Enter your Email Address to subscribe to our newsletters

Lucknow, 22 നവംബര് (H.S.)
ലഖ്നൗ: യുദ്ധം, വ്യോമാക്രമണം തുടങ്ങിയ അടിയന്തര സാഹചര്യങ്ങളെ നേരിടാനുള്ള മുന്നൊരുക്കങ്ങൾ വിലയിരുത്തുന്നതിനായി ഉത്തർപ്രദേശിൽ ഇന്ന് (ഞായറാഴ്ച) സംസ്ഥാനവ്യാപകമായി ബ്ലാക്ക്ഔട്ട് മോക്ക് ഡ്രിൽ സംഘടിപ്പിക്കുന്നു. വൈകുന്നേരം കൃത്യം ആറ് മണിക്ക് സംസ്ഥാനത്തെ 75 ജില്ലകളിലും ഒരേസമയം മോക്ക് ഡ്രിൽ നടക്കും. സംസ്ഥാന സിവിൽ ഡിഫൻസ് വകുപ്പിന്റെ നേതൃത്വത്തിലാണ് 'എയർ റെയ്ഡ് ബ്ലാക്ക്ഔട്ട്' എന്ന പേരിലുള്ള ഈ അടിയന്തര സാഹചര്യ പരിശീലനം നടക്കുന്നത്.
വൈകുന്നേരം ആറ് മണിക്ക് വ്യോമാക്രമണ മുന്നറിയിപ്പ് നൽകുന്ന സൈറൺ ഏകദേശം രണ്ട് മിനിറ്റ് നേരത്തേക്ക് മുഴങ്ങുന്നതോടെയാണ് മോക്ക് ഡ്രില്ലിന് തുടക്കമാകുന്നത്. ഇതിനുപിന്നാലെ ബ്ലാക്ക്ഔട്ട് സാഹചര്യം സൃഷ്ടിക്കുന്നതിനായി എല്ലാ ജില്ലകളിലും വൈദ്യുതി വിതരണം താൽക്കാലികമായി വിച്ഛേദിക്കും. ഈ സമയത്ത് പൊതുജനങ്ങൾ നേരത്തെ നിശ്ചയിച്ചിട്ടുള്ള സുരക്ഷിത സ്ഥാനങ്ങളിലേക്ക് മാറി അഭയം തേടുന്ന രീതി പരിശീലിക്കും. മോക്ക് ഡ്രിൽ പൂർത്തിയാകുന്നതോടെ അപകടം ഒഴിഞ്ഞുവെന്ന് സൂചിപ്പിക്കുന്ന 'ഓൾ-ക്ലിയർ' സൈറൺ മുഴങ്ങുകയും തുടർന്ന് വൈദ്യുതി ബന്ധം പുനഃസ്ഥാപിക്കുകയും ചെയ്യും.
കേന്ദ്ര ആഭ്യന്തര മന്ത്രാലയത്തിന്റെ മാർഗ്ഗനിർദ്ദേശങ്ങൾക്കനുസൃതമായാണ് ഈ സുരക്ഷാ പരിശീലനം സംഘടിപ്പിക്കുന്നതെന്ന് സിവിൽ ഡിഫൻസ് പ്രിൻസിപ്പൽ സെക്രട്ടറി സംയുക്ത സമദ്ദാർ അറിയിച്ചു. സംസ്ഥാന ദുരന്ത നിവാരണ അതോറിറ്റി, ജില്ലാ ദുരന്ത നിവാരണ അതോറിറ്റികൾ, എൻ.ഡി.ആർ.എഫ്, എസ്.ഡി.ആർ.എഫ്, പോലീസ്, അഗ്നിരക്ഷാ സേന, ആരോഗ്യ വകുപ്പ് തുടങ്ങി വിവിധ സർക്കാർ ഏജൻസികൾ സംയുക്തമായാണ് മോക്ക് ഡ്രില്ലിൽ പങ്കെടുക്കുന്നത്. അടിയന്തര ഘട്ടങ്ങളിൽ വിവിധ വകുപ്പുകൾ തമ്മിലുള്ള ഏകോപനവും പ്രതികരണ ശേഷിയും വിലയിരുത്തുകയാണ് ഇതിലൂടെ ലക്ഷ്യമിടുന്നത്.
മോക്ക് ഡ്രില്ലിന്റെ ഭാഗമായി സിവിൽ ഡിഫൻസ് വോളണ്ടിയർമാരുടെ നേതൃത്വത്തിൽ കൃത്രിമ രക്ഷാപ്രവർത്തനങ്ങളും അരങ്ങേറും. തീയണയ്ക്കൽ, പരിക്കേറ്റവർക്ക് പ്രഥമശുശ്രൂഷ നൽകൽ, തകർന്ന കെട്ടിടങ്ങളിൽ കുടുങ്ങിയവരെ പുറത്തെത്തിക്കൽ, ഗുരുതരമായി പരിക്കേറ്റവരെ ആംബുലൻസുകളിൽ ആശുപത്രികളിലേക്ക് മാറ്റൽ തുടങ്ങിയവയുടെ പ്രദർശനവും ഉണ്ടായിരിക്കും. നിലവിൽ സംസ്ഥാനത്തെ സിവിൽ ഡിഫൻസ് വകുപ്പിന് കീഴിൽ ഏകദേശം ഒരു ലക്ഷത്തോളം വോളണ്ടിയർമാരാണ് പ്രവർത്തിക്കുന്നത്. പുതുതായി രൂപീകരിച്ച 60 ജില്ലാ യൂണിറ്റുകളിലായി പതിനായിരത്തോളം പേർക്ക് ദുരന്ത നിവാരണത്തിലും രക്ഷാപ്രവർത്തനത്തിലും പ്രത്യേക പരിശീലനം നൽകിയിട്ടുണ്ട്.
ജനപ്രതിനിധികൾ, പ്രമുഖ പൗരന്മാർ, എൻ.സി.സി, എൻ.എസ്.എസ്, നെഹ്റു യുവ കേന്ദ്ര സംഘടൻ, കോളേജ് വിദ്യാർത്ഥികൾ, റസിഡന്റ്സ് അസോസിയേഷനുകൾ എന്നിവരുടെ പങ്കാളിത്തം ഉറപ്പാക്കാൻ ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്. ഇതൊരു പരിശീലനം മാത്രമാണെന്നും വ്യാജപ്രചാരണങ്ങളിലും കിംവദന്തികളിലും പെട്ട് പൊതുജനങ്ങൾ പരിഭ്രാന്തരാകരുതെന്നും അധികൃതർ മുന്നറിയിപ്പ് നൽകി. 1962-ലെ ഇന്ത്യ-ചൈന യുദ്ധത്തിന് പിന്നാലെയാണ് ഉത്തർപ്രദേശിൽ സിവിൽ ഡിഫൻസ് വകുപ്പ് സ്ഥാപിതമായത്.
---------------
Hindusthan Samachar / Roshith K