Lucknow , 29 ഒക്റ്റോബര് (H.S.)

ലഖ്നൗ: അക്രമങ്ങളിലൂടെയും വിധ്വംസക പ്രവർത്തനങ്ങളിലൂടെയും സാമൂഹിക വ്യവസ്ഥിതിയെ അട്ടിമറിക്കാൻ ശ്രമിക്കുന്ന പ്രസ്ഥാനങ്ങളിലും പ്രതിഷേധങ്ങളിലും പങ്കാളികളാകുന്നവർക്ക് സർക്കാർ ജോലി ലഭിക്കില്ലെന്ന് വ്യക്തമാക്കി ഉത്തർപ്രദേശ് സർക്കാർ. സർക്കാർ വകുപ്പുകൾ, കോർപ്പറേഷനുകൾ, കൗൺസിലുകൾ, തദ്ദേശ സ്വയംഭരണ സ്ഥാപനങ്ങൾ എന്നിവയിലെ നേരിട്ടുള്ള നിയമനങ്ങൾക്കായുള്ള ഉദ്യോഗാർത്ഥികളുടെ സ്വഭാവ പരിശോധനാ (Character Verification) ചട്ടങ്ങൾ കർശനമാക്കിക്കൊണ്ട് സംസ്ഥാന സർക്കാർ പുതിയ മാർഗ്ഗരേഖ പുറത്തിറക്കി. സർക്കാരിന്റെ നിയമന വകുപ്പ് പ്രിൻസിപ്പൽ സെക്രട്ടറി എം. ദേവരാജാണ് ഇതുസംബന്ധിച്ച സുപ്രധാന ഉത്തരവ് പുറപ്പെടുവിച്ചത്.

അക്രമാസക്തമായ മാർഗ്ഗങ്ങളിലൂടെ സാമൂഹിക ഘടനയെയും വ്യവസ്ഥിതിയെയും മാറ്റിമറിക്കാൻ ലക്ഷ്യമിട്ട് പ്രവർത്തിക്കുന്ന സംഘടനകളിൽ അംഗങ്ങളായവർക്കോ അത്തരം പ്രവർത്തനങ്ങളിൽ പങ്കാളികളായവർക്കോ സർക്കാർ സർവീസിൽ നിയമനം നൽകാൻ കഴിയില്ലെന്നാണ് ഉത്തരവിൽ വ്യക്തമാക്കുന്നത്. 21 വയസ്സ് തികഞ്ഞതിന് ശേഷവും വെരിഫിക്കേഷൻ തീയതിക്ക് തൊട്ടുമുമ്പുള്ള മൂന്ന് വർഷ കാലയളവിലും ഇത്തരം അക്രമ പ്രവർത്തനങ്ങളിൽ പങ്കെടുത്തതായി തെളിഞ്ഞാൽ, അവർ ഇപ്പോഴും സജീവമായി അതിൽ ഏർപ്പെട്ടിരിക്കുന്നവരായി തന്നെ കണക്കാക്കും. എന്നാൽ, ഈ കാലയളവിനിടയിൽ അവരുടെ സ്വഭാവത്തിലും പെരുമാറ്റത്തിലും വ്യക്തവും ഗുണപരവുമായ മാറ്റം വന്നിട്ടുണ്ടെന്ന് തെളിയിക്കുന്ന കൃത്യമായ തെളിവുകളുണ്ടെങ്കിൽ മാത്രമേ ഇതിൽ ഇളവ് അനുവദിക്കൂ.

