Enter your Email Address to subscribe to our newsletters
Kasargode, 04 ഒക്റ്റോബര്‍ (H.S.)
കാസര്കോട് കുമ്പള അനന്തപുരം വ്യവസായ എസ്റ്റേറ്റിലെ ഫാക്ടറിയിലുണ്ടായ ദാരുണമായ അപകടത്തില്‍ ഒഡീഷ സ്വദേശിയായ തൊഴിലാളി മരിച്ചു. ഫാക്ടറിയിലെ ബോയിലറില്‍നിന്ന് ശക്തമായ രീതിയില്‍ ഗ്യാസ് പുറത്തേക്ക് പ്രവഹിക്കുകയും, തുടര്‍ന്നുണ്ടായ പരിഭ്രാന്തിയിലും അപകടത്തിലും പെട്ട് തൊഴിലാളികള്‍ ആഴമുള്ള കോഴിമാലിന്യക്കുഴിയിലേക്ക് തെറിച്ചുവീഴുകയുമായിരുന്നു. ഒഡീഷ സ്വദേശിയായ മഹേശ്വര്‍ (19) ആണ് ചികിത്സയ്ക്കിടെ മരണപ്പെട്ടത്. സംഭവത്തില്‍ മറ്റ് രണ്ട് ഇതര സംസ്ഥാന തൊഴിലാളികള്‍ക്കും ഗുരുതരമായി പരിക്കേറ്റിട്ടുണ്ട്.
കോഴി മാലിന്യങ്ങളില്‍ നിന്ന് മൂല്യവര്‍ധിത ഉല്‍പ്പന്നങ്ങള്‍ നിര്‍മിക്കുന്ന 'ഓക്സിജന്‍ പ്രൊമാക്സ്' എന്ന ഫാക്ടറിയിലാണ് ഈ ഞെട്ടിക്കുന്ന അപകടം സംഭവിച്ചത്. ഫാക്ടറിയിലെ ബോയിലറില്‍നിന്ന് ഗ്യാസ് അതിശക്തമായി പുറത്തേക്ക് പ്രവഹിച്ചതാണ് വലിയ ദുരന്തത്തിലേക്ക് കാര്യങ്ങള്‍ എത്തിച്ചത്. ഗ്യാസ് ചോര്‍ച്ചയെ തുടര്‍ന്ന് സ്ഥലത്തുണ്ടായിരുന്ന തൊഴിലാളികള്‍ പരിഭ്രാന്തരായി ചിതറി ഓടുന്നതിനിടയിലാണ് മഹേശ്വര്‍ സമീപത്തെ ആഴമുള്ള കോഴിമാലിന്യക്കുഴിയിലേക്ക് തെറിച്ചുവീണത്. മഹേശ്വറിനെ രക്ഷപ്പെടുത്താന്‍ ശ്രമിക്കുന്നതിനിടയിലാണ് മറ്റ് രണ്ടു തൊഴിലാളികളും അപകടത്തില്‍പ്പെട്ടത്. ഫാക്ടറിയിലെ മറ്റ് തൊഴിലാളികള്‍ ഉടന്‍ തന്നെ സ്ഥലത്ത് ഓടിയെത്തി ഏറെ പരിശ്രമത്തിനൊടുവിലാണ് മൂന്നുപേരെയും മാലിന്യക്കുഴിയില്‍ നിന്ന് കരയ്‌ക്കെത്തിച്ചത്. തുടര്‍ന്ന് ഇവരെ ഉടന്‍ തന്നെ ആശുപത്രികളില്‍ എത്തിക്കുകയായിരുന്നു.
അപകടത്തില്‍ ഗുരുതരമായി പരിക്കേറ്റ മഹേശ്വറിനെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. പരിക്കേറ്റ മറ്റ് ഇതര സംസ്ഥാന തൊഴിലാളികളായ താനൂജി (24), സിദ്ധാനന്ദ (21) എന്നിവരില്‍ താനൂജിയുടെ നില അതീവ ഗുരുതരമായതിനാല്‍ വിദഗ്ധ ചികിത്സയ്ക്കായി മംഗളൂരുവിലെ ആശുപത്രിയിലേക്ക് മാറ്റിയിരിക്കുകയാണ്. പരിക്കേറ്റ സിദ്ധാനന്ദയെ കുമ്പള സഹകരണ ആശുപത്രിയിലും പ്രവേശിപ്പിച്ചു ചികിത്സ നല്‍കി വരുന്നു. ഫാക്ടറിയിലെ ബോയിലര് തകരാറിലായാണ് ഗ്യാസ് ശക്തമായി പുറത്തേക്ക് പ്രവഹിച്ചതെന്നാണ് പ്രാഥമിക നിഗമനം. സംഭവത്തെക്കുറിച്ച് ഫയര്‍ഫോഴ്സും ഫാക്ടറി അധികൃതരും പൊലീസും കര്‍ശനമായ പരിശോധനകള്‍ ആരംഭിച്ചിട്ടുണ്ട്. അപകടത്തിന്റെ കൃത്യമായ കാരണം എന്താണെന്നത് സമഗ്രമായ അന്വേഷണത്തിന് ശേഷം മാത്രമേ വ്യക്തമാകൂവെന്ന് അധികൃതര്‍ അറിയിച്ചു. വിവരമറിഞ്ഞ് കുമ്പള പൊലീസും സ്ഥലത്തെത്തി മേല്‍നടപടികള്‍ സ്വീകരിച്ചു. ഇതര സംസ്ഥാന തൊഴിലാളികളുടെ സുരക്ഷാ മാനദണ്ഡങ്ങള്‍ പാലിക്കുന്നതില്‍ ഫാക്ടറി മാനേജ്മെന്റിന്റെ ഭാഗത്തുനിന്ന് വീഴ്ചയുണ്ടായിട്ടുണ്ടോ എന്ന കാര്യവും പൊലീസ് അന്വേഷണ പരിധിയിലുണ്ട്.
---------------
Hindusthan Samachar / Sreejith S
