Newdelhi , 06 ഒക്റ്റോബര് (H.S.)

ന്യൂഡൽഹി: മുഖ്യതിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെയും തിരഞ്ഞെടുപ്പ് കമ്മീഷന്റെ പ്രവർത്തനങ്ങൾക്കുമെതിരെയും രൂക്ഷമായ വിമർശനവുമായി പ്രതിപക്ഷ പാർട്ടികളുടെ സംയുക്ത മുന്നണിയായ ഇന്ത്യാസഖ്യം. പാർലമെന്റ് മന്ദിരത്തിന് മുന്നിൽ നിന്ന് തിരഞ്ഞെടുപ്പ് കമ്മീഷൻ ആസ്ഥാനമായ നിർവാചൻ സദനിലേക്ക് പ്രതിപക്ഷ എംപിമാർ സംഘടിപ്പിച്ച പ്രതിഷേധ മാർച്ച് ഡൽഹിയിൽ വലിയ രാഷ്ട്രീയ സംഘർഷത്തിനും നാടകീയ രംഗങ്ങൾക്കും വഴിവെച്ചു.

'സേവ് ഡെമോക്രസി' (ജനാധിപത്യത്തെ സംരക്ഷിക്കുക) എന്ന കൂറ്റൻ ബാനർ കൈകളിലേന്തിയാണ് പ്രതിപക്ഷ നേതാക്കൾ തെരുവിലിറങ്ങിയത്. ലോക്സഭാ പ്രതിപക്ഷ നേതാവ് രാഹുൽ ഗാന്ധി, കോൺഗ്രസ് ജനറൽ സെക്രട്ടറി പ്രിയങ്ക ഗാന്ധി, സമാജ്വാദി പാർട്ടി അധ്യക്ഷൻ അഖിലേഷ് യാദവ് എന്നിവരാണ് പ്രതിഷേധ മാർച്ചിന്റെ മുൻനിരയിൽ നിന്ന് നേതൃത്വം നൽകിയത്. വിവിധ പ്രതിപക്ഷ കക്ഷികളിലെ നൂറുകണക്കിന് പാർലമെന്റ് അംഗങ്ങളും മാർച്ചിൽ അണിനിരന്നു.

തിരഞ്ഞെടുപ്പ് കമ്മീഷൻ ഭരണകൂടത്തിന് അനുകൂലമായി നിലപാട് സ്വീകരിക്കുന്നുവെന്നും വോട്ടർ പട്ടികയിലെ ക്രമക്കേടുകൾ അടക്കമുള്ള വിഷയങ്ങളിൽ സ്വതന്ത്രമായ നിലപാട് കൈക്കൊള്ളുന്നില്ലെന്നും ആരോപിച്ചായിരുന്നു ഇന്ത്യാസഖ്യത്തിന്റെ സമരം. പാർലമെന്റ് വളപ്പിൽ നിന്ന് കമ്മീഷൻ ആസ്ഥാനത്തേക്ക് നീങ്ങിയ മാർച്ച് അശോക റോഡിന് സമീപം ഡൽഹി പോലീസ് വലിയ ബാരിക്കേഡുകൾ തീർത്ത് തടഞ്ഞു. എന്നാൽ ബാരിക്കേഡുകൾ മറികടന്ന് മുന്നോട്ട് പോകാൻ എംപിമാർ ശ്രമിച്ചതോടെ പോലീസും ജനപ്രതിനിധികളും തമ്മിൽ ഉന്തും തള്ളുമുണ്ടായി.

പോലീസ് വഴിതടഞ്ഞതിനെ തുടർന്ന് എംപിമാർ റോഡിൽ കുത്തിയിരുന്ന് കേന്ദ്ര സർക്കാരിനും തിരഞ്ഞെടുപ്പ് കമ്മീഷനുമെതിരെ മുദ്രാവാക്യം വിളികളോടെ ശക്തമായി പ്രതിഷേധിച്ചു. ഇതിനിടെ, പ്രതിഷേധത്തിന്റെ ആവേശം ഉയർത്തി രാഹുൽ ഗാന്ധിയും പ്രിയങ്ക ഗാന്ധിയും ബാരിക്കേഡിന് മുകളിൽ കയറി ദേശീയ പതാക വീശുകയും അണികളെ അഭിസംബോധന ചെയ്യുകയും ചെയ്തത് പോലീസിനെയും സുരക്ഷാ സേനയെയും വെട്ടിലാക്കി. സമാജ്വാദി പാർട്ടി നേതാവ് അഖിലേഷ് യാദവ് ബാരിക്കേഡുകൾ ചാടിക്കടന്ന് പ്രതിഷേധിക്കാൻ തുനിഞ്ഞതും സ്ഥലത്ത് സംഘർഷാവസ്ഥ സൃഷ്ടിച്ചു.

ഈ പോരാട്ടം ഏതെങ്കിലും ഒരു രാഷ്ട്രീയ കക്ഷിയുടെ അധികാര താല്പര്യങ്ങൾക്ക് വേണ്ടിയുള്ളതല്ലെന്നും രാജ്യത്തെ ഭരണഘടനയെയും 'ഒരു പൗരന് ഒരു വോട്ട്' എന്ന ജനാധിപത്യപരമായ അവകാശത്തെയും സംരക്ഷിക്കാനാണെന്നും രാഹുൽ ഗാന്ധി വ്യക്തമാക്കി. സുതാര്യവും പക്ഷപാതരഹിതവുമായ വോട്ടർ പട്ടിക ഉറപ്പുവരുത്താൻ തിരഞ്ഞെടുപ്പ് കമ്മീഷൻ തയ്യാറാകണമെന്നും ജനാധിപത്യ സ്ഥാപനങ്ങളുടെ വിശ്വാസ്യത തകർക്കുന്ന നടപടികളിൽ നിന്ന് കമ്മീഷൻ പിന്മാറണമെന്നും അദ്ദേഹം ആവശ്യപ്പെട്ടു.

സംഘർഷം കനത്തതോടെ രാഹുൽ ഗാന്ധി, പ്രിയങ്ക ഗാന്ധി, അഖിലേഷ് യാദവ് എന്നിവരുൾപ്പെടെയുള്ള നേതാക്കളെ പോലീസ് ബലംപ്രയോഗിച്ച് കസ്റ്റഡിയിലെടുത്ത് നീക്കി. തടങ്കലിലായ നേതാക്കളെ പ്രത്യേക പോലീസ് ബസുകളിലാണ് സമീപത്തെ സ്റ്റേഷനുകളിലേക്ക് മാറ്റിയത്. രാജ്യതലസ്ഥാനത്ത് സുരക്ഷ കർശനമാക്കിയതായും ക്രമസമാധാന പ്രശ്നങ്ങൾ ഉണ്ടാകാതിരിക്കാൻ മേഖലയിൽ വൻ പോലീസ് സന്നാഹത്തെ വിന്യസിച്ചതായും ഉന്നത ഉദ്യോഗസ്ഥർ അറിയിച്ചു. പാർലമെന്റ് സമ്മേളനത്തിന് തൊട്ടുമുമ്പായി നടന്ന ഈ വൻ പ്രതിഷേധം ദേശീയ രാഷ്ട്രീയത്തിൽ വരും ദിവസങ്ങളിലും വലിയ ചർച്ചകൾക്ക് തിരികൊളുത്തും.

---------------

Hindusthan Samachar / Roshith K