമുഖ്യമന്ത്രി ഡി.കെ. ശിവകുമാർ, മന്ത്രിമാർ, കെപിസിസി വർക്കിങ് പ്രസിഡന്റ് ബി.കെ. ഹരിപ്രസാദ് എന്നിവരടക്കം മുൻനിര നേതാക്കൾ പ്രചാരണ രംഗത്തിറങ്ങിയിട്ടും കോൺഗ്രസിന് പരാജയം ഒഴിവാക്കാനായില്ല. തെരഞ്ഞെടുപ്പ് ഫലം സംസ്ഥാന സർക്കാരിന്റെ നിലനിൽപ്പിനെ ബാധിക്കില്ലെങ്കിലും, ബിജെപി–ജെഡിഎസ് സഖ്യത്തിന്റെ വോട്ടുബാങ്ക് ഏകോപനം തെളിയിക്കപ്പെട്ടത് ഭരണപക്ഷത്തിന് വലിയ രാഷ്ട്രീയ ക്ഷീണമായി മാറിയിട്ടുണ്ട്.

---------------

Hindusthan Samachar / Roshith K