രാഷ്ട്രീയ ആശയങ്ങൾ അയോഗ്യതയാവില്ല; എഫ്.ഐ.ആർ മാത്രം തടസ്സമല്ലകർശന നിയന്ത്രണങ്ങൾ ഏർപ്പെടുത്തുമ്പോഴും വ്യക്തികളുടെ സ്വതന്ത്ര രാഷ്ട്രീയ വീക്ഷണങ്ങളെ പുതിയ ഉത്തരവ് സംരക്ഷിക്കുന്നുണ്ട്. കേവലം രാഷ്ട്രീയപരമായ ചിന്താഗതികളുടെയോ ആശയങ്ങളുടെയോ പേരിൽ ഒരു ഉദ്യോഗാർത്ഥിയെയും സർക്കാർ ജോലിയിൽ നിന്ന് അയോഗ്യനാക്കാൻ പാടില്ലെന്ന് സർക്കാർ കർശന നിർദ്ദേശം നൽകിയിട്ടുണ്ട്. ജനാധിപത്യപരമായ രാഷ്ട്രീയ കാഴ്ചപ്പാടുകളും സായുധമോ അക്രമാസക്തമോ ആയ പ്രവർത്തനങ്ങളും തമ്മിൽ കൃത്യമായ വേർതിരിവ് വേണമെന്നാണ് ഉത്തരവ് ചൂണ്ടിക്കാട്ടുന്നത്.

കൂടാതെ, ഒരാൾക്കെതിരെ എഫ്.ഐ.ആർ രജിസ്റ്റർ ചെയ്തതുകൊണ്ടോ ക്രിമിനൽ അന്വേഷണം നിലവിലുണ്ടെന്നതുകൊണ്ടോ മാത്രം നിയമനത്തിൽ നിന്ന് പൂർണ്ണമായും മാറ്റിനിർത്താൻ കഴിയില്ലെന്നും സർക്കാർ വ്യക്തമാക്കി. അന്വേഷണം പുരോഗമിക്കുന്നു എന്ന ഒരൊറ്റ കാരണം കൊണ്ട് മാത്രം സ്വഭാവ പരിശോധനയിൽ സ്വാഭാവിക അയോഗ്യത (Automatic Disqualification) കൽപ്പിക്കരുതെന്നാണ് നിർദ്ദേശം. കേസുകളുടെ ഗൗരവവും സ്വഭാവവും വിശദമായി പരിശോധിച്ച ശേഷമേ അന്തിമ തീരുമാനം കൈക്കൊള്ളൂ.

പരിശോധനാ റിപ്പോർട്ടിന് 30 ദിവസത്തെ സമയപരിധിഉദ്യോഗാർത്ഥികളുടെ സ്വഭാവം, പശ്ചാത്തലം എന്നിവ സംബന്ധിച്ച പരിശോധനാ റിപ്പോർട്ട് 30 ദിവസത്തിനകം പൊലീസ് പൂർത്തിയാക്കി സമർപ്പിക്കണമെന്നും പുതുക്കിയ മാർഗ്ഗനിർദ്ദേശത്തിൽ പറയുന്നു. നിയമന നടപടികൾ അനാവശ്യമായി വൈകുന്നത് ഒഴിവാക്കാനും സമയബന്ധിതമായി കാര്യങ്ങൾ പൂർത്തിയാക്കാനും ലക്ഷ്യമിട്ടാണ് ഈ സമയപരിധി നിശ്ചയിച്ചിരിക്കുന്നത്.

നേരത്തെ തന്നെ സർക്കാർ സർവീസിൽ ജോലി ചെയ്യുന്ന ജീവനക്കാർക്ക് വീണ്ടും പുതിയ പരിശോധനയുടെ ആവശ്യമില്ലെന്നും ഉത്തരവിൽ പറയുന്നുണ്ട്. എന്നാൽ ആവശ്യമെങ്കിൽ മുൻ വകുപ്പിൽ നിന്നുള്ള ഇവരുടെ സേവന രേഖകളും പെരുമാറ്റച്ചട്ടങ്ങളും അധികൃതർക്ക് ശേഖരിക്കാവുന്നതാണ്. സർക്കാർ സർവീസിലേക്ക് എത്തുന്നവരുടെ പശ്ചാത്തലം സുതാര്യമാക്കുന്നതിനൊപ്പം, നിയമവിരുദ്ധവും രാജ്യവിരുദ്ധവുമായ അക്രമ സമരങ്ങളിൽ ഏർപ്പെടുന്നവർക്കെതിരെ ശക്തമായ സന്ദേശം നൽകാൻ കൂടിയാണ് യോഗി ആദിത്യനാഥ് സർക്കാരിന്റെ ഈ സുപ്രധാന നീക്കം.

---------------

Hindusthan Samachar / Roshith K