Bhopal , 04 നവംബര് (H.S.)

ഭോപ്പാൽ: മധ്യപ്രദേശിൽ നിന്നുള്ള രാജ്യസഭാ ഉപതിരഞ്ഞെടുപ്പിൽ കേന്ദ്ര പെട്രോളിയം പ്രകൃതിവാതക മന്ത്രിയും ബിജെപി നേതാവുമായ ഹർദീപ് സിങ് പുരി എതിരില്ലാതെ തിരഞ്ഞെടുക്കപ്പെടാൻ കളമൊരുങ്ങി. വരണാധികാരി നടത്തിയ സൂക്ഷ്മപരിശോധനയിൽ മറ്റ് രണ്ട് സ്വതന്ത്ര സ്ഥാനാർത്ഥികളുടെ നാമനിർദ്ദേശ പത്രികകൾ തള്ളിയതോടെയാണ് കേന്ദ്രമന്ത്രിയുടെ വിജയം ഉറപ്പായത്.

ഈ മാസം ഉപതിരഞ്ഞെടുപ്പിനായി നാമനിർദ്ദേശ പത്രിക സമർപ്പിച്ച കോൺഗ്രസ് പിന്തുണയുള്ള സ്വതന്ത്ര സ്ഥാനാർത്ഥി രാജ്കുമാർ ലോഹാനി, മറ്റൊരു സ്വതന്ത്ര സ്ഥാനാർത്ഥിയായ കാന്തെ സയന്ന എന്നിവരുടെ പത്രികകളാണ് സൂക്ഷ്മപരിശോധനയിൽ തള്ളപ്പെട്ടത്. നിർബന്ധമായും സമർപ്പിക്കേണ്ട ഫോം-26 സത്യവാങ്മൂലം സമയപരിധിക്കുള്ളിൽ ഹാജരാക്കാത്തതിനാലാണ് രാജ്കുമാർ ലോഹാനിയുടെ പത്രിക നിരസിച്ചതെന്ന് റിട്ടേണിങ് ഓഫീസർ ഉമേഷ് കുമാർ ശർമ്മ വ്യക്തമാക്കി. കൂടാതെ, എംഎൽഎമാരുടെ ആവശ്യമായ പിന്തുണ ഒപ്പുകൾ ഇല്ലാത്തതുൾപ്പെടെയുള്ള ന്യൂനതകൾ കാരണമാണ് കാന്തെ സയന്നയുടെ പത്രിക തള്ളിയതെന്നും ഉത്തരവിൽ ചൂണ്ടിക്കാട്ടുന്നു.

അതേസമയം, ഹർദീപ് സിങ് പുരി സമർപ്പിച്ച മൂന്ന് സെറ്റ് നാമനിർദ്ദേശ പത്രികകൾക്കെതിരെ എതിർപ്പുകൾ ഉയർന്നിരുന്നെങ്കിലും, അവയെല്ലാം ചട്ടപ്രകാരമുള്ളതാണെന്ന് കണ്ടെത്തി റിട്ടേണിങ് ഓഫീസർ സ്വീകരിച്ചു. ജനപ്രാതിനിധ്യ നിയമത്തിലെ 36-ാം വകുപ്പ് പ്രകാരം പുരിയുടെ പത്രികകൾ പൂർണ്ണമായും സാധുവാണെന്ന് അധികൃതർ വ്യക്തമാക്കി.

വരണാധികാരിയുടെ ഈ തീരുമാനത്തിനെതിരെ ശക്തമായ വിമർശനവുമായി കോൺഗ്രസ് രംഗത്തെത്തി. കേന്ദ്രമന്ത്രിയുടെ പത്രികയിൽ ഗുരുതരമായ പിഴവുകൾ ഉണ്ടായിരുന്നിട്ടും അത് തള്ളാതിരുന്നത് ഇന്ത്യൻ ജനാധിപത്യത്തിന് നേരെയുള്ള ആക്രമണമാണെന്ന് കോൺഗ്രസ് ആരോപിച്ചു. ഈ നടപടിക്കെതിരെ കോടതിയെ സമീപിക്കുമെന്ന് കോൺഗ്രസ് നേതാക്കൾ വ്യക്തമാക്കിയിട്ടുണ്ട്.

തമിഴ്നാട്ടിലെ പാർട്ടി പ്രവർത്തനങ്ങളിൽ ശ്രദ്ധ കേന്ദ്രീകരിക്കുന്നതിനായി കേന്ദ്ര സഹമന്ത്രിയായിരുന്ന എൽ. മുരുഗൻ ഒക്ടോബർ 14-ന് തന്റെ രാജ്യസഭാ അംഗത്വവും മന്ത്രിസ്ഥാനവും രാജിവെച്ചതിനെ തുടർന്നാണ് മധ്യപ്രദേശിൽ ഉപതിരഞ്ഞെടുപ്പ് അനിവാര്യമായത്. ഉത്തർപ്രദേശിൽ നിന്നുള്ള ഹർദീപ് സിങ് പുരിയുടെ രാജ്യസഭാ കാലാവധി നവംബർ അവസാനത്തോടെ പൂർത്തിയാകാനിരിക്കെയാണ് ബിജെപി അദ്ദേഹത്തെ മധ്യപ്രദേശിൽ നിന്നുള്ള സീറ്റിലേക്ക് സ്ഥാനാർത്ഥിയാക്കിയത്.

230 അംഗങ്ങളുള്ള മധ്യപ്രദേശ് നിയമസഭയിൽ ബിജെപിക്ക് 164 എംഎൽഎമാരുടെ വ്യക്തമായ ഭൂരിപക്ഷമുണ്ട്. അതിനാൽ വോട്ടെടുപ്പ് നടന്നാൽ തന്നെയും പുരിക്ക് ജയം അനായാസമാകുമായിരുന്നു. എന്നാൽ എതിരാളികളുടെ പത്രികകൾ അസാധുവായതോടെ വോട്ടെടുപ്പ് കൂടാതെ തന്നെ അദ്ദേഹത്തിന് വിജയം ഉറപ്പായി. പത്രിക പിൻവലിക്കാനുള്ള അവസാന തീയതിക്ക് ശേഷം ഔദ്യോഗിക ഫലപ്രഖ്യാപനം ഉണ്ടാകും.

---------------

Hindusthan Samachar / Roshith K