Enter your Email Address to subscribe to our newsletters
Luknow, 04 ഒക്റ്റോബര്‍ (H.S.)
അലിഗഡ് മുസ്ലിം സര്‍വകലാശാലയില്‍ വിദ്യാര്‍ഥി യൂണിയന് തെരഞ്ഞെടുപ്പ് നടത്തണമെന്നാവശ്യപ്പെട്ട് പ്രതിഷേധം ശക്തമാവുന്നു. സമരത്തിന്റെ ഭാഗമായി വിദ്യാര്‍ഥികള്‍ സര്‍വകലാശാലയുടെ നാല് പ്രവേശന കവാടങ്ങളും ഉപരോധിച്ചു. കാമ്പസ് ഹോസ്റ്റലില്‍ പൊലീസ് നടത്തിയ റെയ്ഡിനെ തുടര്‍ന്ന് വിദ്യാര്‍ഥികള്‍ പ്രോക്ടറുടെ ഓഫീസിലേക്ക് മാര്‍ച്ച് ചെയ്യാന്‍ ശ്രമിച്ചതോടെ ശനിയാഴ്ച വൈകുന്നേരത്തോടെ സ്ഥിതിഗതികള്‍ സംഘര്‍ഷഭരിതമായി.
എം എം ഹാളിലെ ഹോസ്റ്റലില്‍ പൊലീസ് നടത്തിയ റെയ്ഡില്‍ നാല് പേരെ കസ്റ്റഡിയിലെടുത്തതായി റിപ്പോര്‍ട്ടുകള്‍ പുറത്തുവന്നതിനെ തുടര്‍ന്നാണ് സംഘര്‍ഷം പൊട്ടിപ്പുറപ്പെട്ടത്. എന്നാല്‍ സര്‍വകലാശാലയ്ക്ക് ഈ റെയ്ഡുമായി യാതൊരു ബന്ധവുമില്ലെന്ന് പ്രോക്ടര്‍ നാവേദ് ഖാന്‍ വ്യക്തമാക്കി. കാമ്പസിലെ സാമൂഹ്യവിരുദ്ധരെയും പുറത്തുനിന്നുള്ളവരെയും കണ്ടെത്താനാണ് പൊലീസ് എത്തിയത്. പിടിയിലായവരില്‍ മൂന്ന് പേര്‍ യഥാര്‍ഥ വിദ്യാര്‍ഥികളാണെന്ന് കണ്ട് വിട്ടയച്ചെങ്കിലും, സംശയാസ്പദമായ പശ്ചാത്തലമുള്ള നാലാമത്തെ ആളെ പൊലീസ് അറസ്റ്റ് ചെയ്യുകയും ജയിലിലേക്ക് അയക്കുകയും ചെയ്തു. വിദ്യാര്‍ഥി സമരം അട്ടിമറിക്കാന്‍ സര്‍വകലാശാല അധികൃതരാണ് പൊലീസിനെ വിളിച്ചുവരുത്തിയത് എന്ന ആരോപണം പ്രോക്ടര്‍ തള്ളിക്കളഞ്ഞു.
കഴിഞ്ഞ ഏഴ് വര്‍ഷത്തിലധികമായി പ്രവര്‍ത്തനരഹിതമായി കിടക്കുന്ന സര്‍വകലാശാലാ യൂണിയന് തെരഞ്ഞെടുപ്പ് പുനഃസ്ഥാപിക്കണമെന്ന് ആവശ്യപ്പെട്ട് സെപ്റ്റംബര്‍ 21 മുതല്‍ സസ്‌പെന്‍ഷനിലായ ബിരുദാനന്തര ബിരുദ വിദ്യാര്‍ഥി യാസിര്‍ ഫഹദ് അനിശ്ചിതകാല നിരാഹാര സമരം നടത്തിവരികയാണ്. സമരത്തിന്റെ ഭാഗമായി ശനിയാഴ്ച അടച്ച കവാടങ്ങള്‍ ഞായറാഴ്ച രാവിലെയോടെ സുരക്ഷാ ഉദ്യോഗസ്ഥര്‍ തുറന്നു. എന്നാല്‍ യാസിര്‍ ഫഹദിന്റെ ആരോഗ്യനില വഷളാകുന്നത് വിദ്യാര്‍ഥികളില്‍ ആശങ്ക പരത്തിയിട്ടുണ്ട്. വിദ്യാര്ഥികളുടെ ആവശ്യത്തിന് പിന്തുണയുമായി ഭീം ആര്‍മി മേധാവി ചന്ദ്രശേഖര്‍ ആസാദ് രംഗത്തെത്തിയിട്ടുണ്ട്. യൂണിയന് തെരഞ്ഞെടുപ്പ് വേണമെന്ന വിദ്യാര്ഥികളുടെ ആവശ്യത്തെ ഞായറാഴ്ച ഭീം ആര്‍മി തലവന്‍ ചന്ദ്രശേഖര്‍ ആസാദ് പിന്തുണയ്ക്കുകയും, പ്രതിഷേധക്കാരുമായി ചര്‍ച്ച ആരംഭിക്കാന്‍ സര്‍വകലാശാലാ അധികൃതരോട് ആവശ്യപ്പെടുകയും ചെയ്തു. യൂണിവേഴ്സിറ്റി കോടതി, എക്സിക്യൂട്ടീവ് കൗണ്‍സില്‍, അക്കാദമിക് കൗണ്‍സില്‍ എന്നിവയിലേക്കുള്ള അധ്യാപക പ്രതിനിധികളുടെ തെരഞ്ഞെടുപ്പ് നടത്താന്‍ അടിയന്തര നടപടികള്‍ സ്വീകരിക്കണമെന്ന് ആവശ്യപ്പെട്ട് എഎംയു ടീച്ചേഴ്സ് അസോസിയേഷന്‍ (AMUTA) സെക്രട്ടറി അഷ്‌റഫ് മതീന്‍ വൈസ് ചാന്‍സലര്‍ നൈമ ഖാത്തൂന് കത്തെഴുതി. തെരഞ്ഞെടുപ്പ് നടത്തുന്നതില്‍ ഏറെ കാലതാമസം നേരിട്ടിട്ടുണ്ടെന്ന് അദ്ദേഹം ചൂണ്ടിക്കാട്ടി.
---------------
Hindusthan Samachar / Sreejith S
