Chandighad , 01 നവംബര് (H.S.)

ചണ്ഡീഗഡ്: പഞ്ചാബ് നിയമസഭാ തെരഞ്ഞെടുപ്പിന് മുന്നോടിയായി ഭരണകക്ഷിയായ ആം ആദ്മി പാർട്ടിയിൽ (എഎപി) കടുത്ത ആഭ്യന്തര ഭിന്നത. പാർട്ടിയിലെ സിറ്റിംഗ് എംഎൽഎമാരായ ഹർമീത് സിംഗ് പഠാൻമജ്റ, മുൻ ക്യാബിനറ്റ് മന്ത്രി കൂടിയായ ചേതൻ സിംഗ് ജോരമജ്റ എന്നിവർ പാർട്ടിയുടെ പ്രാഥമിക അംഗത്വത്തിൽ നിന്ന് രാജിവെച്ചു. തെരഞ്ഞെടുപ്പിനായുള്ള ആദ്യഘട്ട സ്ഥാനാർത്ഥി പട്ടിക പുറത്തിറങ്ങിയതിന് തൊട്ടുപിന്നാലെയാണ് ഇരുവരുടെയും അപ്രതീക്ഷിത രാജി.

സനൗർ മണ്ഡലത്തെ പ്രതിനിധീകരിക്കുന്ന എംഎൽഎയാണ് ഹർമീത് സിംഗ് പഠാൻമജ്റ. സമാന മണ്ഡലത്തിലെ ജനപ്രതിനിധിയാണ് ചേതൻ സിംഗ് ജോരമജ്റ. പഠാൻമജ്റ തന്റെ രാജി എഎപി ദേശീയ കൺവീനർ അരവിന്ദ് കെജ്രിവാളിന് അയച്ചുകൊടുത്തപ്പോൾ, സോഷ്യൽ മീഡിയയിലൂടെയും മാധ്യമങ്ങളിലൂടെയുമാണ് ചേതൻ സിംഗ് ജോരമജ്റ രാജി വിവരം പ്രഖ്യാപിച്ചത്. ഞാൻ രാജിവെച്ചു, പാർട്ടിയിൽ തുടർന്നുപോകാൻ ഇനി എന്റെ മനസ്സ് അനുവദിക്കുന്നില്ല; പഞ്ചാബിലെ ഇപ്പോഴത്തെ സാഹചര്യം ഹൃദയഭേദകമാണ് എന്ന് രാജിയെക്കുറിച്ച് ജോരമജ്റ പ്രതികരിച്ചു.

40 മണ്ഡലങ്ങളിലേക്കുള്ള സ്ഥാനാർത്ഥികളുടെ ആദ്യ പട്ടിക പാർട്ടി പ്രഖ്യാപിച്ചതിന് പിന്നാലെയാണ് നേതൃത്വത്തെ ഞെട്ടിച്ചുകൊണ്ട് ഈ രാജി പ്രഖ്യാപനങ്ങൾ ഉണ്ടായത്. ഈ പട്ടികയിൽ ഇരുവരുടെയും പേരുകൾ ഉൾപ്പെട്ടിരുന്നില്ല. ഇതിനുപുറമെ, ഇരുവരുടെയും മണ്ഡലങ്ങളിൽ പുതിയ ഇൻ-ചാർജ്മാരെ നിയമിക്കാൻ പാർട്ടി നേതൃത്വം മുൻകൈയെടുത്തിരുന്നു. സനൗറിൽ രൺജോധ് ഹദാനയെയും സമാനയിൽ മുൻ ശിരോമണി അകാലിദൾ നേതാവ് സുർജിത് സിംഗ് രഖ്റയെയുമാണ് പാർട്ടി ഇൻ-ചാർജ്മാരായി ചുമതലപ്പെടുത്തിയത്. സ്വന്തം മണ്ഡലങ്ങളിൽ മറ്റൊരു നേതാവിന് ചുമതല നൽകിയത് ഇവരുടെ രാഷ്ട്രീയ സ്വാധീനത്തിന് തിരിച്ചടിയായി വ്യാഖ്യാനിക്കപ്പെട്ടിരുന്നു.

ഭഗവന്ത് മൻ മന്ത്രിസഭയിൽ നേരത്തെ ക്യാബിനറ്റ് മന്ത്രിയായി പ്രവർത്തിച്ചിരുന്ന നേതാവാണ് ചേതൻ സിംഗ് ജോരമജ്റ. എന്നാൽ മുൻപ് നടന്ന മന്ത്രിസഭാ പുനഃസംഘടനയിൽ അദ്ദേഹത്തെ മന്ത്രിസ്ഥാനത്തുനിന്ന് ഒഴിവാക്കിയിരുന്നു. അന്നുതൊട്ടുതന്നെ അദ്ദേഹം പാർട്ടി നേതൃത്വവുമായി അകൽച്ചയിലായിരുന്നുവെന്നാണ് റിപ്പോർട്ടുകൾ.

മറുവശത്ത്, ഹർമീത് സിംഗ് പഠാൻമജ്റ ഏറെക്കാലമായി വിവിധ വിവാദങ്ങളിൽ പെട്ട് പാർട്ടി നേതൃത്വവുമായി കടുത്ത ഭിന്നതയിലായിരുന്നു. അദ്ദേഹത്തിനെതിരെ ഉയർന്ന ക്രിമിനൽ കേസിന് പിന്നാലെ സ്വന്തം സർക്കാർ തന്നെ നടപടികളിലേക്ക് കടന്നതോടെ അദ്ദേഹം നേതൃത്വത്തിനെതിരെ പരസ്യ നിലപാടെടുത്തു.

തുടർഭരണം ലക്ഷ്യമിട്ട് പ്രവർത്തനങ്ങൾ ശക്തമാക്കുന്നതിനിടെ രണ്ട് പ്രമുഖ എംഎൽഎമാർ ഒരുമിച്ച് പാർട്ടി വിട്ടത് പഞ്ചാബിലെ എഎപി നേതൃത്വത്തിന് കനത്ത രാഷ്ട്രീയ ആഘാതമായി മാറിയിരിക്കുകയാണ്. വരും ദിവസങ്ങളിൽ കൂടുതൽ നേതാക്കൾ അതൃപ്തി പരസ്യമാക്കി രംഗത്തെത്തുമോ എന്ന ആശങ്കയിലാണ് പാർട്ടി കേന്ദ്രങ്ങൾ. അതേസമയം ഇരുവരുടെയും അടുത്ത രാഷ്ട്രീയ നീക്കം എന്തായിരിക്കുമെന്ന കാര്യത്തിൽ ഇതുവരെ ഔദ്യോഗിക പ്രതികരണങ്ങൾ വന്നിട്ടില്ല.

---------------

Hindusthan Samachar / Roshith K