Florida, 02 നവംബര് (H.S.)

ഫ്ലോറിഡ: അമേരിക്കൻ മുൻ പ്രസിഡന്റ് ഡോണൾഡ് ട്രംപിന്റെ ഫ്ലോറിഡയിലെ മാർ-എ-ലാഗോ വസതിക്ക് ഏതാനും മൈലുകൾ മാത്രം അകലെ സ്വകാര്യ ബിസിനസ് ജെറ്റ് ജനവാസ മേഖലയിലേക്ക് മൂക്കുകുത്തി വീണ് പൊട്ടിത്തെറിച്ച് വൻ ദുരന്തം. വിമാനത്തിലുണ്ടായിരുന്ന ഒൻപത് പേരും സംഭവസ്ഥലത്തുതന്നെ ദാരുണമായി കൊല്ലപ്പെട്ടു. പ്രാദേശിക സമയം ഞായറാഴ്ച ഉച്ചയ്ക്ക് 12:50-ഓടെ ദക്ഷിണ ഫ്ലോറിഡയിലെ പാം ബീച്ച് കൗണ്ടിയിലുള്ള ക്രസ്റ്റ്ഹെവൻ മേഖലയിലാണ് അപകടമുണ്ടായത്. തകർന്നുവീണ നിമിഷം തന്നെ വിമാനം ഭീമാകാരമായ അഗ്നിഗോളമായി മാറുകയും സമീപത്തെ റോഡിൽ ആഴത്തിലുള്ള ഗർത്തം രൂപപ്പെടുകയും ചെയ്തു.

ടെക്സസിലെ ഓസ്റ്റിൻ-ബർഗ്സ്ട്രോം അന്താരാഷ്ട്ര വിമാനത്താവളത്തിൽ നിന്ന് ബഹാമാസിലേക്ക് പോവുകയായിരുന്ന 'ലിയർജെറ്റ് 60' (Learjet 60) എന്ന ചെറുവിമാനമാണ് അപകടത്തിൽപ്പെട്ടത്. എൻ722ബിഡി (N722BD) എന്ന ടെയിൽ നമ്പറിലുള്ള സ്വകാര്യ വിമാനമാണിതെന്ന് വിമാനത്താവള അധികൃതർ സ്ഥിരീകരിച്ചു. ട്രംപിന്റെ റിസോർട്ട് സ്ഥിതി ചെയ്യുന്ന പാം ബീച്ചിൽ നിന്ന് ഏകദേശം 14 കിലോമീറ്റർ (9 മൈൽ) മാത്രം മാറിയാണ് വിമാനം തകർന്നുവീണത്.

വീടുകൾക്ക് തൊട്ടടുത്ത്, മിസൈൽ പതിച്ചതുപോലെ ഭയാനകമായ കാഴ്ച

റോഡിലൂടെ സഞ്ചരിച്ചിരുന്ന യാത്രക്കാരുടെ വാഹനങ്ങളിലെ ക്യാമറകളിൽ അപകടത്തിന്റെ ഞെട്ടിക്കുന്ന ദൃശ്യങ്ങൾ പതിഞ്ഞിട്ടുണ്ട്. നിയന്ത്രണം വിട്ട വിമാനം ആകാശത്തുനിന്ന് കുത്തനെ താഴേക്ക് പതിക്കുകയായിരുന്നു. ജനവാസ മേഖലയിലെ വീടുകൾക്ക് തൊട്ടടുത്തും റോഡിലൂടെ വാഹനങ്ങൾ കടന്നുപോയതിന് തൊട്ടുപിറകിലുമായാണ് വിമാനം വീണത്. നിലത്തു പതിച്ചയുടൻ വൻ ശബ്ദത്തോടെ വിമാനം പൊട്ടിത്തെറിക്കുകയും ആകാശത്തേക്ക് കറുത്ത പുകച്ചുരുളുകൾ ഉയരുകയും ചെയ്തു.

