Newdelhi, 30 ഒക്റ്റോബര് (H.S.)

ന്യൂഡൽഹി: ദീപാവലി-ധൻതേരസ് ആഘോഷങ്ങൾക്കായുള്ള വിപണി സജീവമായിരിക്കെ, നവംബർ ഒന്നിന് തലസ്ഥാനത്തെ രാംലീല മൈതാനത്ത് പ്രതിപക്ഷ പാർട്ടികളുടെ കൂട്ടായ്മയായ 'ഇന്ത്യാ' (INDIA) മുന്നണി നടത്താനിരിക്കുന്ന മഹാറാലിക്കെതിരെ ഡൽഹിയിലെ വ്യാപാരികൾ രംഗത്ത്. റാലി മാറ്റിവെക്കണമെന്നാവശ്യപ്പെട്ട് ചേംബർ ഓഫ് ട്രേഡ് ആൻഡ് ഇൻഡസ്ട്രി (CTI) ഉൾപ്പെടെയുള്ള വ്യാപാരി സംഘടനകൾ കോൺഗ്രസ് പാർലമെന്ററി പാർട്ടി അധ്യക്ഷ സോണിയാ ഗാന്ധിക്ക് കത്തയച്ചു. ഇരുപത് ലക്ഷത്തോളം വരുന്ന വ്യാപാരികളെയും ലക്ഷക്കണക്കിന് തൊഴിലാളികളെയും റാലി വഴിയുണ്ടാകുന്ന ഗതാഗത നിയന്ത്രണങ്ങൾ കടുത്ത പ്രതിസന്ധിയിലാക്കുമെന്നാണ് സംഘടനകളുടെ മുന്നറിയിപ്പ്.

ദീപാവലിക്ക് മുന്നോടിയായുള്ള ദിവസങ്ങൾ ഡൽഹിയിലെ വ്യാപാര മേഖലയ്ക്ക് ഏറ്റവും വരുമാനം ലഭിക്കുന്ന സമയമാണ്. ധൻതേരസ്, ദീപാവലി സീസണിൽ മാത്രം തലസ്ഥാനത്തെ വിപണിയിൽ പതിനായിരക്കണക്കിന് കോടി രൂപയുടെ വിറ്റുവരവാണ് സാധാരണയായി നടക്കാറുള്ളത്.എന്നാൽ, രാംലീല മൈതാനത്ത് വൻ ജനക്കൂട്ടത്തെ പങ്കെടുപ്പിച്ച് രാഷ്ട്രീയ റാലി നടത്തുമ്പോൾ വിപുലമായ ഗതാഗത നിയന്ത്രണങ്ങളും റോഡ് ഉപരോധങ്ങളും ഏർപ്പെടുത്തേണ്ടി വരും. ഇത് ഉപഭോക്താക്കൾക്ക് കടകളിലേക്കെത്താനും ചരക്കുനീക്കത്തിനും കടുത്ത തടസ്സങ്ങൾ സൃഷ്ടിക്കുമെന്ന് സി.ടി.ഐ ചെയർമാൻ ബ്രിജേഷ് ഗോയൽ കത്തിൽ ചൂണ്ടിക്കാട്ടി.

റാലി നടക്കുന്നതിന് ഒരു ദിവസം മുൻപ് തന്നെ പല ട്രാൻസ്പോർട്ട് ഏജൻസികളും ഈ മേഖലകളിലേക്ക് വാഹനങ്ങൾ എത്തിക്കാൻ മടിക്കുകയാണെന്നും, ഇത് മൊത്തവ്യാപാരത്തെയും ചില്ലറവിൽപ്പനയെയും ഒരേപോലെ ബാധിക്കുമെന്നും കച്ചവടക്കാർ ഭയപ്പെടുന്നു. സദർ ബസാർ, ചാന്ദ്നി ചൗക്ക്, ഖാരി ബാവോലി, കശ്മീരി ഗേറ്റ്, ഭഗീരഥ് പാലസ് തുടങ്ങിയ പഴയ ഡൽഹിയിലെ പ്രധാന മാർക്കറ്റുകളിലെല്ലാം ഇതുമൂലം വൻ നഷ്ടം നേരിടേണ്ടി വരും. കഴിഞ്ഞ സെപ്റ്റംബർ, ഒക്ടോബർ മാസങ്ങളിലുണ്ടായ തുടർച്ചയായ സമരങ്ങളും ട്രാഫിക് നിയന്ത്രണങ്ങളും കാരണം വ്യാപാരികൾക്ക് ഇതിനകം തന്നെ കോടികളുടെ നഷ്ടം സംഭവിച്ചിട്ടുണ്ടെന്നും അവർ ഓർമ്മിപ്പിച്ചു.

റാലി പൂർണ്ണമായി ഒഴിവാക്കണമെന്നല്ല തങ്ങളുടെ ആവശ്യമെന്നും, ദീപാവലി ആഘോഷങ്ങൾ കഴിയും വരെ തീയതി മാറ്റിവെക്കണമെന്നാണ് അഭ്യർത്ഥിക്കുന്നതെന്നും വ്യാപാരികൾ വ്യക്തമാക്കി. അതല്ലെങ്കിൽ നഗരത്തിന്റെ വാണിജ്യ കേന്ദ്രങ്ങളെ ബാധിക്കാത്ത രീതിയിൽ ബുരാരി ഗ്രൗണ്ട് പോലുള്ള ബദൽ വേദികളിലേക്ക് പരിപാടി മാറ്റണമെന്നും നിർദ്ദേശമുണ്ട്.കടയുടമകളെ മാത്രമല്ല, ഈ വിപണികളെ ആശ്രയിച്ച് ജീവിക്കുന്ന ദിവസവേതനക്കാർ, സെയിൽസ് ജീവനക്കാർ, കയറ്റിറക്ക് തൊഴിലാളികൾ, ഡെലിവറി ഏജന്റുമാർ എന്നിവരുടെ വരുമാനത്തെയും ഈ സ്തംഭനാവസ്ഥ നേരിട്ട് ബാധിക്കും.

രാഹുൽ ഗാന്ധിക്കും മറ്റ് സഖ്യകക്ഷി നേതാക്കൾക്കും നേരത്തെ സമാനമായ നിവേദനങ്ങൾ നൽകിയിരുന്നുവെങ്കിലും അനുകൂല നടപടികൾ ഉണ്ടാകാത്ത സാഹചര്യത്തിലാണ് വ്യാപാരികൾ സോണിയാ ഗാന്ധിയുടെ ഇടപെടൽ തേടിയിരിക്കുന്നത്. ദീപാവലി വിപണി സംരക്ഷിക്കാൻ അടിയന്തരമായി വിഷയത്തിൽ ഇടപെടണമെന്നും വ്യാപാരികളുടെ ഉപജീവന മാർഗ്ഗം തടസ്സപ്പെടാതിരിക്കാൻ അനുഭാവപൂർവ്വം തീരുമാനമെടുക്കണമെന്നുമാണ് കത്തിലെ പ്രധാന ആവശ്യം.

---------------

Hindusthan Samachar / Roshith K