Newdelhi , 29 ഒക്റ്റോബര് (H.S.)

ന്യൂഡൽഹി: ദേശീയ തലസ്ഥാനമായ ഡൽഹിയിലും സമീപ നഗരങ്ങളിലും (ഡൽഹി-എൻ.സി.ആർ) ശക്തമായ മഴയും ഇടിമിന്നലും ആഞ്ഞടിച്ചതിനെ തുടർന്ന് കേന്ദ്ര കാലാവസ്ഥാ വകുപ്പ് (IMD) അതീവ ജാഗ്രതാ നിർദേശമായ 'റെഡ് അലർട്ട്' പുറപ്പെടുവിച്ചു. അപ്രതീക്ഷിതമായി എത്തിയ ശക്തമായ മഴയെ തുടർന്ന് നഗരത്തിന്റെ വിവിധ ഭാഗങ്ങളിൽ കനത്ത നാശനഷ്ടങ്ങളും ഗതാഗത തടസ്സങ്ങളും റിപ്പോർട്ട് ചെയ്തിട്ടുണ്ട്.

കാലാവസ്ഥാ നിരീക്ഷണ കേന്ദ്രത്തിന്റെ ഏറ്റവും പുതിയ നൗകാസ്റ്റ് (Nowcast) മുന്നറിയിപ്പ് പ്രകാരം നോർത്ത് ഡൽഹി, നോർത്ത് വെസ്റ്റ് ഡൽഹി, വെസ്റ്റ് ഡൽഹി, സൗത്ത് വെസ്റ്റ് ഡൽഹി എന്നീ മേഖലകളിലാണ് റെഡ് അലർട്ട് നിലവിലുള്ളത്. സെൻട്രൽ ഡൽഹി, നോർത്ത് ഈസ്റ്റ് ഡൽഹി, സൗത്ത് ഈസ്റ്റ് ഡൽഹി എന്നിവിടങ്ങളിൽ 'ഓറഞ്ച് അലർട്ടും' സമീപ നഗരമായ ഗുരുഗ്രാമിൽ 'യെല്ലോ അലർട്ടും' പ്രഖ്യാപിച്ചിട്ടുണ്ട്. മഴയ്ക്കൊപ്പം മണിക്കൂറിൽ 50 മുതൽ 60 കിലോമീറ്റർ വരെയും, ചില ഘട്ടങ്ങളിൽ 70 കിലോമീറ്റർ വരെയും വേഗതയിൽ കാറ്റടിക്കാനും ശക്തമായ ഇടിമിന്നലിനും സാധ്യതയുണ്ടെന്ന് മുന്നറിയിപ്പിൽ പറയുന്നു. പഞ്ചാബ്, ഹരിയാന, ചണ്ഡീഗഡ്, ഡൽഹി എന്നിവയുൾപ്പെടുന്ന മേഖലകളിൽ ഒറ്റപ്പെട്ടയിടങ്ങളിൽ ആലിപ്പഴ വീഴ്ചയ്ക്കും സാധ്യത പ്രവചിച്ചിട്ടുണ്ട്.

ഉച്ചയോടെ ആരംഭിച്ച് തുടരുന്ന അതിശക്തമായ മഴ ഡൽഹിയിലെ ജനജീവിതത്തെ പൂർണ്ണമായും ബാധിച്ചു. പ്രമുഖ റോഡുകളിലും അടിപ്പാതകളിലും വലിയ തോതിൽ വെള്ളക്കെട്ട് രൂപപ്പെട്ടതോടെ നഗരത്തിൽ വൻ ഗതാഗതക്കുരുക്കാണ് അനുഭവപ്പെടുന്നത്. ഓഫീസ് വിട്ട് മടങ്ങുന്ന ജീവനക്കാരും സ്കൂൾ-കോളേജ് വിദ്യാർത്ഥികളും അടക്കമുള്ള യാത്രക്കാർ മണിക്കൂറുകളോളം നിരത്തുകളിൽ കുടുങ്ങിക്കിടക്കുകയാണ്. ചിലയിടങ്ങളിൽ മരങ്ങൾ കടപുഴകി വീണത് റോഡ് ഗതാഗതത്തെ കൂടുതൽ ദുഷ്കരമാക്കി. വിമാനത്താവളത്തിലേക്കും പ്രധാന റെയിൽവേ സ്റ്റേഷനുകളിലേക്കുമുള്ള പാതകളിൽ വെള്ളം കയറിയത് യാത്രാ സർവീസുകളെയും ബാധിച്ചു.

മഴയെത്തുടർന്ന് തലസ്ഥാനത്തെ താപനിലയിൽ കുത്തനെ ഇടിവുണ്ടായി. കൂടിയ താപനില 26 മുതൽ 27 ഡിഗ്രി സെൽഷ്യസ് വരെയായി താഴ്ന്നപ്പോൾ, കുറഞ്ഞ താപനില 17 മുതൽ 19 ഡിഗ്രി സെൽഷ്യസ് വരെയായി കുറഞ്ഞു. കഴിഞ്ഞ കുറച്ചു ദിവസങ്ങളായി ഡൽഹിയിലെ ജനങ്ങളെ ശ്വാസംമുട്ടിച്ചിരുന്ന വായുമലിനീകരണത്തിന് ഈ കനത്ത മഴ നേരിയ തോതിൽ ആശ്വാസം പകർന്നെങ്കിലും, കനത്ത കാറ്റും മഴയും സൃഷ്ടിച്ച അപ്രതീക്ഷിത പ്രതിസന്ധി ജനങ്ങളെ ദുരിതത്തിലാക്കി. കൂടാതെ, കാർമേഘാവൃതമായ ആകാശം കാരണം കർവാ ചൗത്ത് ആഘോഷങ്ങളുടെ ഭാഗമായുള്ള ചന്ദ്രദർശനം തടസ്സപ്പെടുമെന്ന ആശങ്കയും പ്രദേശവാസികൾ പങ്കുവെക്കുന്നുണ്ട്.

അടിയന്തര സാഹചര്യങ്ങൾ കണക്കിലെടുത്ത് നഗരസഭാ അധികൃതരും ഡൽഹി പോലീസും ദുരന്തനിവാരണ വിഭാഗവും ജാഗ്രതയിലാണ്. അനാവശ്യമായി ജനങ്ങൾ പുറത്തിറങ്ങരുതെന്നും വെള്ളക്കെട്ടുള്ള അടിപ്പാതകളിലൂടെയുള്ള യാത്രകൾ പൂർണ്ണമായും ഒഴിവാക്കണമെന്നും അധികൃതർ കർശന നിർദേശം നൽകിയിട്ടുണ്ട്. ഇടിമിന്നലുള്ള സമയങ്ങളിൽ മരങ്ങളുടെയോ ദുർബലമായ വൈദ്യുത തൂണുകളുടെയോ ചുവട്ടിൽ നിൽക്കരുതെന്നും ജാഗ്രതാ നിർദേശത്തിൽ വ്യക്തമാക്കുന്നു. വരും മണിക്കൂറുകളിലും മഴയും കാറ്റും തുടരാൻ സാധ്യതയുള്ളതിനാൽ ജാഗ്രത തുടരണമെന്നാണ് കാലാവസ്ഥാ വകുപ്പ് അറിയിച്ചിരിക്കുന്നത്.

---------------

Hindusthan Samachar / Roshith K