New delhi, 03 നവംബര്‍ (H.S.)

ഒമാന്‍ തീരത്ത് ചരക്ക് കപ്പലിന് നേരെയുണ്ടായ ആക്രമണത്തില്‍ ഒരു ഇന്ത്യന്‍ നാവികന്‍ കൊല്ലപ്പെട്ടു. ഇന്ത്യന്‍ പതാകയുള്ള ചരക്ക് കപ്പലായ എംഎസ്വി അല്‍ ജുസുഫിക്ക് നേരെ ഒമാന്‍ തീരത്ത് വച്ചുണ്ടായ ആക്രമണത്തിലാണ് നാവികന്‍ കൊല്ലപ്പെട്ടതെന്ന് കേന്ദ്ര ഷിപ്പിങ് മന്ത്രി സര്‍ബാനന്ദ സോനോവാള്‍ സ്ഥിരീകരിച്ചു. തിരിച്ചറിയാനാകാത്ത ഒരു വ്യോമവസ്തു കപ്പലില്‍ വന്നു പതിക്കുകയായിരുന്നു.

ഗന്ധര്‍ നഹീം അജിജ് എന്ന ഗുജറാത്ത് സ്വദേശിയായ നാവികനാണ് കപ്പലിന് നേരെയുണ്ടായ ആക്രമണത്തില്‍ പരിക്കേറ്റ് മരണമടഞ്ഞതെന്ന് മന്ത്രി എക്സ് പോസ്റ്റില്‍ പറഞ്ഞു. കപ്പലില്‍ ആകെ 14 ഇന്ത്യന്‍ നാവികരാണുണ്ടായിരുന്നത്. ഇതില്‍ 13 പേരെ ഒമാന്‍ കോസ്റ്റ് ഗാര്‍ഡ് വിജയകരമായി കപ്പലില്‍ നിന്ന് ഒഴിപ്പിച്ചെങ്കിലും ഒരു നാവികന്റെ ജീവന്‍ രക്ഷിക്കാനായില്ല, ഈ ദാരുണമായ സംഭവത്തില്‍ അഗാധ ദുഃഖമുണ്ടെന്നും അദ്ദേഹം എക്സില്‍ കുറിച്ചു.

മരിച്ച നാവികന്റെ കുടുംബത്തിന് അനുശോചനം അറിയിച്ച മന്ത്രി, രക്ഷപ്പെട്ട 13 പേര്‍ക്ക് അടിയന്തര സഹായം ഉറപ്പാക്കുന്നതിനും രക്ഷപ്പെട്ട ജീവനക്കാരെയും മരിച്ച നാവികന്റെയും മൃതദേഹങ്ങള്‍ വേഗത്തില്‍ നാട്ടിലേക്ക് കൊണ്ടുപോകുന്നതിനും ഷിപ്പിങ് മന്ത്രാലയവും ഒമാനിലെ ഇന്ത്യന്‍ എംബസിയും പ്രാദേശിക അധികാരികളുമായി ബന്ധപ്പെട്ടിട്ടുണ്ടെന്ന് അറിയിച്ചു.

കപ്പലിനെ ആക്രമിച്ചത് ആരാണെന്നോ, ആക്രമണത്തിന് ഉപയോഗിച്ച വെടിക്കോപ്പുകള്‍ എന്താണെന്നോ വ്യക്തമല്ല. കപ്പലിന് നേരെയുണ്ടായ ആക്രമണത്തെ വിദേശകാര്യ മന്ത്രാലയം അപലപിച്ചു. ഇത്തരം സംഭവങ്ങള്‍ ആവര്‍ത്തിച്ച് സംഭവിക്കുന്നുണ്ടെന്നും ഇത് ആശങ്കാജനകമാണെന്നും പറഞ്ഞു.

ഫെബ്രുവരിയില്‍ യുഎസും ഇറാനും തമ്മില്‍ സംഘര്‍ഷം പൊട്ടിപ്പുറപ്പെട്ടതിനെത്തുടര്‍ന്ന് ഹോര്‍മുസ് കടലിടുക്കിലൂടെ സഞ്ചരിക്കുന്ന വ്യാപാര കപ്പലുകള്‍ക്ക് നേരെ തുടര്‍ച്ചയായി ഉണ്ടായ ആക്രമണങ്ങളുടെ തുടര്‍ച്ചയായാണ് ഈ സംഭവം. മിഡില്‍ ഈസ്റ്റിലെ പ്രക്ഷോഭങ്ങള്‍ക്കിടയില്‍ ആഗോള സമ്പദ്വ്യവസ്ഥ ഊര്‍ജ്ജക്ഷാമം നേരിടുമ്പോള്‍ ഗള്‍ഫ് സമുദ്രത്തിന് ചുറ്റും സഞ്ചരിക്കുന്ന കപ്പലുകള്‍ക്ക് തുടര്‍ച്ചയായ അപകടസാധ്യതയുണ്ടെന്ന് ഇത് അടിവരയിടുന്നു.

വിദേശകാര്യ മന്ത്രാലയത്തിന്റെ കണക്കനുസരിച്ച്, ഗള്‍ഫ് സമുദ്രത്തില്‍ ഷിപ്പിങ് കപ്പലുകള്‍ക്കും ടാങ്കറുകള്‍ക്കും നേരെയുള്ള ആക്രമണങ്ങളില്‍ കുറഞ്ഞത് 22 ഇന്ത്യക്കാര്‍ കൊല്ലപ്പെട്ടു. നാവികരുടെ സുരക്ഷ ഉറപ്പാക്കേണ്ടതുണ്ട്. പശ്ചിമേഷ്യയില്‍ നടന്നുകൊണ്ടിരിക്കുന്ന സംഘര്‍ഷത്തില്‍ വളരെയധികം ആശങ്കയുണ്ട്. സംഘര്‍ഷത്തില്‍ 14 നാവികര്‍ ഉള്‍പ്പെടെ 22 ഇന്ത്യന്‍ പൗരന്മാരെ ഞങ്ങള്‍ക്ക് നഷ്ടപ്പെട്ടു, വിദേശകാര്യ മന്ത്രാലയത്തിന്റെ പ്രസ്താവനയില്‍ വ്യക്തമാക്കിയിരുന്നു.

---------------

Hindusthan Samachar / Sreejith S