Enter your Email Address to subscribe to our newsletters
New delhi, 05 ഒക്റ്റോബര്‍ (H.S.)
മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെ പുറത്താക്കണമെന്ന ഹര്‍ജിയില്‍ നടപടി സ്വീകരിച്ച് സുപ്രീം കോടതി. ഹര്ജി പരിഗണിച്ച ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച്, കേന്ദ്ര സര്‍ക്കാരിനും ഇലക്ഷന്‍ കമ്മീഷനും അടിയന്തര നോട്ടീസ് അയച്ചു. കേസില്‍ ഒരാഴ്ചയ്ക്കകം കൃത്യമായ മറുപടി നല്‍കണമെന്നാണ് കോടതി ആവശ്യപ്പെട്ടിരിക്കുന്നത്.
അതേസമയം, ഗ്യാനേഷ് കുമാറിനെ പുറത്താക്കണമെന്ന് ആവശ്യപ്പെട്ടുള്ള ഹര്‍ജിയില്‍ അടിയന്തര ഇടക്കാല ഉത്തരവ് പുറപ്പെടുവിക്കാന്‍ സുപ്രീം കോടതി വിസമ്മതിച്ചു. എന്നാല്‍, തെരഞ്ഞെടുപ്പ് കമ്മീഷനില്‍ ഏകപക്ഷീയമായ തീരുമാനങ്ങള്‍ നടക്കുന്നുവെന്ന ആരോപണത്തില്‍ സുപ്രീം കോടതി കടുത്ത ആശങ്ക രേഖപ്പെടുത്തി. ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച്, സി.ഇ.സി ഗ്യാനേഷ് കുമാര്‍, മറ്റ് രണ്ട് കമ്മീഷണര്‍മാര്‍, ഇലക്ഷന്‍ കമ്മീഷന്‍ എന്നിവര്‍ക്ക് അടിയന്തര നോട്ടീസ് അയച്ചു.
ഗ്യാനേഷ് കുമാര്‍ ഏകപക്ഷീയമായി എടുത്ത തീരുമാനങ്ങളെയും മാര്‍ഗനിര്‍ദ്ദേശങ്ങളെയും സോഫ്റ്റ്വെയര്‍ മാറ്റങ്ങളെയും ചോദ്യം ചെയ്ത് രാകേഷ് കുമാര്‍ സിംഗും അഭിഭാഷകനായ ശൈലേന്ദ്ര മണി ത്രിപാഠിയും സമര്‍പ്പിച്ച ഹര്‍ജികളിലാണ് സുപ്രീം കോടതി ബെഞ്ച് വാദം കേട്ടത്. തെരഞ്ഞെടുപ്പ് കമ്മീഷന്റെ തീരുമാനങ്ങള്‍ നിയമപ്രകാരമല്ല എടുത്തതെന്ന് രേഖകളില്‍ തെളിഞ്ഞാല്‍, ആ തീരുമാനങ്ങള്‍ റദ്ദാക്കാനും അവ അസാധുവാക്കാനും മടിക്കില്ലെന്ന് സുപ്രീം കോടതി കടുത്ത ഭാഷയില്‍ മുന്നറിയിപ്പ് നല്‍കി. ആരോപണങ്ങളില്‍ ഒരാഴ്ചയ്ക്കകം തികച്ചും സുതാര്യമായ മറുപടി നല്‍കാനാണ് കോടതിയുടെ നിര്‍ദേശം.
കേസില്‍ അന്തിമ തീരുമാനം വരുന്നത് വരെ ഗ്യാനേഷ് കുമാറിനെ സസ്പെന്‍ഡ് ചെയ്യണമെന്നും, കമ്മീഷന്റെ പ്രവര്‍ത്തനങ്ങള്‍ മറ്റ് രണ്ട് കമ്മീഷണര്‍മാരായ സുഖ്ബീര്‍ സിംഗ് സന്ധുവും വിവേക് ജോഷിയും ചേര്‍ന്ന് സംയുക്തമായി നടത്തണമെന്നും സിംഗ് നല്‍കിയ ഹര്‍ജിയില്‍ ആവശ്യപ്പെടുന്നു. ഔദ്യോഗിക കൃത്യനിര്‍വഹണത്തില്‍ പരാജയപ്പെട്ടതിന് സി.ഇ.സിക്കെതിരെയും മറ്റ് ഉദ്യോഗസ്ഥര്‍ക്കെതിരെയും ക്രിമിനല്‍ നടപടികള്‍ സ്വീകരിക്കണമെന്ന് ഹര്‍ജിയില്‍ പറയുന്നു. കമ്മീഷനിലെ ഭൂരിപക്ഷ അഭിപ്രായം തേടാതെ സി.ഇ.സി ഏകപക്ഷീയമായി നടപ്പിലാക്കിയ എല്ലാ മാര്‍ഗനിര്‍ദേശങ്ങളും സോഫ്റ്റ്വെയര്‍ മാറ്റങ്ങളും നിയമവിരുദ്ധമായി പ്രഖ്യാപിച്ച് റദ്ദാക്കണമെന്നും ഹര്‍ജിയില്‍ വ്യക്തമാക്കുന്നു.
വോട്ടര്‍ രജിസ്‌ട്രേഷന്‍ ഫോമായ 'ഫോം 6'-ല്‍ (Form 6) വോട്ടര്‍മാരുടെ പൂര്‍വ്വികരുടെ വിവരങ്ങളും മുന്‍പത്തെ വോട്ടര്‍പട്ടികാ വിവരങ്ങളും ലിങ്ക് ചെയ്യാനുള്ള നിബന്ധന ഉള്‍പ്പെടുത്തിയതാണ് പ്രധാന വിവാദം. തെരഞ്ഞെടുപ്പ് ചട്ടങ്ങളില്‍ ആവശ്യമായ ഭേദഗതികള്‍ വരുത്താതെ, മറ്റ് രണ്ട് കമ്മീഷണര്‍മാരുടെ ശക്തമായ വിയോജിപ്പ് മറികടന്ന്, സി.ഇ.സി സ്വന്തം നിലയ്ക്ക് കമ്മീഷന്റെ സോഫ്റ്റ്വെയറില്‍ മാറ്റം വരുത്തിയെന്നാണ് ഹര്‍ജിയിലെ പ്രധാന ആരോപണം. തെരഞ്ഞെടുപ്പ് കമ്മീഷന്‍ ആക്ട് (2023)-ലെ സെക്ഷന്‍ 18 പ്രകാരം ഭൂരിപക്ഷാടിസ്ഥാനത്തില്‍ മാത്രമേ കമ്മീഷനില്‍ തീരുമാനങ്ങള്‍ എടുക്കാവൂ എന്ന നിയമത്തിന്റെ നഗ്‌നമായ ലംഘനമാണ് ഇവിടെ നടന്നിരിക്കുന്നതെന്ന് ഹര്‍ജിക്കാര്‍ വാദിക്കുന്നു.
---------------
Hindusthan Samachar / Sreejith S
