Enter your Email Address to subscribe to our newsletters

Cairo , 15 നവംബര് (H.S.)
കെയ്റോ: ഇന്ത്യ-യുഎസ് ഉഭയകക്ഷി വ്യാപാര കരാറിന് (Bilateral Trade Agreement - BTA) കീഴിൽ, അമേരിക്കൻ വിപണിയിലേക്ക് പ്രവേശിക്കുന്നതിന് ഇന്ത്യയ്ക്ക് മുൻഗണന ലഭിക്കുമെന്ന് കേന്ദ്ര വാണിജ്യ-വ്യവസായ മന്ത്രി പീയൂഷ് ഗോയൽ. മത്സരരംഗത്തുള്ള മറ്റ് രാജ്യങ്ങളെ അപേക്ഷിച്ച് കുറഞ്ഞ ഇറക്കുമതി തീരുവ (Tariff) ഇന്ത്യൻ ഉൽപ്പന്നങ്ങൾക്ക് ലഭിക്കുന്ന കാര്യത്തിൽ ധാരണയായിട്ടുണ്ട്. ഈജിപ്തിലെ കെയ്റോയിൽ രണ്ട് ദിവസത്തെ ഔദ്യോഗിക സന്ദർശനത്തിനിടെ മാധ്യമപ്രവർത്തകരോട് സംസാരിക്കവെയാണ് മന്ത്രി ഇക്കാര്യം അറിയിച്ചത്.
പ്രധാനമന്ത്രി നരേന്ദ്ര മോദിയും യുഎസ് പ്രസിഡന്റ് ഡൊണാൾഡ് ട്രംപും നേരത്തെ പ്രഖ്യാപിച്ച ചട്ടക്കൂടിന്റെ അടിസ്ഥാനത്തിലാണ് ഈ ധാരണയെന്ന് ഗോയൽ ചൂണ്ടിക്കാട്ടി. അമേരിക്കൻ വിപണിയിൽ വിയറ്റ്നാം, ബംഗ്ലാദേശ്, കംബോഡിയ തുടങ്ങിയ രാജ്യങ്ങളെക്കാൾ കുറഞ്ഞ നികുതി നിരക്കുകൾ ഇന്ത്യൻ കയറ്റുമതിക്കാർക്ക് ലഭിക്കുന്നത് ആഗോള വിപണിയിൽ ഇന്ത്യയ്ക്ക് വലിയ മുൻതൂക്കം നൽകും. ഉഭയകക്ഷി വ്യാപാര കരാറിന്റെ ആദ്യ ഘട്ടം (First Tranche) നടപ്പ് സാമ്പത്തിക വർഷം അവസാനത്തോടെ പൂർത്തിയാക്കാനാണ് ഇരു രാജ്യങ്ങളും ലക്ഷ്യമിടുന്നത്.
നേരത്തെഅമേരിക്കൻ സുപ്രീം കോടതി പ്രസിഡന്റ് ട്രംപിന്റെ 'പരസ്പര നികുതി' (Reciprocal Tariffs) നയം റദ്ദാക്കിയിരുന്നു. ഇതിനെതുടർന്ന്യുഎസ് നികുതി ഘടനയിലുണ്ടായ മാറ്റങ്ങൾ കാരണം കരാർ ചർച്ചകൾ ഇപ്പോഴും തുടരുകയാണ്. നിലവിലെ സാഹചര്യത്തിൽ, യുഎസ് വ്യാപാര നിയമത്തിലെ വ്യവസ്ഥകൾ പ്രകാരം പുതിയ നികുതി ചട്ടക്കൂട് രൂപീകരിക്കാനുള്ള ശ്രമത്തിലാണ് വാഷിംഗ്ടൺ. ഇതിന്റെ അന്തിമ രൂപരേഖ തയ്യാറാകുന്നതനുസരിച്ചായിരിക്കും ഇന്ത്യൻ ഉൽപ്പന്നങ്ങൾക്ക് ലഭിക്കുന്ന നികുതി ഇളവിന്റെ കൃത്യമായ തോത് നിശ്ചയിക്കപ്പെടുക.
അമേരിക്കയിലെ ആഭ്യന്തര തിരഞ്ഞെടുപ്പ് ഫലങ്ങളോ രാഷ്ട്രീയ മാറ്റങ്ങളോ ഇന്ത്യയുടെ വ്യാപാര ബന്ധങ്ങളെ ബാധിക്കില്ലെന്ന് പീയൂഷ് ഗോയൽ വ്യക്തമാക്കി. കരാറിൽ ഇന്ത്യയുടെ കാർഷിക മേഖലയുടെയും ക്ഷീരമേഖലയുടെയും താൽപ്പര്യങ്ങൾ പൂർണ്ണമായും സംരക്ഷിക്കപ്പെടും. കൂടാതെകർഷകർക്ക് ദോഷകരമാകുന്ന ഒരു വിട്ടുവീഴ്ചയും ഉണ്ടാകില്ലെന്നും അദ്ദേഹം ഉറപ്പുനൽകിയിട്ടുണ്ട്.
കസ്റ്റംസ് നടപടികൾ ലഘൂകരിക്കുന്നതിനും വ്യാപാരം സുഗമമാക്കുന്നതിനുമായി ഇരു രാജ്യങ്ങളിലെയും ഉദ്യോഗസ്ഥർ തമ്മിൽ നിരന്തരമായ ചർച്ചകൾ നടന്നുവരികയാണ്. കരാർ യാഥാർത്ഥ്യമാകുന്നതോടെ ആഗോള വിതരണ ശൃംഖലയിൽ (Global Value Chains) ഇന്ത്യയുടെ സ്ഥാനം കൂടുതൽ ശക്തിപ്പെടുമെന്നാണ് സാമ്പത്തിക വിദഗ്ധരുടെ വിലയിരുത്തൽ.
---------------
Hindusthan Samachar / Roshith K