Enter your Email Address to subscribe to our newsletters
Chennai, 03 നവംബര്‍ (H.S.)
ചെന്നൈ: മുഖ്യമന്ത്രിയെ വിമര്ശിക്കാന് സാധാരണക്കാരായ പൗരന്മാര്‍ക്കും അവകാശമുണ്ടെന്ന് മദ്രാസ് ഹൈക്കോടതി. ഭരണാധികാരികളെ ചോദ്യം ചെയ്യാനും വിമര്‍ശിക്കാനും ശക്തമായ എതിര്‍പ്പ് പ്രകടിപ്പിക്കാനുമുള്ള അവകാശം ജനങ്ങളുടെ മൗലികാവകാശമാണെന്ന് കോടതി വ്യക്തമാക്കി. തമിഴ്‌നാട് മുഖ്യമന്ത്രി വിജയ്ക്കെതിരെയുള്ള അപകീര്‍ത്തിക്കേസില്‍ ഡിഎംകെ കൗണ്‍സിലര്‍ സുധയ്ക്ക് മുന്‍കൂര്‍ ജാമ്യം അനുവദിച്ചുകൊണ്ട് ജസ്റ്റിസ് എന്‍. രമേശാണ് ഈ നിരീക്ഷണങ്ങള്‍ നടത്തിയത്.
സര്‍ക്കാരിനെതിരായ വിമര്‍ശനങ്ങളെക്കുറിച്ചും പൊലീസിന്റെ പ്രവര്‍ത്തനങ്ങളെക്കുറിച്ചുമുള്ള വിവിധ നിരീക്ഷണങ്ങള്‍ അദ്ദേഹം തന്റെ വിധിന്യായത്തില്‍ പങ്കുവെച്ചു. ഒരു ജനാധിപത്യ വ്യവസ്ഥയില്‍, ഭരണാധികാരികളെ ചോദ്യം ചെയ്യാനും വിമര്‍ശിക്കാനും ശക്തമായ വിയോജിപ്പ് പ്രകടിപ്പിക്കാനുമുള്ള ജനങ്ങളുടെ അവകാശം ഒരു മൗലികാവകാശമാണ്. ഇന്ത്യന്‍ ഭരണഘടനയുടെ 19(1)(a) അനുച്ഛേദപ്രകാരം, ആവിഷ്‌കാര സ്വാതന്ത്ര്യം എന്നത് സര്‍ക്കാരിനെ പ്രശംസിക്കാനുള്ള അവകാശം മാത്രമല്ല, അതിനെ വിമര്‍ശിക്കാനുള്ള അവകാശം കൂടി നല്‍കുന്നുവെന്നും കോടതി ചൂണ്ടിക്കാട്ടി.
ഡിഎംകെ കൗണ്‍സിലര്‍ സുധ മുഖ്യമന്ത്രി സി. ജോസഫ് വിജയ്ക്കെതിരെ നടത്തിയ പ്രസംഗം രൂക്ഷമായതും ഭരണാധികാരികളെ അവഹേളിക്കുന്നതുമാണ് എന്നതുകൊണ്ട് മാത്രം കുറ്റകൃത്യമായി കണക്കാക്കാനാവില്ല. ഭരണഘടനയുടെ 19(2) അനുച്ഛേദപ്രകാരം ആവിഷ്‌കാര സ്വാതന്ത്ര്യത്തിന് നിയന്ത്രണങ്ങള്‍ ഏര്‍പ്പെടുത്താമെങ്കിലും, അത്തരം നടപടികള്‍ സ്വീകരിക്കുന്നതിന് മതിയായ ക്രിമിനല്‍ കാരണങ്ങളുണ്ടോ എന്ന് പൊലീസ് പരിശോധിക്കേണ്ടതുണ്ടെന്നും കോടതി പറഞ്ഞു. അക്രമത്തിന് പ്രേരിപ്പിക്കുകയോ പൊതുസമാധാനം തകര്‍ക്കുകയോ ചെയ്യുന്ന സാഹചര്യങ്ങളില്ലെങ്കില്‍, കേവലം രാഷ്ട്രീയ വിമര്‍ശനത്തിന്റെ പേരില്‍ നിയമനടപടികള്‍ സ്വീകരിക്കാന്‍ പാടില്ല.
മുഖ്യമന്ത്രി ഉള്‍പ്പെടെയുള്ള പൊതുപ്രവര്‍ത്തകര്‍ ജനങ്ങളുടെ ചോദ്യങ്ങള്‍ക്ക് മറുപടി നല്‍കാന്‍ ബാധ്യസ്ഥരാണ്. ഭരണാധികാരികള്‍ വിമര്‍ശനത്തിന് അതീതരല്ലെന്നും മദ്രാസ് ഹൈക്കോടതി ചൂണ്ടിക്കാട്ടി. രാഷ്ട്രീയ നേതാക്കളുടെ സല്‍പ്പേരിന് നിയമപരമായ സംരക്ഷണമുണ്ട്. എന്നാല്‍, ഈ സംരക്ഷണം ലഭിക്കുന്നതിന് നിയമം അനുശാസിക്കുന്ന നടപടിക്രമങ്ങള്‍ പാലിക്കേണ്ടതുണ്ട്.
ഭരണാധികാരികളുടെ സല്‍പ്പേരിനെ സംരക്ഷിക്കുന്ന നിയമവും പൗരന്മാരുടെ അഭിപ്രായസ്വാതന്ത്ര്യത്തെ സംരക്ഷിക്കുന്ന നിയമവും പരസ്പരവിരുദ്ധമായി ഉപയോഗിക്കപ്പെടാന്‍ പാടില്ല. നിയമം നടപ്പിലാക്കേണ്ട സ്ഥാപനമെന്ന നിലയില്‍ പൊലീസ് നിഷ്പക്ഷമായി പ്രവര്‍ത്തിക്കണം. അധികാരത്തിലിരിക്കുന്ന രാഷ്ട്രീയ പാര്‍ട്ടികളുടെ വ്യക്തിപരമായ താല്‍പ്പര്യങ്ങള്‍ നിറവേറ്റിക്കൊടുക്കുന്ന ഒരു സംവിധാനമായി പൊലീസ് മാറരുതെന്ന് കോടതി പറഞ്ഞു.
---------------
Hindusthan Samachar / Sreejith S
