ഛഠ് പൂജയ്ക്ക് ആശംസകളുമായി പ്രധാനമന്ത്രി നരേന്ദ്ര മോദി; ദൃഢനിശ്ചയത്തിന്റെയും ആത്മീയ സാധനയുടെയും മഹത്തായ സംഗമമെന്ന് വിശേഷണം
Newdelhi , 16 നവംബര് (H.S.) ന്യൂഡൽഹി: നാല് ദിവസം നീണ്ടുനിന്ന ഛഠ് പൂജയുടെ സമാപന ദിനമായ ഇന്ന് രാജ്യത്തെ ജനങ്ങൾക്ക് ആശംസകൾ നേർന്ന് പ്രധാനമന്ത്രി നരേന്ദ്ര മോദി. ദൃഢനിശ്ചയത്തിന്റെയും ആത്മീയ ഭക്തിയുടെയും മനോഹരമായ സംഗമമാണ് ഈ ഉത്സവമെന്ന് അദ്ദേഹം വിശേഷിപ്പ
ഛഠ് പൂജയ്ക്ക് ആശംസകളുമായി പ്രധാനമന്ത്രി നരേന്ദ്ര മോദി; ദൃഢനിശ്ചയത്തിന്റെയും ആത്മീയ സാധനയുടെയും മഹത്തായ സംഗമമെന്ന് വിശേഷണം


Newdelhi , 16 നവംബര് (H.S.)

ന്യൂഡൽഹി: നാല് ദിവസം നീണ്ടുനിന്ന ഛഠ് പൂജയുടെ സമാപന ദിനമായ ഇന്ന് രാജ്യത്തെ ജനങ്ങൾക്ക് ആശംസകൾ നേർന്ന് പ്രധാനമന്ത്രി നരേന്ദ്ര മോദി. ദൃഢനിശ്ചയത്തിന്റെയും ആത്മീയ ഭക്തിയുടെയും മനോഹരമായ സംഗമമാണ് ഈ ഉത്സവമെന്ന് അദ്ദേഹം വിശേഷിപ്പിച്ചു. ഉദയസൂര്യന് 'ഉഷാ അർഘ്യം' അർപ്പിച്ചതോടെയാണ് രാജ്യത്തുടനീളമുള്ള ഛഠ് ഘട്ടുകളിലും നദീതീരങ്ങളിലും കുളങ്ങളിലും ഭക്തിനിർഭരമായ ചടങ്ങുകളോടെ ഉത്സവത്തിന് സമാപനമായത്.

പ്രകൃതിക്കായി സമർപ്പിക്കപ്പെട്ട ഈ ദിവ്യോത്സവം കഠിനമായ നിശ്ചയദാർഢ്യത്തിന്റെയും ആത്മീയ സാധനയുടെയും അത്യപൂർവ്വ സംഗമത്തിനാണ് സാക്ഷ്യം വഹിച്ചതെന്ന് പ്രധാനമന്ത്രി എക്സിൽ കുറിച്ചു. വ്രതമനുഷ്ഠിക്കുന്ന എല്ലാ ഭക്തർക്കും രാജ്യത്തെ തന്റെ കുടുംബാംഗങ്ങൾക്കും ഛഠി മാതാവിന്റെ അനുഗ്രഹങ്ങൾ ഉണ്ടാകട്ടെയെന്നും അദ്ദേഹം പ്രാർത്ഥിച്ചു.

ഛഠ് പൂജയുടെ അവസാന ദിനത്തിൽ രാജ്യത്തിന്റെ വിവിധ ഭാഗങ്ങളിൽ പ്രമുഖ രാഷ്ട്രീയ നേതാക്കളും ആഘോഷങ്ങളിൽ പങ്കുചേർന്നു. ബിഹാറിലെ പട്നയിൽ ബി.ജെ.പി ദേശീയ അധ്യക്ഷൻ നിതിൻ നബിൻ പൂജാദ്രവ്യങ്ങൾ അടങ്ങിയ മുളങ്കൂട (ദൗര) തലയിലേന്തി ചടങ്ങുകളിൽ പങ്കെടുത്തപ്പോൾ, അദ്ദേഹത്തിന്റെ ഭാര്യ ദീപമാല പൂജാ കർമ്മങ്ങൾ നിർവ്വഹിച്ചു. ബിഹാർ മുഖ്യമന്ത്രി സാമ്രാട്ട് ചൗധരി മുൻഗറിലെ ഘട്ടിലെത്തി ഉദയസൂര്യന് പ്രാർത്ഥനകൾ അർപ്പിച്ചു. ഛത്തീസ്ഗഡ് മുഖ്യമന്ത്രി വിഷ്ണു ദേവ് സായി ജഷ്പൂരിൽ ഭാര്യയോടൊപ്പമെത്തി പ്രഭാത അർഘ്യം അർപ്പിച്ചു. ഉത്തർപ്രദേശിലെ ഗോരഖ്പൂരിൽ ബി.ജെ.പി എം.പി രവി കിഷനും ഡൽഹിയിലെ സോണിയ വിഹാർ ഘട്ടിൽ എം.പി മനോജ് തിവാരിയും ഉദയസൂര്യനെ വണങ്ങി പ്രാർത്ഥനകളിൽ പങ്കാളികളായി.

36 മണിക്കൂർ നീണ്ടുനിന്ന കഠിനമായ നിർജ്ജല വ്രതത്തിന് ശേഷമാണ് ഭക്തർ തിങ്കളാഴ്ച പുലർച്ചെ സൂര്യോദയ സമയത്ത് നദികളിലും ജലാശയങ്ങളിലും ഇറങ്ങി നിന്ന് സൂര്യഭഗവാന് ജലവും പാലും അർപ്പിച്ച് 'ഉഷാ അർഘ്യം' പൂർത്തിയാക്കിയത്. ഞായറാഴ്ച വൈകുന്നേരം അസ്തമയ സൂര്യനെ വണങ്ങുന്ന 'സന്ധ്യാ അർഘ്യ'ത്തിന് പിന്നാലെയാണ് പുതിയ പ്രഭാതത്തെ വരവേറ്റുകൊണ്ടുള്ള തിങ്കളാഴ്ചത്തെ ചടങ്ങുകൾ നടന്നത്.

മക്കളുടെയും കുടുംബാംഗങ്ങളുടെയും ആരോഗ്യത്തിനും ഐശ്വര്യത്തിനുമായി പരമ്പരാഗത ഛഠ് ഗീതങ്ങൾ ആലപിച്ചും ഛഠി മാതാവിനെ ആരാധിച്ചും ഭക്തർ ഘട്ടുകളിൽ ഒത്തുകൂടി. ഉഷാ അർഘ്യത്തിന് ശേഷം മുതിർന്നവരുടെ അനുഗ്രഹം വാങ്ങി, 'ഛഠ് പ്രസാദം' കഴിച്ചുകൊണ്ടാണ് ഭക്തർ നാല് ദിവസം നീണ്ടുനിന്ന വ്രതം അവസാനിപ്പിച്ചത്.

---------------

Hindusthan Samachar / Roshith K


Latest News