Newdelhi , 30 ഒക്റ്റോബര് (H.S.)

ന്യൂഡൽഹി: ദേശീയ തലസ്ഥാനത്ത് പെയ്യുന്ന കനത്ത മഴയെത്തുടർന്ന് മുഖ്യ തിരഞ്ഞെടുപ്പ് കമ്മീഷണർ (സിഇസി) ഗ്യാനേഷ് കുമാറിനെതിരെ ‘ഇന്ത്യ’ മുന്നണി വെള്ളിയാഴ്ച നടത്താനിരുന്ന പ്രതീകാത്മക ‘ജനകീയ ഇംപീച്ച്മെന്റ്’ നടപടികൾ ഒക്ടോബർ 31 ശനിയാഴ്ചയിലേക്ക് മാറ്റി. ന്യൂഡൽഹിയിലെ 10 രാജാജി മാർഗിലുള്ള കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിലായിരുന്നു ഈ പരിപാടി സംഘടിപ്പിക്കാൻ തീരുമാനിച്ചിരുന്നത്. തിരഞ്ഞെടുപ്പ് പ്രക്രിയയിലെ ക്രമക്കേടുകളും ‘വോട്ട് മോഷണ’ ആരോപണങ്ങളും ചൂണ്ടിക്കാട്ടി ഗ്യാനേഷ് കുമാറിനെ സ്ഥാനത്തുനിന്ന് നീക്കണമെന്ന് ആവശ്യപ്പെട്ടാണ് പ്രതിപക്ഷ സഖ്യം ഈ പ്രതിഷേധത്തിന് രൂപം നൽകിയത്.

പരിപാടി മാറ്റിവെച്ചതിനെ തുടർന്ന് മാധ്യമങ്ങളോട് സംസാരിച്ച ലോക്സഭാ പ്രതിപക്ഷ നേതാവ് രാഹുൽ ഗാന്ധി, രാജ്യത്തെ ജനാധിപത്യം തകർക്കപ്പെടുന്നതിനെതിരെ പ്രതിപക്ഷം ഒറ്റക്കെട്ടായി നിലകൊള്ളുകയാണെന്ന് വ്യക്തമാക്കി. പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ എന്നിവർ രാജ്യത്തെ ഭരണഘടനാ സ്ഥാപനങ്ങളെയും ജനാധിപത്യ സംവിധാനങ്ങളെയും തകർക്കുകയാണെന്ന് അദ്ദേഹം ആരോപിച്ചു.

ഡൽഹിയിൽ നടക്കുന്ന പ്രതിഷേധങ്ങളിൽ പങ്കെടുക്കാൻ രാജ്യത്തിന്റെ വിവിധ ഭാഗങ്ങളിൽ നിന്നുമെത്തുന്ന ജനങ്ങളെയും പ്രവർത്തകരെയും കേന്ദ്ര സർക്കാർ തടയാൻ ശ്രമിക്കുകയാണെന്നും രാഹുൽ ഗാന്ധി കുറ്റപ്പെടുത്തി. ഉത്തർപ്രദേശ്, ബിഹാർ, മധ്യപ്രദേശ്, രാജസ്ഥാൻ, ഹരിയാന, തെലങ്കാന, പഞ്ചാബ് തുടങ്ങിയ സംസ്ഥാനങ്ങളിൽ നിന്ന് ഡൽഹിയിലേക്ക് യാത്ര ചെയ്യുന്ന സാധാരണക്കാരെയും പ്രവർത്തകരെയും വഴിയിൽ തടയുകയാണെന്ന് അദ്ദേഹം ചൂണ്ടിക്കാട്ടി. നവംബർ 1-ന് രാംലീല മൈതാനത്തേക്ക് നടക്കുന്ന പ്രതിഷേധ മാർച്ചിലേക്ക് രാഷ്ട്രീയ പാർട്ടികൾക്ക് പുറമെ സന്നദ്ധ സംഘടനകൾ, സാമൂഹിക പ്രവർത്തകർ, സിവിൽ സൊസൈറ്റി പ്രതിനിധികൾ, മാധ്യമപ്രവർത്തകർ തുടങ്ങി എല്ലാ ജനവിഭാഗങ്ങളെയും അദ്ദേഹം സ്വാഗതം ചെയ്തു.

പ്രതീകാത്മക വിചാരണ നടത്തുന്നതിനായി കോൺഗ്രസ് നേരത്തെ കോൺസ്റ്റിറ്റ്യൂഷൻ ക്ലബ്ബ്, തൽക്കത്തോറ സ്റ്റേഡിയം തുടങ്ങിയ വേദികൾക്ക് ശ്രമിച്ചിരുന്നെങ്കിലും അനുമതി ലഭിക്കാതിരുന്നതിനെ തുടർന്നാണ് ഖാർഗെയുടെ ഔദ്യോഗിക വസതി വേദിയായി നിശ്ചയിച്ചത്. പരിപാടിയുടെ മുന്നൊരുക്കങ്ങൾ ചർച്ച ചെയ്യുന്നതിനായി വ്യാഴാഴ്ച പ്രതിപക്ഷ നേതാക്കൾ പ്രത്യേക യോഗം ചേർന്നിരുന്നു. കോൺഗ്രസ് ജനറൽ സെക്രട്ടറിമാരായ പ്രിയങ്ക ഗാന്ധി വാദ്ര, ജയറാം രമേശ്, കെ.സി. വേണുഗോപാൽ, മുതിർന്ന നേതാവ് മീരാ കുമാർ, തൃണമൂൽ കോൺഗ്രസിന്റെ ഡെറക് ഒബ്രിയൻ, സമാജ്വാദി പാർട്ടിയുടെ ഹരേന്ദ്ര മാലിക്, ജെഎംഎമ്മിന്റെ മഹുവ മാജി, സിപിഐ(എം) രാജ്യസഭാ നേതാവ് ജോൺ ബ്രിട്ടാസ് എന്നിവരടക്കമുള്ള പ്രമുഖ നേതാക്കൾ ഈ തയ്യാറെടുപ്പ് യോഗത്തിൽ പങ്കെടുത്തു.

വോട്ടർ പട്ടികയിലെ പ്രത്യേക തീവ്ര പരിഷ്കരണവുമായി (SIR) ബന്ധപ്പെട്ട ക്രമക്കേടുകൾ ഉയർത്തിക്കാട്ടിയാണ് മുഖ്യ തിരഞ്ഞെടുപ്പ് കമ്മീഷണറുടെ രാജി പ്രതിപക്ഷം ആവശ്യപ്പെടുന്നത്. ഇതിനുപുറമെ, വോട്ട് തട്ടിപ്പിനെതിരെ പ്രതിഷേധിച്ച് നവംബർ 1-ന് രാംലീല മൈതാനത്തേക്ക് കോൺഗ്രസ് പ്രഖ്യാപിച്ച ‘ദില്ലി ചലോ’ മാർച്ചിൽ പത്തു ലക്ഷത്തോളം പേരെ അണിനിരത്താനാണ് പ്രതിപക്ഷ പാർട്ടികളുടെ നീക്കം.

---------------

Hindusthan Samachar / Roshith K