Enter your Email Address to subscribe to our newsletters

Newdelhi, 22 നവംബര് (H.S.)
ന്യൂഡൽഹി: 2027-ൽ നടക്കാനിരിക്കുന്ന ഉത്തർപ്രദേശ് നിയമസഭാ തിരഞ്ഞെടുപ്പിന് മുന്നോടിയായി സീറ്റ് വിഭജന ചർച്ചകൾ സജീവമാക്കി കോൺഗ്രസും സമാജ്വാദി പാർട്ടിയും (എസ്.പി.). സീറ്റ് വിഭജന കാര്യങ്ങളിൽ അന്തിമ തീരുമാനമെടുക്കുന്നതിനായി ഇരു പാർട്ടികളുടെയും സംയുക്ത യോഗം തിങ്കളാഴ്ച നടക്കുമെന്ന് കോൺഗ്രസ് എം.പി. ഇമ്രാൻ മസൂദ് അറിയിച്ചു. സംസ്ഥാനത്ത് 'ഇന്ത്യ' (INDIA) മുന്നണിയുടെ വിജയം ഉറപ്പാക്കുന്നതിന് ഇരു പാർട്ടികളും തമ്മിൽ മികച്ച ഏകോപനം അനിവാര്യമാണെന്നും അദ്ദേഹം വ്യക്തമാക്കി.
തിങ്കളാഴ്ച നടക്കുന്ന സംയുക്ത യോഗത്തിൽ സീറ്റ് വിഭജനവുമായി ബന്ധപ്പെട്ട നിർണ്ണായക ചർച്ചകൾ നടക്കുമെന്ന് ഇമ്രാൻ മസൂദ് മാധ്യമങ്ങളോട് പറഞ്ഞു. ഉത്തർപ്രദേശിൽ ഇന്ത്യ മുന്നണി അധികാരത്തിൽ വരണമെന്നാണ് തങ്ങൾ ആഗ്രഹിക്കുന്നത്. അതിനായി തിരഞ്ഞെടുപ്പ് ഗോദയിലേക്ക് കൃത്യമായ ഏകോപനത്തോടെയും ഐക്യത്തോടെയും ഇറങ്ങേണ്ടതുണ്ടെന്നും അദ്ദേഹം കൂട്ടിച്ചേർത്തു.
കഴിഞ്ഞ ആഴ്ച സീറ്റ് വിഭജന ചർച്ചകൾക്കായി 181 നിയമസഭാ മണ്ഡലങ്ങളുടെ പട്ടിക കോൺഗ്രസ് സമാജ്വാദി പാർട്ടിക്ക് കൈമാറിയിരുന്നു. കോൺഗ്രസ് ആവശ്യപ്പെട്ട ഈ 181 സീറ്റുകളിൽ 135 എണ്ണം ജനറൽ മണ്ഡലങ്ങളും 45 എണ്ണം പട്ടികജാതി (SC) സംവരണ മണ്ഡലങ്ങളും ഒരെണ്ണം പട്ടികവർഗ്ഗ (ST) സംവരണ മണ്ഡലവുമാണ്.
അതേസമയം, കോൺഗ്രസുമായുള്ള സഖ്യചർച്ചകൾക്കും സീറ്റ് വിഭജന ചർച്ചകൾക്കും നേതൃത്വം നൽകാൻ മുതിർന്ന നേതാവ് രാം ഗോപാൽ യാദവിനെ സമാജ്വാദി പാർട്ടി ചുമതലപ്പെടുത്തിയിട്ടുണ്ട്. രാം ഗോപാൽ യാദവ് അധ്യക്ഷനായ ഏഴംഗ സമിതിയിലാണ് രണ്ട് ഡാറ്റാ വിദഗ്ധരെയും ഉൾപ്പെടുത്തിയിരിക്കുന്നത്. നവംബർ 23, 24 തീയതികളിലായാണ് ഇരു പാർട്ടികളും തമ്മിലുള്ള ഔദ്യോഗിക ചർച്ചകൾ നടക്കുന്നത്.
ഓരോ മണ്ഡലത്തിലും വിജയസാധ്യതയുള്ള പാർട്ടി ഏതാണെന്ന് പരിശോധിച്ചായിരിക്കും സീറ്റ് വിഭജനം നടത്തുകയെന്ന് സമാജ്വാദി പാർട്ടി അധ്യക്ഷൻ അഖിലേഷ് യാദവ് വ്യക്തമാക്കിയിട്ടുണ്ട്. കോൺഗ്രസുമായുള്ള ചർച്ചകൾ മുന്നോട്ട് പോകുകയാണെന്നും എല്ലാ വശങ്ങളും വിശദമായി പരിശോധിച്ച ശേഷം ഇരു പാർട്ടികളും സംയുക്തമായി സീറ്റുകളുടെ കാര്യത്തിൽ തീരുമാനമെടുക്കുമെന്നും അദ്ദേഹം ആവർത്തിച്ചു.
2022-ലെ ഉത്തർപ്രദേശ് നിയമസഭാ തിരഞ്ഞെടുപ്പിൽ എസ്.പിയും കോൺഗ്രസും വെവ്വേറെയാണ് മത്സരിച്ചത്. അന്ന് 347 സീറ്റുകളിൽ മത്സരിച്ച എസ്.പി. 111 സീറ്റുകളിൽ വിജയിച്ചപ്പോൾ, 399 സീറ്റുകളിൽ മത്സരിച്ച കോൺഗ്രസിന് രണ്ട് സീറ്റുകളിൽ മാത്രമാണ് വിജയിക്കാനായത്. എന്നാൽ 2024-ലെ ലോക്സഭാ തിരഞ്ഞെടുപ്പിൽ ഇന്ത്യ മുന്നണിയുടെ ഭാഗമായി ഒരുമിച്ച് മത്സരിച്ചപ്പോൾ വലിയ മുന്നേറ്റമുണ്ടാക്കാൻ ഇരു പാർട്ടികൾക്കും സാധിച്ചിരുന്നു. ലോക്സഭയിൽ മത്സരിച്ച 62 സീറ്റുകളിൽ 37 എണ്ണത്തിൽ എസ്.പിയും, 17 സീറ്റുകളിൽ ആറെണ്ണത്തിൽ കോൺഗ്രസും വിജയിച്ചു. 2017, 2022 നിയമസഭാ തിരഞ്ഞെടുപ്പുകളിലെ തുടർച്ചയായ പരാജയങ്ങൾക്ക് ശേഷം 2027-ൽ സംസ്ഥാനത്ത് അധികാരം തിരിച്ചുപിടിക്കാനാണ് സമാജ്വാദി പാർട്ടിയും കോൺഗ്രസും ലക്ഷ്യമിടുന്നത്.
---------------
Hindusthan Samachar / Roshith K