സംഭവസ്ഥലം സന്ദർശിച്ച ഫ്ലോറിഡ ഗവർണർ റോൺ ഡിസാന്റിസ് അപകടത്തിന്റെ വ്യാപ്തിയെ 'സർവ്വനാശകരം' എന്നാണ് വിശേഷിപ്പിച്ചത്. റോഡരികിൽ ഒരു മിസൈൽ വന്നുപതിച്ചതുപോലെ ഭയാനകമായ അവസ്ഥയായിരുന്നുവെന്നും റോഡിൽ വലിയ ഗർത്തം രൂപപ്പെട്ടുവെന്നും അദ്ദേഹം മാധ്യമങ്ങളോട് പറഞ്ഞു. എന്നാൽ വിമാനം തകർന്നുവീണ ഭാഗത്ത് ഭൂമിയിലുണ്ടായിരുന്ന ആർക്കും പരിക്കേൽക്കുകയോ ജീവഹാനി സംഭവിക്കുകയോ ചെയ്തിട്ടില്ല എന്നത് വലിയൊരു ദുരന്തം ഒഴിവായി എന്നതിന്റെ ആശ്വാസം നൽകുന്നുണ്ട്.

അപകടകാരണം അന്വേഷിക്കുന്നു

കിഴക്കൻ ദിശയിലേക്ക് 35,000 അടി ഉയരത്തിൽ പറക്കുന്നതിനിടെ കനത്ത കാറ്റും ഐസ് മൂടിയ കാലാവസ്ഥയും മഴയും പൈലറ്റുമാർ റിപ്പോർട്ട് ചെയ്തിരുന്നതായും വിമാനം കൂടുതൽ ഉയരത്തിലേക്ക് ഉയർത്താൻ അനുമതി തേടിയിരുന്നതായും ഫെഡറൽ ഏവിയേഷൻ അഡ്മിനിസ്ട്രേഷൻ (FAA) വ്യക്തമാക്കി. ഇതിന് പിന്നാലെയാണ് വിമാനത്തിന് നിയന്ത്രണം നഷ്ടമായത്.

പാം ബീച്ച് കൗണ്ടിയിലുണ്ടായ അപകടം അതീവ ദാരുണമായ ഒരു ദുരന്തമാണെന്ന് യു.എസ് ഗതാഗത സെക്രട്ടറി സീൻ ഡഫി സ്ഥിരീകരിച്ചു. വിമാനത്തിലുണ്ടായിരുന്ന ഒൻപത് പേരും മരണപ്പെട്ടതായും നാഷണൽ ട്രാൻസ്പോർട്ടേഷൻ സേഫ്റ്റി ബോർഡിന്റെ (NTSB) നേതൃത്വത്തിൽ നടക്കുന്ന അന്വേഷണത്തിന് പിന്തുണ നൽകാൻ പ്രത്യേക അന്വേഷണ സംഘത്തെ നിയോഗിച്ചതായും അദ്ദേഹം അറിയിച്ചു.

അപകടത്തെ തുടർന്ന് മിലിട്ടറി ട്രയൽ, ടെൻത് അവന്യൂ നോർത്ത് റോഡുകൾ ഇരുവശത്തേക്കും അടച്ചുപൂട്ടി പോലീസ് ഗതാഗതം വഴിതിരിച്ചുവിട്ടു. അഗ്നിശമന സേനാംഗങ്ങളും ദുരന്തനിവാരണ സേനയും സ്ഥലത്തെത്തി തീ അണയ്ക്കുകയും അവശിഷ്ടങ്ങൾ നീക്കം ചെയ്യുകയും ചെയ്തു. അപകടത്തെ തുടർന്ന് സമീപപ്രദേശങ്ങളിലെ വൈദ്യുതി ബന്ധം മണിക്കൂറുകളോളം തടസ്സപ്പെട്ടു. മരിച്ചവരുടെ വിവരങ്ങൾ അധികൃതർ ഔദ്യോഗികമായി പുറത്തുവിട്ടിട്ടില്ല.

---------------

Hindusthan Samachar / Roshith K