NewDelhi , 05 നവംബര് (H.S.)

കാലടി ശ്രീശങ്കരാചാര്യ സംസ്കൃത സർവകലാശാലയിലെ പരീക്ഷാ വിവാദത്തിൽ വിദ്യാർഥികൾക്ക് നേരിട്ട് ആശ്വാസം നൽകാതെ സുപ്രീംകോടതി. വിഷയത്തിൽ ഇടപെട്ട് ഉത്തരവ് പുറപ്പെടുവിക്കാൻ വിസമ്മതിച്ച കോടതി, കേസ് വീണ്ടും ഹൈക്കോടതിയുടെ പരിഗണനയ്ക്ക് വിട്ടു. വിദ്യാർഥികൾ സമർപ്പിച്ച ഹർജി ഹൈക്കോടതി സിംഗിൾ ബെഞ്ച് അടിയന്തരമായി പരിഗണിച്ച് അന്തിമ തീരുമാനമെടുക്കണമെന്നും സുപ്രീംകോടതി നിർദേശിച്ചു.

വിദ്യാർഥികൾക്ക് അനുകൂലമായ ഉത്തരവുണ്ടായാൽ അവർക്കായി പ്രത്യേക പരീക്ഷ നടത്താൻ സർവകലാശാല തയ്യാറാകണമെന്നും കോടതി വ്യക്തമാക്കി.

ജസ്റ്റിസ് പി.എസ്. നരസിംഹ അധ്യക്ഷനായ ബെഞ്ചാണ് 16 എസ്.എഫ്.ഐ വിദ്യാർഥികൾ സമർപ്പിച്ച ഹർജി പരിഗണിച്ചത്. ഹൈക്കോടതി ഡിവിഷൻ ബെഞ്ചിന്റെ ഉത്തരവിനെതിരെയായിരുന്നു വിദ്യാർഥികൾ സുപ്രീംകോടതിയെ സമീപിച്ചത്.

സർവകലാശാലകളിൽ അച്ചടക്കവും ചട്ടങ്ങളും പാലിക്കേണ്ടത് പ്രധാനമാണെന്ന് നിരീക്ഷിച്ച കോടതി, വിദ്യാർഥികളുടെ ഭാവിയും പരിഗണിക്കപ്പെടേണ്ടതുണ്ടെന്ന് ചൂണ്ടിക്കാട്ടി.

കാമ്പസിലെ ലൈറ്റുമായി ബന്ധപ്പെട്ട തർക്കത്തെത്തുടർന്നുണ്ടായ പ്രതിഷേധമാണ് കേസിന് ആധാരം. പ്രതിഷേധത്തിൽ പങ്കെടുത്തതിനെ തുടർന്ന് വിദ്യാർഥികളെ സർവകലാശാല 64 ദിവസത്തേക്ക് സസ്പെൻഡ് ചെയ്തിരുന്നു. കൃത്യമായ അന്വേഷണ റിപ്പോർട്ടില്ലാതെയാണ് സസ്പെൻഷൻ നടപടിയെടുത്തതെന്നാണ് വിദ്യാർഥികളുടെ ആരോപണം.

സസ്പെൻഷൻ കാരണം ആവശ്യമായ ഹാജർനില നഷ്ടമായെന്നും സർവകലാശാലാ ചട്ടപ്രകാരം ഹാജർനില തികയാത്തവരെ പരീക്ഷ എഴുതാൻ അനുവദിക്കാനാകില്ലെന്നുമാണ് സർവകലാശാലയുടെ വാദം. സുപ്രീംകോടതിയിലും സർവകലാശാലയ്ക്കുവേണ്ടി ഹാജരായ അഭിഭാഷകൻ ഇതേ നിലപാട് ആവർത്തിച്ചു. ഹാജർനില സംബന്ധിച്ച ചട്ടങ്ങൾ കർശനമായി പാലിക്കണമെന്നും സർവകലാശാല ആവശ്യപ്പെട്ടു.

പരീക്ഷ എഴുതാൻ അനുമതി നിഷേധിച്ചതിനെത്തുടർന്ന് വിദ്യാർഥികൾ ആദ്യം ഹൈക്കോടതി സിംഗിൾ ബെഞ്ചിനെ സമീപിച്ചിരുന്നു.

പരീക്ഷ എഴുതാൻ അനുവദിച്ച് സിംഗിൾ ബെഞ്ച് ഇടക്കാല ഉത്തരവ് പുറപ്പെടുവിച്ചു. എന്നാൽ, ഇതിനെതിരെ സർവകലാശാല ഡിവിഷൻ ബെഞ്ചിനെ സമീപിക്കുകയും സിംഗിൾ ബെഞ്ചിന്റെ ഉത്തരവ് റദ്ദാക്കുകയും ചെയ്തു. ഇതോടെ വിദ്യാർഥികൾക്ക് പരീക്ഷ എഴുതാനുള്ള അനുമതി നഷ്ടമായി. തുടർന്നാണ് 16 വിദ്യാർഥികൾ സുപ്രീംകോടതിയെ സമീപിച്ചത്.

സുപ്രീംകോടതി നേരിട്ട് ഇടപെട്ട് ആശ്വാസം നൽകിയില്ലെങ്കിലും ഹൈക്കോടതി സിംഗിൾ ബെഞ്ചിന്റെ അന്തിമ തീരുമാനത്തിലൂടെ അനുകൂല ഉത്തരവ് ലഭിക്കുമെന്ന പ്രതീക്ഷയിലാണ് വിദ്യാർഥികൾ.

ഹർജി അടിയന്തരമായി പരിഗണിക്കണമെന്ന സുപ്രീംകോടതിയുടെ നിർദേശം കേസിൽ നിർണായകമായേക്കും. വിദ്യാർഥികളുടെ ഭാവിയും സർവകലാശാലയുടെ അച്ചടക്ക നടപടികളും തമ്മിലുള്ള തർക്കത്തിൽ ഇനി ഹൈക്കോടതിയുടെ അന്തിമ തീരുമാനമാണ് നിർണായകമാകുക.

---------------

Hindusthan Samachar / CHANDHU CHANDRASEKHAR