Amaravati , 01 നവംബര് (H.S.)

അമരാവതി: ദിവസങ്ങൾക്ക് മുൻപ് ആഞ്ഞടിച്ച ‘അർണബ്’ ചുഴലിക്കാറ്റിന്റെ കെടുതികളിൽ നിന്ന് ആന്ധ്രാപ്രദേശ് പൂർണമായി മുക്തമാകും മുൻപ് സംസ്ഥാനത്തിന് നേരെ അടുത്ത ചുഴലിക്കാറ്റ് ഭീഷണി. ബംഗാൾ ഉൾക്കടലിൽ രൂപംകൊണ്ട തീവ്ര ന്യൂനമർദം ശക്തമായ ചുഴലിക്കാറ്റായി മാറി നവംബർ 3-ന് രാവിലെ ആന്ധ്രാ തീരം തൊടുമെന്ന് കേന്ദ്ര കാലാവസ്ഥാ വകുപ്പ് (IMD) മുന്നറിയിപ്പ് നൽകി.

കാലാവസ്ഥാ നിരീക്ഷണ കേന്ദ്രത്തിന്റെ ഏറ്റവും പുതിയ ബുള്ളറ്റിൻ പ്രകാരം, പടിഞ്ഞാറ്-വടക്കുപടിഞ്ഞാറൻ ദിശയിൽ സഞ്ചരിക്കുന്ന ചുഴലിക്കാറ്റ് നവംബർ 3-ന് രാവിലെ നെല്ലൂരിനും നർസാപൂരിനും ഇടയിലൂടെ തെക്കൻ ആന്ധ്രാ തീരം കടക്കാനാണ് സാധ്യത. ചുഴലിക്കാറ്റ് കരയിലേക്ക് പ്രവേശിക്കുന്ന വേളയിൽ മണിക്കൂറിൽ 100 മുതൽ 110 കിലോമീറ്റർ വരെയും, ചില അവസരങ്ങളിൽ 120 കിലോമീറ്റർ വരെയും വേഗതയിൽ ശക്തമായ കാറ്റുവീശാൻ സാധ്യതയുണ്ടെന്ന് മുന്നറിയിപ്പിൽ വ്യക്തമാക്കുന്നു.

തീരമേഖലകളിൽ അതിതീവ്ര മഴയ്ക്ക് സാധ്യത

ചുഴലിക്കാറ്റിന്റെ സ്വാധീനഫലമായി ആന്ധ്രാപ്രദേശിലെ തീരദേശ ജില്ലകളിലും റായലസീമ മേഖലയിലും അടുത്ത മൂന്ന് ദിവസങ്ങളിൽ അതിശക്തമായ മഴ പെയ്യുമെന്നാണ് പ്രവചനം. കടൽ അതീവ പ്രക്ഷുബ്ധമായിരിക്കുമെന്നതിനാൽ മത്സ്യത്തൊഴിലാളികൾ ഒരു കാരണവശാലും കടലിൽ പോകരുതെന്ന് ദുരന്തനിവാരണ അതോറിറ്റി കർശന നിർദേശം നൽകിയിട്ടുണ്ട്. ആന്ധ്രയ്ക്ക് പുറമെ അയൽസംസ്ഥാനമായ ഒഡീഷയിലും മുൻകരുതൽ നടപടികൾ ഊർജിതമാക്കി. തെക്കൻ ഒഡീഷ ജില്ലകളിൽ നവംബർ 2, 3 തീയതികളിൽ 7 മുതൽ 20 സെൻ്റീമീറ്റർ വരെ കനത്ത മഴ ലഭിക്കുമെന്ന് ഭുവനേശ്വർ കാലാവസ്ഥാ കേന്ദ്രം അറിയിച്ചു. സ്ഥിതിഗതികൾ കണക്കിലെടുത്ത് ദുർബല പ്രദേശങ്ങളിൽ നിന്നും മണ്ണിടിച്ചിൽ ഭീഷണിയുള്ള ഇടങ്ങളിൽ നിന്നും ജനങ്ങളെ സുരക്ഷിത സ്ഥാനങ്ങളിലേക്കും ദുരിതാശ്വാസ ക്യാമ്പുകളിലേക്കും മാറ്റാൻ ഒഡീഷ സർക്കാരും ഉത്തരവിട്ടിട്ടുണ്ട്.

‘അർണബ്’ വരുത്തിവെച്ച വൻ നാശനഷ്ടങ്ങൾ

ഒക്ടോബർ 28-ന് ആന്ധ്രാ തീരം കടന്ന ‘അർണബ്’ അതിതീവ്ര ചുഴലിക്കാറ്റ് സംസ്ഥാനത്ത് കനത്ത നാശനഷ്ടമാണ് വിതച്ചത്. അർണബ് ദുരന്തത്തിൽ 7 പേർക്ക് ജീവൻ നഷ്ടപ്പെട്ടിരുന്നു. ആയിരക്കണക്കിന് ഏക്കർ കൃഷിഭൂമി വെള്ളത്തിനടിയിലാവുകയും നൂറുകണക്കിന് വൈദ്യുതി പോസ്റ്റുകളും മരങ്ങളും കടപുഴകി വീഴുകയും ചെയ്തു. പ്രാഥമിക കണക്കെടുപ്പുകൾ പ്രകാരം ഏകദേശം 4,600 കോടി രൂപയുടെ നഷ്ടമാണ് സംസ്ഥാനത്തുണ്ടായത്. ഈ നാശനഷ്ടങ്ങൾ വിലയിരുത്തുന്നതിനായി കേന്ദ്ര സർക്കാരിന്റെ പ്രത്യേക സംഘം നിലവിൽ സംസ്ഥാനത്ത് സന്ദർശനം തുടരുകയാണ്.

തൊട്ടുപിന്നാലെ മറ്റൊരു ചുഴലിക്കാറ്റ് കൂടി എത്തുന്ന സാഹചര്യത്തിൽ സംസ്ഥാന ഭരണകൂടവും ദുരന്തനിവാരണ സേനകളും അതീവ ജാഗ്രതയിലാണ്. അടിയന്തര സാഹചര്യങ്ങൾ നേരിടാൻ ദേശീയ ദുരന്തനിവാരണ സേനയെയും (NDRF) സംസ്ഥാന സേനകളെയും തീരദേശ ജില്ലകളിൽ സജ്ജമാക്കിയിട്ടുണ്ട്. താഴ്ന്ന പ്രദേശങ്ങളിൽ താമസിക്കുന്ന ജനങ്ങൾ അധികൃതരുടെ നിർദേശങ്ങൾ പാലിച്ച് സുരക്ഷിത കേന്ദ്രങ്ങളിലേക്ക് മാറണമെന്ന് ദുരന്തനിവാരണ അതോറിറ്റി അഭ്യർത്ഥിച്ചു.

---------------

Hindusthan Samachar / Roshith K